Qur'onda zikr qilingan ranglar
Sariq rang. Bu Qur'oni karimda birinchi zikr qilingan rang bo'lib, besh o'rinda uchraydi:
«(Muso) dedi: “U aytmoqdaki, u yarqiroq, sarg'ish rangli sigir bo'lib, ko'rganlarni quvontirur”»(Baqara surasi, 69-oyat).
Bu oyatda sariq rang ko'zni quvontiradigan deb xabar berilmoqda.
«Bordi-yu, shamolni yuborsak va uni (ekinni qurib) sarg'aygan holda ko'rsalar, ...»(Rum surasi, 51-oyat).
Bu erda sariq rang buzilish, emirilish ma'nolarini ifoda etmoqda.
«(U) bamisoli bir yomg'irki, uning (sababidan unib chiqqan) giyoh kofirlarni taajjubga solur. So'ngra u qurigach, uni sarg'aygan holda ko'rasiz. So'ngra u o'tin bo'lib qolur...»(Hadid surasi, 20-oyat).
Bu erda ham tutash, qurish-qovjirash ma'nolarida kelmoqda.
Oq rang. Bu rang Qur'oni karimda o'n ikki marta zikr qilingan.
«Shuningdek, tonggacha, ya'ni oq ipning qora ipdan (tongning tundan) ajraladigan vaqtigacha eb-ichaveringiz...»(Baqara surasi, 187-oyat).
Oyatdagi oq rang yorug'lik, tong otishini ifodalab kelgan.
«Yuzlari oqargan zotlar esa Allohning rahmatida (jannatida)dirlar. Ular u erda abadiy qoluvchilardir»(Oli Imron surasi, 107-oyat).
Oq rang jannat ahliga xos bo'lgan belgi-alomatdir.
«Keyin ulardan yuz o'girib: “Esizgina Yusuf!” dedi. G'am-g'ussadan uning ko'zlari oqarib (ojiz bo'lib) qoldi va u endi mahzundir»(Yusuf surasi, 84-oyat).
Bu o'rinda esa, oq rang dard-illat ma'nosida ifodalangan.
«Qo'lini (qo'ynidan) chiqargan edi, birdan u qarab turganlarga oppoq (nurli) ko'rindi»(A'rof surasi, 108-oyat).
Bu erda oqlik Muso alayhissalomning mo''jizalarini tasvirlab bermoqda.
«Alloh osmondan suv (yomg'ir, qor) yog'dirib, u bilan ranglari turli bo'lgan mevalarni chiqarganimizni ko'rmadingizmi?! Yana tog'larning oq, qizil, rang-barang yo'l(lisi) ham, tim qorasi ham bordir»(Fotir surasi, 27-oyat).
«Oppoq va (may to'la qadahlar) ichuvchilar uchun lazzatlidir»(Soffot surasi, 46-oyat).
Qora rang. U Qur'oni karimda sakkiz marta zikr qilingan:
«Shuningdek, tonggacha, ya'ni oq ipning qora ipdan (tongning tundan) ajraladigan vaqtigacha eb-ichaveringiz...»(Baqara surasi, 187-oyat).
«Ba'zi yuzlar oqaradigan va ba'zi yuzlar qorayadigan kunni (qiyomatni) eslang: yuzi qorayganlarga (hujjat isboti uchun shunday deyilur): “Iymon keltirgandan keyin yana kufrga qaytgan edingizmi? Kufringiz tufayli mana shu azoblarni totib ko'ring, endi!”»(Oli Imron surasi, 106-oyat).
«Qaysi birlariga qiz (ko'rgani haqida) xushxabar berilsa, g'azabi kelib, yuzlari qorayib ketadi»(Nahl surasi, 58-oyat).
«So'ngra uni qoramtir xazon qilib qo'ygan zotdir»(A'lo surasi, 5-oyat).
«Yana tog'larning oq, qizil, rang-barang yo'l(lisi) ham, tim qorasi ham bordir»(Fotir surasi, 27-oyat).
Yashil rang. Bu ham Qur'oni karimning sakkiz o'rnida keladi:
«Shoh (bir kuni) dedi: “Men tushimda ettita ozg'in sigir ettita semiz sigirni eyayotganini va ettita yashil boshoq bilan birga boshqa (ettita) qurigan boshoqlarni ko'rdim. Ey a'yonlar! Agar tush ta'birini aytuvchi bo'lsangiz, tushim to'g'risida fatvo (javob) beringiz!”»(Yusuf surasi, 43-oyat).
«Ustilarida yashil ipak va shoyi liboslar bo'lib, ular kumush bilakuzuklar bilan bezangan bo'lurlar va Parvardigorlari ularga pok sharob ichirur»(Inson surasi, 21-oyat).
