Ar-Rahmon – Allohning go‘zal ismlaridan biri. Surada Alloh taolo insonlarga, jinlarga bergan behisob ne’matlari eslatilgan, o‘ttiz bir marta: “Parvardigoringizning qaysi bir ne’matini inkor etasizlar?!” – deb xitob qilingan.

Bir kuni Rasululloh sollallohu alayhi vasallam sahobai kiromlar oldiga chiqib, Ar-Rahmon surasini boshidan oxirigacha o‘qib berdilar. Sahobalar qiroatga quloq solib jim o‘tiraverishdi. Bu holni ko‘rgan Rasuli akram sollallohu alayhi vasallam jinlar qanday javob qaytarganini aytdilar: jinlar bilan uchrashilgan tunda u zot Ar-Rahmon surasini o‘qib berganlar. Har safar “Parvardigoringizning qaysi bir ne’matini yolg‘onga chiqarasizlar?!” oyatidan o‘tilganda, jinlar: “Parvardigoro, Sening bironta ham ne’matingni inkor qilmaysiz. Barcha maqtovlar Sengagina xos!” deb javob qaytarishgan.

Har narsaning ziynati bo‘ladi. Qur’onning ziynati – Ar-Rahmon surasi. Bu surada dunyo va oxirat ne’matlari, jannat ahlining kelinlari bo‘lmish hurlar vasf etilgan, ularning zeb-ziynatlari haqida ma’lumot berilgan.

Ali roziyallohu anhudan rivoyat qilinadi. Rasululloh sollallohu alayhi vasallam bunday deganlar: “Har bir narsaning kelini bor. Qur’onning kelini Ar-Rahmon surasidir” (Imom Bayhaqiy rivoyati).

Fotima roziyallohu anhodan rivoyat qilingan hadisda: “Hadid, Voqea, Ar-Rahmon suralarini o‘qiydigan qori osmonlaru yer malakutida “Firdavsda yashovchi” deb chaqiriladi”, deyilgan (Imom Bayhaqiy rivoyati).