Bugun, 26 iyun kuni Qirg‘iziston musulmonlari idorasi raisi, muftiy Maqsadbek Toktamushev boshchiligidagi Qirg‘iziston delegatsiyasining Farg‘ona viloyati So‘x tumaniga tashrifi doirasida mahalliy aholi vakillari bilan muloqotlar o‘tkazildi.
Mehmonlarga O‘zbekiston musulmonlari idorasi raisi, muftiy Usmonxon Alimov hazratlari va Din ishlari bo‘yicha qo‘mita raisi Abdug‘ofur Ahmedov hamrohlik qildilar. Ushbu samimiy muloqotlarni mahalliy aholi vakillari cheksiz mamnunlik va katta olqishlar bilan qarshi oldilar.
Ta’kidlash joizki, Farg‘ona viloyati So‘x tumani tarixi uzoq o‘tmishga borib taqaladi. Xususan, chashma bulog‘i ham shunday. Bu yerda azaldan ahil-inoq va o‘zaro totuvlikda yashab kelayotgan o‘zbek, tojik va qirg‘iz xalqlari shu buloq suvidan birday foydalanadi. So‘nggi vaqtlardagi Chashma qishlog‘ida sodir bo‘lgan noxush voqeada bir qancha odamlar aziyat chekdi. Allohga shukrki, bunday qaltis vaziyatga o‘z vaqtida barham berildi. Ikki davlat rahbarlari har qanday masalani muzokaralar asosida tinchlik yo‘li bilan yechim topishdi.
Muhtaram Prezidentimiz tashabbuslari bilan tashkil etilgan ikki davlatning chegaradosh viloyatlari mutasaddilari majlislarida bu kabi masalalarga e’tibor qaratilib, hal etish yo‘llari muhokama qilindi.
Tashkil etilgan qo‘shni mamlakatlar taniqli ulamolari va din peshvolarining mahalliy aholisi bilan bo‘lgan uchrashuvlarida hududdagi barcha muammolar tinch va murosa yo‘li bilan hal etilishini alohida ta’kidlandi. Uzoq yillar davomida qirg‘izlar, o‘zbeklar va tojiklar azaldan o‘zaro tinch-totuv, quda-anda bo‘lib yashab kelgani, bundan keyin ham shunday davom etishi ajdodlarimiz tutgan yo‘l – chin mo‘minlik, birodarlik sifati ekanini alohida bayon etildi.
So‘z olgan notiqlar o‘z navbatida, bugungi murakkab davrda ziddiyatli masalalarni hal etishda turli fitnalarga berilmaslik, gap-so‘zlarga uchmaslik va har qanday vaziyatda og‘ir-bosiq bo‘lish kerakligini alohida qayd etdilar.
Darhaqiqat, hozirgi kunda so‘xliklar muhtaram Prezidentimizning katta g‘amxo‘rligini hamisha his qilib yashamoqda. Ushbu tuman yurtimizning eng obod va farovon maskaniga aylanib, bu kabi ishlarning natijasi odamlar hayotida aks etishiga shubha yo‘q. Buning uchun ikki mamlakat muftiylari ta’kidlaganlaridek, tinchlik-totuvlik, o‘zaro tushunish va ezgu maqsad yo‘lida sidqidildan hamkorlik qilish talab etiladi, xolos.

O‘zbekiston musulmonlari idorasi Matbuot xizmati