«(Jannat ahli) yashil yostiqlar va go'zal gilamlar uzra yastangan hollarida (o'tirurlar)»(Ar-Rohman surasi, 76-oyat).
Ko'k rang. U Qur'oni karimda bir marta zikr qilingan:
«(U) sur chalinadigan kundir. U kunda Biz jinoyatchilarni ko'zlari (qo'rquvdan) ko'k (nursiz) bo'lib qolgan hollarida yig'urmiz»(Toho surasi, 102-oyat).
Qizil rang. Bir marta zikr qilingan:
«Alloh osmondan suv (yomg'ir, qor) yog'dirib, u bilan ranglari turli bo'lgan mevalarni chiqarganimizni ko'rmadingizmi?! Yana tog'larning oq, qizil, rang-barang yo'l(lisi) ham, tim qorasi ham bordir»(Fotir surasi, 27-oyat).
Pushti rang. Bir marta zikr qilingan:
«Bas, qachonki, (qiyomat qoyim bo'lgach) osmonlar yorilib (jahannam haroratidan) yog'ning durdasi kabi bo'lur (qizarib qolur)»(Ar-Rohman surasi, 37-oyat).
To'q yashil rang. Uning zikri Qur'oni karimda bir marta keladi:
«Ikkisi (sersuv va sersoyalikdan) to'q yashildirlar»(Ar-Rohman surasi, 64-oyat).
Olimjon OBIDJONOV,
Quvasoy shahar “Islom” jome
masjidi imom noibi
Banklar va mikromoliya tashkilotlari o‘z faoliyatini islomiy bank faoliyatiga o‘zgartirishi mumkin
Adliya vazirligi Mikromoliya tashkiloti va bank faoliyatini o‘zgartirish tartibi to‘g‘risidagi nizomga o‘zgartirish va qo‘shimchalarni davlat ro‘yxatidan o‘tkazdi (ro‘yxat raqami 3656-1, 01.08.2026 y.), xabar bermoqda huquqiyaxborot Telegram kanali.
Mazkur idoraviy hujjat "O‘zbekiston Respublikasining ayrim qonun hujjatlariga O‘zbekistonda islomiy bank faoliyatini joriy etishga qaratilgan qo‘shimcha va o‘zgartirishlar kiritish to‘g‘risida" 2026 yil 27 martdagi O‘RQ–1126-son Qonunga muvofiq ayrim kredit tashkilotlari faoliyatini o‘zgartirishning quyidagi tartib-taomillarini belgilaydi:
- mikromoliya tashkilotini faqat islomiy bank faoliyatini amalga oshiruvchi mikromoliya bankiga o‘zgartirish;
- faqat islomiy bank faoliyatini amalga oshiruvchi mikromoliya bankini faqat islomiy bank faoliyatini amalga oshiruvchi bankka o‘zgartirish;
- faqat islomiy bank faoliyatini amalga oshiruvchi bankni faqat islomiy bank faoliyatini amalga oshiruvchi mikromoliya bankiga o‘zgartirish;
- faqat islomiy bank faoliyatini amalga oshiruvchi mikromoliya bankini mikromoliya tashkilotiga o‘zgartirish;
- bankni faqat islomiy bank faoliyatini amalga oshiruvchi bankka o‘zgartirish.
Shuningdek, o‘z faoliyatini faqat islomiy bank faoliyatini amalga oshiruvchi bankka o‘zgartirishga faqat islomiy bank faoliyatini amalga oshiruvchi mikromoliya banki haqli.
Mikromoliya bankini davlat ro‘yxatidan o‘tkazish va bank faoliyatiga doir tegishli litsenziya (litsenziyalar) olish uchun nogironligi bo‘lgan shaxslar uchun mikromoliya banki binolarida shaharsozlik normalari va qoidalarida belgilangan talablarga muvofiq qulay shart-sharoitlar yaratilganligi bo‘yicha Qurilish va uy-joy kommunal xo‘jaligi sohasida nazorat qilish inspeksiyasining xulosasi mavjud bo‘lishi kerak.
Tashabbus Fors ko‘rfazi mamlakatlaridan investitsiyalarni jalb qilishga qaratilgan bo‘lib, dastlabki hisob-kitoblarga ko‘ra, ushbu chora-tadbirlarni amalga oshirish iqtisodiyotga depozitlar va to‘g‘ridan to‘g‘ri investitsiyalar ko‘rinishida taxminan 1 milliard dollar jalb qilishi mumkin. Mutaxassislarning prognozlariga ko‘ra, 2035 yilga borib O‘zbekiston ushbu tizim ishga tushirilgandan beri dunyoda islom moliyasining eng tez o‘sishini namoyish etadi.
O‘zbekiston musulmonlari idorasi Matbuot xizmati
