Bugun, 1 may kuni ertalab Sirdaryo viloyatida joylashgan “Sardoba” suv ombori dambasining devorida suv chiqishi yuzaga kelgan. Natijada Sardoba tumani Qo‘rg‘ontepa aholi yashash punktiga suv kirgan. Bu haqda Favqulodda vaziyatlar vazirligi xabar berdi.
Qayd etish joizki, mutasaddi tashkilotlar bilan hamkorlikda suv omborining atrofidagi qator aholi yashash punktlari Mirzaobod tumaniga evakuatsiya qilindi. Ushbu voqea joyiga tegishli tashkilotlar rahbarlari yetib borib, favqulodda vaziyat oqibatlarini bartaraf yetish bo‘yicha ishlarni boshlab yuborilgan. Asosan, suv ekin maydonlariga zarar yetkazgani ma’lum bo‘ldi.
O‘z navbatida, O‘zbekiston musulmonlari idorasi rahbariyati ham ushbu noxush voqeaning salbiy oqibatlaridan Alloh taolodan panoh so‘rash yuzasidan xayriya ishlarini boshlab yubordilar.
Islom dini manbalarida har bir holat uchun – yaxshi-yomon kunlar, xursandchilik-musibatli damlarda o‘ziga xos duolarni o‘qish haqida bayon etilgan. Shunday duolarni qilish murodu maqsadga yetish, talofatlardan omon saqlanishga katta vasila bo‘lgani bir necha bor o‘z tasdig‘ini topgan.
Shu maqsadda, bugun O‘zbekiston musulmonlari idorasi raisi, muftiy Usmonxon Alimov hazratlari boshchiliklarida Toshkent viloyatidagi “Zangiota” majmuasida mazkur noxush hodisa salbiy oqibatlarini Yaratgan Parvardigordan bartaraf etishini so‘rash maqsadida, Qur’oni karim oyatlari tilovat qilinib, muborak Ramazon kunlarida Alloh taolodan xalqimizga tinchlik-osoyishtalik, yurtimizni turli balo-ofatlardan asrashini tilab duo qilindi. Shuningdek, xayriya tadbiri doirasida bir bosh qora mol so‘yilib, kam ta’minlangan oilalar, yordamga muhtoj kishilar, yetim-yesirlar va duosi mustajob insonlarga tarqatildi.
Ushbu hodisaga nisbatan sabrli bo‘lish, Allohga istig‘for aytib, buning salbiy oqibatlari kam bo‘lishini iltijo qilib so‘rash lozim. Alloh taoloning irodasi ila yetgan holatlarga sabr qilib, Undan savob umidida duo qilish lozim. Qur’oni karimda: “Albatta, Alloh sabrlilar bilan birgadir”, deya marhamat qilingan. Yana bir oyati karimada: “Albatta, har bir qiyinchilik bilan birga yengillik bordir”, deya tasalli beruvchi xabarlar ham kelgan.
Ayni vaqtlarda Hukumatimiz rahbariyati, Favqulodda vaziyatlar vazirligi hamda Ichki ishlar boshqarmalari, Milliy gvardiya va boshqa tegishli tashkilotlar favqulodda vaziyatlar oqibatlarini bartaraf yetish bo‘yicha ishlarni jadal olib bormoqdalar.
Bunday tezkor va amaliy amaliy sa’y-harakatlar har bir inson, har bir oila, har qanday vaziyatda yolg‘iz qolmasligi, balki davlatimiz diqqat-e’tiborida ekanini yaqqol ifoda etadi.
Haq taolodan ushbu noxush voqeaning salbiy oqibatlaridan panoh so‘rab, Yaratgan Parvardigordan aholi yashash joylari, ijtimoiy binolar va dehqonchilik ekinlarini bus-butun saqlashini iltijo qilib so‘raymiz.

O‘zbekiston musulmonlari idorasi Matbuot xizmati