Kirib keldi oylar shohi Ramazon! (She’r)
Yaratganning bandalarga rahmati,
Mag‘firatdur mo‘minga har zahmati,
To‘sib nordan ro‘zadorni shafqati,
Kirib keldi oylar shohi Ramazon,
Qutlug‘ bo‘lsin elga mohi Ramazon.
Dil poklanar kunduzlari siyamdan,
Cheksiz rohat yog‘ar tunlar qiyamdan,
Shukronalar qilgil bunday niamdan,
Kirib keldi oylar shohi Ramazon,
Qutlug‘ bo‘lsin elga mohi Ramazon.
Har lahzasi chorlab xayru saxoga,
Tenglik bo‘lar bunda shohu gadoga,
Har yon to‘lib qur’oniy xush sadoga,
Kirib keldi oylar shohi Ramazon,
Qutlug‘ bo‘lsin elga mohi Ramazon.
Quvib o‘zdan lain iblis shaytonni,
Boy bermagay oqil bunday imkonni,
Do‘st tutmagay aslo beg‘am nodonni,
Kirib keldi oylar shohi Ramazon,
Qutlug‘ bo‘lsin elga mohi Ramazon.
G‘animatdur bu kunlarga bo‘l tolib,
Saodatli damlaridan bahr olib,
Nafsing bilan jangda bo‘lgil sen g‘olib,
Kirib keldi oylar shohi Ramazon,
Qutlug‘ bo‘lsin elga mohi Ramazon.
Tolibjon Ro‘ziboyev
Zeki Kaymaz: Kelgusi o‘n yil ichida O‘zbekistonni turkiy dunyoda yorqin yulduz sifatida ko‘raman
Turk tili instituti Ilmiy kengashi a’zosi, filolog olim, professor Zeki Kaymaz O‘zbekiston mustaqilligining 35 yilligi arafasida “Dunyo” AA orqali yurtdoshlarimizga o‘zining samimiy tabrigi va ezgu tilaklarini yo‘lladi.
– Avvalo, O‘zbekiston xalqini istiqlolning 35 yilligi munosabati bilan chin ko‘ngildan tabriklayman. O‘ttiz besh yil oz vaqt emas. Men yuz yildan oshgan mustaqil Turkiya fuqarosi sifatida Sizlarga ham yana ko‘p asrlar mustaqillik shodiyonasini nishonlashingizni tilayman.
Tarixga nazar tashlasak, Markaziy Osiyo, xususan, O‘zbekiston bilan yaqin munosabatda bo‘lib kelganmiz. Ayniqsa, Turkiyadagi milliy ozodlik kurashi davrida bizga bu diyordan jo‘natilgan ko‘makni doimo katta minnatdorlik bilan yodga olamiz.
Qardosh o‘zbek xalqi biz uchun doimo yaqin birodar, qalin do‘st bo‘lib kelgan. O‘zbekistonning bugungi taraqqiyoti bizni juda mamnun qiladi. Ushbu zaminga har borganimda go‘zal va obod mamlakatni ko‘ramaz. Yurtingizda madaniyat va ma’rifat o‘choqlari bisyor. Albatta, bu tamaddun va sivilizatsiyaning ildizlari uzoq o‘tmishga borib taqaladi.
Markaziy Osiyodagi ilk o‘rta asrlardagi Birinchi renessans hamda Amir Temur asos solgan Ikkinchi renessans davrlarida bu zaminda buyuk sivilizatsiya shakllandi. Toshkentda bunyod etilgan Islom sivilizatsiyasi markazi, Samarqanddagi Imom Buxoriy majmuasi, Imom Moturidiy ziyoratgohi kabi madaniy-ma’naviy maskanlar islom olamida muhim ahamiyatga ega.
Geostrategik mavqei nuqtayi nazaridan, men kelgusi o‘n yil ichida O‘zbekistonni turkiy dunyo, xususan, Markaziy Osiyo davlatlari orasida yorqin yulduz sifatida ko‘raman.
Buning sabablari bor, albatta. Avvalo, mamlakatdagi kuchli iqtisodiyot. Qolaversa, chuqur ildizlarga ega bo‘lgan boy madaniyat va tarix. Turkiya bilan O‘zbekiston o‘rtasidagi mustahkam do‘stlik va yaqin hamkorlik aloqalari ham muhim ahamiyat kasb etadi.
Tilagim – do‘stlik rishtalarimiz yanada mustahkamlansin, davlatlarimiz o‘rtasidagi hamkorlik aloqalari yuqori darajaga ko‘tarilsin.
Yana bir bor mustaqillik bayrami bilan chin qalbimdan tabriklayman va o‘zbek xalqiga samimiy salomlarimni yo‘llayman.
O‘zbekiston musulmonlari idorasi Matbuot xizmati
