Bugun, “27 iyun – Matbuot va ommaviy axborot vositalari xodimlari kuni” munosabati bilan viloyat markazidagi «Matbuot uyi»da tadbir bo‘lib o‘tdi. Unda viloyatda faoliyat yuritayotgan ommaviy axborot vositalari xodimlari va boshqa mutasaddilar ishtirok etdi.

Matbuot va ommaviy axborot vositalari xodimlarini tabriklash uchun tadbirga Farg‘ona viloyati hokimi Shuhrat G‘aniyev ham tashrif buyurdi. Viloyat hokimi soha xodimlarini bugungi bayram bilan tabriklab, kelgusi ishlarida omad va zafarlar tiladi.

Shundan so‘ng, O‘zbekiston jurnalistlari ijodiy uyushmasi Farg‘ona viloyati bo‘limi tomonidan e’lon qilingan “Yilning eng faol jurnalisti” tanlovi g‘oliblari viloyat hokimligi tomonidan taqdirlandi.

O‘zbekiston musulmonlari idorasining Farg‘ona viloyati vakilligi Matbuot xodimi, Marg‘ilon shahridagi «Zayd ibn Horisa» masjidi imom-xatibi Rahmatulloh Jalilov mazkur tanlovning «Internet saytlarida e’lon qilingan eng yaxshi jurnalistik ish» nominatsiyasida faxrli 3-o‘rinni qo‘lga kiritib, «Faxriy yorliq» hamda pul mukofoti bilan taqdirlandi.

Fursatdan foydalanib, barcha ustozlar va imom domlalar qo‘lga kiritilgan mukofot bilan vakilimizni muborakbod etamiz hamda diniy soha xodimining eng faol jurnalistlar qatorida e’tirof etilishi barchamizga sharaf bag‘ishlaganini mamnuniyat ila izhor etamiz.

Farg‘ona viloyati vakilligi Matbuot xizmati