Misr Arab Respublikasining nufuzli «Al-Xabar al-youm» (Kun xabari) gazetasi «Dunyo» AA manbasi asosida O‘zbekistonning ijtimoiy-siyosiy, madaniy-ma’rifiy hayotidagi voqeliklarga e’tibor qaratishda davom etgan. Mazkur gazetaning navbatdagi sonida mamlakatimizga bag‘ishlagan ikkita material chop etildi. 

Xususan, O‘zbekiston Respublikasi Prezidentining «Qurbon hayitini nishonlash to‘g‘risida»gi qaroriga doir «O‘zbekiston Prezidenti tegishli idoralar va jamoat tashkilotlariga muborak Qurbon hayitini nishonlash uchun barcha zarur sharoitlar yaratilishini topshirdi» nomli materialda mamlakatimizda Qurbon hayiti bayramini yuqori darajada o‘tkazish bo‘yicha chora tadbirlar belgilangani ta’kidlanadi. 

Prezident qarori Qurbon hayiti musulmon olami, shu jumladan o‘zbek xalqining ma’naviy hayotidagi roli va ahamiyatidan kelib chiqib, milliy va diniy qadriyatlarni asrab-avaylash va rivojlantirishga qaratilgan. 

Hujjatga binoan, O‘zbekiston musulmonlari idorasining Qurbon hayitini joriy yil 31 iyul, juma kuni nishonlash to‘g‘risida qarori inobatga olinib, 31 iyul butun mamlakat bo‘ylab Qurbon hayiti bayrami sifatida keng nishonlanadi. Shuningdek, tegishli ijtimoiy idoralar va tashkilotlarga Qurbon hayitini milliy urf-odatlarga muvofiq, karantin qoidalariga rioya qilgan holatda nishonlash uchun barcha zarur shart-sharoitlar yaratib berish vazifasi topshirilgani qayd etilgan. 

O‘zbekistonda hayit kunlari do‘stlik va birodarlik ruhida xayr-saxovat kabi ezgu amallar bajariladi, gina-kuduratlar unutiladi. Musulmonlar Qurbon hayiti namozidan so‘ng yaqinlarini yo‘qlaydi, bemorlar va muhtojlar holidan xabar oladi, ularga hadyalar ulashadi. Bu o‘zaro mehr-oqibat rishtalarini yanada mustahkamlaydi. Afsuski, bu yil barcha musulmon mamlakatlarida bo‘lgani kabi, O‘zbekistonda ham hayit namozini jamoat bo‘lib o‘qish imkoniyati yo‘q. Bu birinchi galda insonlar salomatligini o‘ylab qabul qilingan qaror, deb yozadi «Al-Xabar al-youm». 

Gazeta O‘zbekiston Respublikasi Prezidentining 2016 yil sentyabr oyidan 2020 yil 1 yanvargacha bo‘lgan davrdagi siyosiy faoliyati solnomasini o‘zida mujassam etgan to‘plam nashr etilgani haqidagi xabarni ham e’lon qilgan. 

«O‘zbekiston» nashriyot-matbaa ijodiy uyi tomonidan «O‘zbekiston Respublikasi Prezidenti Shavkat Mirziyoyevning faoliyat xronikasi» deb nomlangan to‘plam nashrdan chiqarildi. Unda O‘zbekiston Prezidentining 2016 yil sentyabr oyidan 2020 yil 1 yanvargacha bo‘lgan davrdagi siyosiy faoliyati solnomasi batafsil aks ettirilgan”, — deb yozadi nashr. 

Ushbu to‘plam o‘ta murakkab va mashaqqatli, tarixiy zaruratga aylangan bugungi jarayonda yangi O‘zbekiston hayotida qanday o‘zgarishlar kechayotgani xususida to‘liq ma’lumot berishi ta’kidlangan. «O‘zbekiston» nomli ulkan kemani yangi taraqqiyot ufqi sari boshlash, siyosatshunoslar iborasi bilan aytganda, davlat va jamiyat boshqaruvida tarixiy burilish yasash Prezident Shavkat Mirziyoyev tomonidan qanday amalga oshirilayotgani kitobda aniq tizim asosida kunma-kun, oyma-oy yoritilgani qayd etilgan. 

O‘zA