Ro‘zani buzmaydigan amallar
- Agar ro‘zador kishi ro‘zaligini unutgan holda taom yesa, biror narsa ichsa yoki o‘z ahli bilan g‘uslni vojib qiluvchi ishga kirishsa – ro‘zasi buzilmaydi.
Abu Hurayra roziyallohu anhudan rivoyat qilinadi: “Nabiy sallollohu alayhi vasallam aytdilar: “Agar (bir kishi) unutib bir narsa yesa, ichsa, ro‘zasini tugal qilsin. Albatta uni Alloh taolo taomlantiribdi, serob qilibdi”. (Buxoriy rivoyati)
- Uyqusida ehtilom bo‘lsa, ro‘zaga zarar yetkazmaydi. Chunki, bu haqiqiy suratda oilaviy aloqa hisoblanmaydi. Unutib narsa yeganning holatidan ham ko‘ra bu holat tez-tez sodir bo‘ladi.
Abu Said Xudriydan rivoyat qilinadi: “Rosululloh solallohu alayhi vasallam aytdilar: “Uch narsa ro‘zadorning og‘zini ochmaydi: “Hijoma, qusish va ehtilom”. (Sunani Termiziy)
- Agar bir ayolga nazar solsa va erkaklik quvvati to‘kilsa yoki shu haqida o‘ylasa va suyuqlik to‘kilsa – ro‘za buzilmaydi. Chunki, bu ko‘rinishda suyuqlikning to‘kilishi ehtilom singari bo‘lib, haqiqiy aloqa sababidan emasdir.
- Kunduzi xushbo‘ylansa, ro‘zani buzmaydi. Xushbo‘ylik badanning sirtiga suriladi, ichiga emas. Xuddi cho‘milishga qiyos qilinadi.
- Kunduzi ko‘ziga surma qo‘ysa ham ro‘za ochilmaydi.
Anas ibn Molikdan rivoyat qilinadi: “Bir kishi Payg‘ambarimiz salollohu alayhi vasallamning oldilariga kelib ko‘zi og‘riyotganidan shikoyat qilib: “Ro‘zador holatimda surma qo‘ysam bo‘ladimi?” dedi. U zot: “Ha”, dedilar. (Sunani Termiziy)
Termiziy aytadilar: “Ahli ilmlar ro‘zador uchun surma qo‘yish borasida har xil fikr aytganlar. Ba’zilar makruh degan – Sufyon, Ibn Muborak va Ahmadlar, ba’zilar esa ruxsat berishgan – Shofe’iy, Anas, Hasan, Ibrohimlar”. (Sahih Buxoriy)
- Agar ro‘zador birovni g‘iybat qilsa, ma’no va surat jihatidan haqiqiy buzuvchi bo‘lmaganligi bois, ro‘zasi buzulmaydi. Ammo harom ishni qilgani uchun uchun gunohkor bo‘ladi. Quyidagi hadis ko‘pchilikni shunday gumon qilishiga sabab bo‘ladi: “Kim yolg‘on gapni tashlamasa va unga amal qilishdan tiyilmasa, uning yeb-ichishni tark qilganiga Alloh taoloning hech qanday hojati bo‘lmaydi”. (Sunani Termiziy) Yolg‘on, g‘iybat so‘z aytib, ro‘zam buzuldi deya, og‘zini ochib yuborgan kishi ulamolarning ijmosiga ko‘ra ham qazo, ham kafforat tutib beradi.
- Qusqi g‘olib kelsa, yuqorida aytilganidek ro‘zani buzmaydi.
- Ro‘zador erkak o‘z old avratiga dori quysa, Abu Hanifa va Muhammad nazdilarida ro‘zani ochmaydi. Ayol kishining avrati bu hukmga kirmaydi.
- Ro‘zadorning halqumiga chang, pashsha kabi narsalar kirsa, ro‘zaga ziyon bermaydi. Chunki, bundan saqlanishning iloji yo‘q.
10. Agar junub bo‘lib tong ottirsa, ro‘zani buzmaydi. Chunki, Oisha roziyallohu anhodan qilingan rivoyatda Payg‘ambarimiz junub bo‘lib tong ottirganlar, g‘usl qilib ro‘zalarini tutganlar. Ramazon kechasining barchasi tong otgunga qadar er-xotin aloqalariga halol qilingandir.
11. Kunduzi tishlari orasidagi no‘xatdan kichik taomni yutib yuborsa, ro‘zaga ta’sir qilmaydi. Chunki, ozgina naradan saqlanishning iloji yo‘q. Agar no‘xatdan katta narsani yutib qo‘ysa yoki o‘sha kichik narsani og‘zidan chiqarib turib yana qayta og‘ziga solsa – ro‘za buzilishiga sabab bo‘ladi. Vallohu A’lam.
“Fiqhul hanafiy va adillatu” kitobidan
N.Saidakbarova tarjimasi
Imom Buxoriy majmuasi yaqinida besh yulduzli birinchi mehmonxona ochildi
Samarqanddagi Imom Buxoriy majmuasi hududida besh yulduzli “Hadith Hotel” mehmonxonasining ochilish marosimi bo‘lib o‘tdi.
O‘zA xabariga ko‘ra, tadbirda Samarqand viloyat hokimi Adiz Boboyev, Turizm qo‘mitasi raisi Abdulaziz Aqqulov, Indoneziya Respublikasining Haj va Umra vaziri Muhammad Irfan Yusuf so‘zga chiqib, Prezident Shavkat Mirziyoyev tashabbusi bilan yangidan bunyod etilgan Imom Buxoriy majmuasi yurtimizda ziyorat turizmini rivojlantirishda muhim qadam bo‘lganini ta’kidladi.
Majmua qayta qurilishi jarayonida uning atrofida yigirmadan ortiq mehmonxona, sayyohlar uchun zamonaviy infratuzilma tashkil etildi.
240 o‘rinli “Hadith Hotel” indoneziyalik investorlar bilan hamkorlikda barpo etilgan bo‘lib, Imom Buxoriy majmuasi atrofidagi joylashtirish vositalarining eng yirigi, shu bilan birga, ilk besh yulduzli mehmonxona hisoblanadi. Mehmonxonada zamonaviy xizmat ko‘rsatish tizimi yo‘lga qo‘yilib, xalqaro mehmonxona standartlari milliy mehmondo‘stlik an’analari va ziyoratgoh odobi bilan uyg‘unlashtirilgan.
Tadbir doirasida Samarqand viloyat hokimi Adiz Boboyev hamda Indoneziya Haj va Umra vaziri Muhammad Irfan Yusuf o‘rtasida uchrashuv bo‘lib o‘tdi. Uchrashuvda indoneziyalik ziyoratchilarni Samarqandga keng jalb qilish, “Umra+” dasturi asosida maxsus avia qatnovlarni yo‘lga qo‘yish va boshqa masalalar muhokama qilindi.
Bundan avval majmua hududida barpo etilgan mehmonxonalardan biri indoneziyalik tadbirkor tomonidan sotib olinib, ushbu davlatdan keladigan ziyoratchilarni qabul qilish uchun imkoniyatlar yaratilgan edi.
O‘zbekiston musulmonlari idorasi Matbuot xizmati
