Kitobxonlarga o‘zining “Laa tahzan” ya’ni “Mahzun bo‘lma” kitobi bilan tanish bo‘lgan Doktor Oiz ibn Abdulloh al-Qorniy hafizahulloh 1959 yil 1 yanvarda, hijriy hisob bilan 1379 yilda Saudiya Arabistoning Bulqorn viloyatida Oli Shurayh qishlog‘ida tavallud topgan.
Doktor Oiz Qorniy yozuvchi, shoir, voiz va da’vatchidir. U o‘zining ma’ruzalari bilan ko‘plab mamlakatlarga tashrif buyurdi, o‘nlab konferensiyalarda qatnashdi. Saksondan ortiq kitoblar, bir qancha xutbalar, audio va video shakldagi she’riy kechalar va adabiy yig‘inlarda yozilgan darslik va ma’ruzalar muallifidir.
Doktor Oiz Qorniy 80 ga yaqin kitoblar yozgan bo‘lib, Uning “Laa tahzan” nomli kitobi uning erishgan natijalarining eng ko‘zga ko‘ringani va uni mashhur bo‘lishiga sabab bo‘lgan kitobi hisoblanadi. Uning mazkur kitobi o‘n milliondan ortiq nusxada sotilgani va o‘ttizdan ortiq tilga tarjima qilingani tilga olinadi.[1] Uning bu kitobi butun dunyoga mashhurdir.
Ustoz Mubashshir Ahmad tarafidan “O‘kinma” nomi bilan o‘zbek tiliga qayta tarjima qilindi. Ushbu kitob sizga: “Xushchaqchaq va baxtli bo‘ling, yaxshilik tomonini izlang va tinchlaning”, deydi. Hayotga o‘z holicha boqishni, mamnun, quvnoq va shod yashashni o‘rgatadi. Yo‘nalishlar, odamlar, zamon va makonlar bilan muomala qilishda fitratga zid xatolarni tuzatadi[2]
Bundan tashqari “Tabassum qiling”[3], “Qalblar tizgini”[4] kitoblari ham o‘zbek tiliga tarjima qilinib kitobxonlar orasida mashhurdir. Hozirda muallifning “Dunyodagi eng baxtli ayol” hamda “Baxtli bo‘lmoq uchun” kitoblari ham Saidxon Maxsum qori tomonidan nashrga tayyorlanib, chop etilish arafasida.
Doktor Oiz Qorniy “Dunyodagi eng baxtli ayol” nomli kitobida ayollarning baxtli saodatli hayoti uchun qayg‘uradi. Ma’lumki Islom dini kelib ayolning qadrini ko‘tardi. U o‘zini jamiyatda baxtiyor his qilib yashashini ta’minladi. Doktor Oiz Qorniy o‘zining bu kitobida ayollarga to‘g‘ridan to‘g‘ri xitob qilib, ularning jamiyatdagi ulug‘ maqomini ko‘rsatib bergan, mana shularni his etgan holda chinakam baxtga sazovor bo‘lib hayot kechirishlarida kerakli tavsiyalarini bergan.
Doktor Oiz Qorniy bir qancha teleko‘rsatuvlarda ham qatnashgan, jumladan:
“Risolat”, “Iqro”, “Dubay” kabi qator kanallarda Ramazon suhbatlarida qatnashib turadi.
Hulosa o‘rnida aytsak, Doktor Oiz Qorniy jamiyat taraqqiyoti, farovonligi, mo‘min-musulmonlarning ikki dunyoda saodatli hayoti uchun tinim bilmay faoliyat olib borayotgan zamonamiz olimlaridandir.
Fozilxon ABDULLAYEV,
Toshkent islom instituti talabasi.
[1] Wikipedia.org/wiki/ عاءض القرني
[2] https://www.facebook.com/eHilol/posts/1534790136598605/
[3] Faxriddin M. Rahmatulloh A. va boshqalar. Tabassum qiling. – Toshkent. Sano-standart, 2018.
[4] Aliboyev B. Qalblar tizgini. – Toshkent. Qaqnus software, 2018.
