“Saharlik qilinglar! Saharlikda baraka bordir”
Rasululloh sollallohu alayhi vasallam: “Saharlik qilinglar! Albatta, saharlik qilishda baraka bordir”, dedilar (Imom Nasoiy rivoyati).
Ushbu hadisda ro‘zador saharlik qilishga targ‘ib qilinadi. Chunki saharlik qilishda ko‘plab yaxshiliklar hamda diniy va dunyoviy buyuk barakalar bor. Demak, saharlik qilish fazilat, vojib emas. Agar vojib bo‘lganida edi Payg‘ambarimiz sollallohu alayhi vasallam va ba’zi sahobalar o‘tar ro‘za tutmagan bo‘lar edilar.
Endi quyida yuqoridagi hadisdan kelib chiqib, saharlikdagi foydalarning bir nechtasini keltirib o‘tamiz:
- Saharlik qilish bilan ibodatni taqvo ila ado qilish bor. Chunik go‘yo saharlik qilish ila kunduzgi Qur’on qiroati, namozlar va zikrlarni ado qilish uchun Alloh taolodan yordam so‘rashlik bor. Zero, qorni och inson ibodatlarni qilish uchun kuchi yetmay, dangasalikka yo‘l qo‘yishi mumkin.
- Saharlik qilish bilan ochlik sababli sodir bo‘ladigan gunoh ishlardan o‘zini saqlab qoladi.
- Saharlik qilish bilan ro‘za tutishni yengil sanab hatto, yana ko‘proq ro‘za tutish rag‘bati paydo bo‘ladi. Natijada ro‘za tutish kishi uchun oson ishga aylanadi.
- Saharlik qilish bilan Payg‘ambarimiz sollallohu alayhi vasallamning sunnatlariga ergashish bor. Agar sunnat deya niyat qilib, saharlik qilsa, ajrga ham ega bo‘ladi. Biroq, qornini to‘ydirish va quvvatga ega bo‘lish maqsadida bo‘lsa, o‘sha maqsadiga erishadi.
- Saharlik sababli tahajjud namozini hamda duo va zikr qilish uchun eng xayrli vaqt bo‘lmish kechaning oxirida uyqudan uyg‘onadi.
- Saharlik qilish bilan ahli kitoblarga xilof qilish bor. Zotan, dinimizda ularga o‘xshashdan qaytarilganmiz. Hadisda Payg‘ambarimiz sollallohu alayhi vasallam: “Biz bilan ahli kitoblarning ro‘zasidagi farq, saharlik yeyishdadir”, dedilar.
- Saharlikka turish bilan bomdod namozini jamoat bo‘lib o‘qishga muyassar bo‘ladi. Shuning uchun ham ramazon oyida boshqa oylarga nisbatan bomdod namozida odamlar ko‘payadilar.
Shuningdek, saharlik qilishda bir qancha manfaatlar bor. Ba’zilari oshkor bo‘lgan va ba’zilari hali oshkor bo‘lmagan. Nima bo‘lganda ham haqiqiy mo‘min Payg‘ambarimiz sollallohu alayhi vasallamga nisbatan muhabbati bor ekan, u zotning aytganlaridan manfaat topadimi yoki yo‘qmi, ergashishda davom etaveradi. Alloh taolo barchamizni sevikli Payg‘ambarimiz sollallohu alayhi vasallamning sunnatlariga ergashishni oson qilsin.
Yahyo ABDURAHMANOV,
“Shayx Zayniddin” jome masjidi imom-xatibi.
Janubiy Koreyaning nufuzli telekanali O‘zbekistonning sayyohlik salohiyatini keng yoritdi
O‘zbekiston sayyohlik salohiyatini Janubiy Koreyada keng targ‘ib etish maqsadida nufuzli “EBS” telekanali tomonidan mamlakatimiz turizm imkoniyatlariga bag‘ishlangan maxsus teledastur efirga uzatildi, deb xabar bermoqda “Dunyo” AA.
Sayyohlar orasida katta auditoriyaga ega bo‘lgan “Buyuk Ipak yo‘li bo‘ylab sayohat” teledasturi orqali janubiy koreyalik tomoshabinlarga O‘zbekistonning ekoturizm, gastronomik, ziyorat, tog‘ va landshaft turizmi borasidagi imkoniyatlari haqida keng ma’lumot berildi.