Bismillahir Rohmanir Rohiym
Inson yaralibdiki, xursandchilik bilan birga g‘am-tashvish, qayg‘u-alamlar ila yashaydi. Shu o‘rinda aytib o‘tish kerakki, “g‘am-tashvish”, “qayg‘urish” kabi tushunchalar ikki xil bo‘ladi:
1. Tabiiy.
2. Orttirilgan.
Birinchisi haqida so‘z borganda, uni “sog‘lom tashvishlanish”, deb atashimiz mumkin. Boshqacha qilib aytganda, busiz hayotni tasavvur qilish qiyin. Tashvishlanishning bu turi topilmaydigan kishilar hissizlik ketidan kasal bo‘lib qolishlari turgan gap.
Albatta, hayot tashvishlari benihoya – ishdagi muammolar, uydagi g‘am-tashvishlar, ota-onaga g‘amxo‘rlik, farzand tarbiyasi, olingan qarzlarni to‘lash, oilaviy kelishmovchiliklar, imtihonlar, kimdirlar bilan uchrashish... Bularning barchasi odamni tashvishlanish, bezovta bo‘lish va qayg‘urishga undaydi. Bunday ruhiy holatlar ishtahamizni bo‘g‘ib, asabimizni buzadi, uyqimiz qochadi, bir so‘z bilan aytganda, hayotning achchiq-chuchuklarini totib, o‘nqir-cho‘nqirlariga duch kelamiz. Vaqt o‘tishi bilan bu muammolar o‘z yechimini topadi, biz ham voqelikka rozi bo‘lamiz, ko‘nikamiz, tashvishlar ariydi, stresslardan xalos bo‘lib, xotirjamlikka erishamiz. Oradan biroz muddat o‘tib yana yangi muammolarga duch kelamiz, xullas, hayot shu tarzda davom etaveradi.
Deyl Karnegi aytadi: “Men o‘ttiz yetti yildan ko‘proq vaqt Nyu-Yorkda yashadim. Menda “bezovtalik” degan kasallik borligidan ogohlantirib qo‘yish uchun biror kishi eshigimni taqillatib kelgani yo‘q. Suvchechak kabi kasallik keltirib chiqaradigan asoratlardan bir necha ming barobar ko‘p zararlar ko‘rishimning asosiy sababi, ushbu bezovtalik kasalligi bo‘ldi. Ha, ha, rost! Hech bir kishi eshigimni qoqib, amerikaliklarning har o‘ninchisi xavotir, ortiqcha tashvishga sabab bo‘luvchi asab buzilishiga chalinganini aytib, ogohlantirgani yo‘q”.
Karnegi so‘zida davom etadi: “Kishi butun dunyo mulkini qo‘lga kiritgan taqdirda ham, faqatgina bitta yotoqda yota oladi, xolos. Kunda uch mahaldan ortiq ovqatni oshqozoni sig‘dira olmaydi. Shunday ekan, bu odam bilan yer ag‘darib yurgan dehqon orasida qanday farq bor? Aksincha, dehqon chuqurroq uyquga ketsa kerak, to‘g‘rimi? Bu kabi badavlat kishidan ko‘ra dehqon yeyayotgan taomidan ko‘proq lazzat ola biladi, uning ta’mini yaxshiroq his qiladi, shunday emasmi?!”,
Barselonalik mashhur doktor Marko Alvares o‘z tajribalari bilan bo‘lishib, bunday deydi: “Ma’lum bo‘lishicha, har beshta bemorimdan to‘rttasining kasalligi birorta a’zo ta’sirida emas, aksincha, qo‘rquv, bezovtalanish, tashvishlanish, asabiylashish hamda kishi o‘zi va hayoti o‘rtasidagi munosabat hamda muvozanatni yo‘qotganligidan bo‘ladi”.
Shoir Mansur bir she’rida bunday deydi:
Xohla boy bo‘l, xoh faqirlikni et iroda,
Hech iloj yo‘q g‘am bo‘lar albat bu dunyoda.
Har gal oshib borsa atrofingda ne’mating,
Qarshisida ortib borar g‘am ustiga ham g‘aming.
Hasson Shamsiy Poshoning
“Jannat bo‘stonidagi oilaviy oqshomlar” nomli kitobidan
G‘iyosiddin Habibulloh, Ilhom Ohund, Abdulbosit Abdulvohid tarjimasi.