O‘zbekistonga tashrif buyurgan “EBS” telekanali ijodiy guruhi mamlakatimizning mashhur sayyohlik yo‘nalishlari, YUNЕSKOning Butunjahon merosi ro‘yxatiga kiritilgan Samarqand, Buxoro, Xiva va Toshkent shaharlarining qadimiy me’moriy yodgorliklari, turli hududlardagi zamonaviy ko‘ngilochar markazlar, milliy hunarmandchilik, o‘zbek milliy taomlari hamda yurtimizning betakror tabiat manzaralari haqida hikoya qildi.
Ko‘rsatuvda janubiy koreyalik sayyohlar uchun O‘zbekiston bo‘ylab sayohat qilishning afzalliklari ham keng yoritildi. Xususan, bugungi kunda Toshkentdan mamlakatimizning tarixiy shaharlariga zamonaviy va qulay “Afrosiyob” tezyurar poyezdi orqali Ipak yo‘li yo‘nalishlari bo‘ylab sayohat qilish mumkinligi ta’kidlandi.
“EBS” telekanali muxbiri Toshkentning o‘ziga xos me’moriy qiyofasiga alohida e’tibor qaratgan. Uning fikricha, poytaxt me’morchiligida o‘rta asrlarga oid tarixiy obidalar, zamonaviy ko‘p qavatli binolar va sobiq ittifoq davri me’morchiligi an’analari o‘ziga xos uyg‘unlik kasb etgan.
Dasturda O‘zbekiston bo‘ylab sayohat qilish imkoniyatlari haqida so‘z yuritilar ekan, mamlakat poytaxtidan tarixiy shaharlarga avtomobil yo‘llari bilan bir qatorda temir yo‘l orqali ham qulay safar qilish mumkinligi ma’lum qilingan.
“Yilning barcha faslida ertalab va kechqurun Toshkentning bosh vokzalidan Buxoro va Samarqand yo‘nalishida qulay tezyurar “Afrosiyob” poyezdlari qatnaydi. Maksimal tezligi 230 km/soat bo‘lgan ushbu poyezd Toshkentdan Buxorogacha bo‘lgan qariyb 600 kilometrlik masofani uch soatu 40 daqiqada bosib o‘tadi. Bu aviaparvozga nisbatan qulay va arzonroq”, – deya qayd etilgan teledasturda.
Ko‘rsatuvda Samarqand va Buxoro shaharlari Markaziy Osiyoning muhim madaniy durdonalari sifatida e’tirof etilgan.
“Buxoro shahri 2500 yildan ortiq tarixga ega. Eski shahar markazida Buxoroning eng diqqatga sazovor yodgorliklaridan biri – 1127 yilda qurilgan Minorai Kalon joylashgan. Uning balandligi 47 metr, poydevori esa 10 metrni tashkil etadi”, – deya ma’lumot beriladi manbada.
Samarqand haqida so‘z yuritilar ekan, uning 2750 yillik tarixga ega ekani, dunyodagi eng qadimiy shaharlardan biri sifatida asrlar davomida turli bosqinlar va vayronagarchiliklarga guvoh bo‘lganiga qaramay, o‘zining betakror va ertaknamo ulug‘vorligini saqlab qolgani ta’kidlangan.
Teledasturning yana bir muhim jihati – unda O‘zbekistonning qadimiy shaharlaridagi tarixiy va me’moriy obidalar bilan bir qatorda, milliy hunarmandchilik, urf-odatlar, milliy taomlar hamda mamlakatning turli hududlaridagi go‘zal tabiat manzaralari haqida batafsil ma’lumot berilganidir.
Ko‘rsatuvda O‘zbekistonning mehmondo‘stligiga ham alohida urg‘u berilgan.
“Sayyoh sifatida qayerga bormang, xoh mehmon uylarida, xoh bozorlar yoki shunchaki ko‘chada mahalliy aholi bilan uchrashsangiz, samimiy mehmondo‘stlik va iliqlikni his qilasiz”, – deydi “EBS” telekanali ijodiy guruhi.
Umuman, Janubiy Koreyaning yetakchi telekanallaridan biri bo‘lgan “EBS” orqali O‘zbekistonning boy tarixiy-madaniy merosi, betakror tabiati, milliy taomlari, mehmondo‘stligi va zamonaviy turizm infratuzilmasi keng auditoriyaga namoyish etilgani mamlakatimizning ushbu davlat sayyohlik bozoridagi jozibadorligini yanada oshirishga xizmat qiladi.
O‘zbekiston musulmonlari idorasi Matbuot xizmati
