Ramazon oyining 15 kechasi osmondan ovoz keladimi...?
Shu kunlarda ijtimoiy tarmoqlarda Rosululloh sollallohu alayhi vasallamning nomlaridan yana bir yolg‘on xabar tarqab qoldi. Emishki, bir yil keladiki, unda musulmonlarga zarar bo‘ladi, bu oyda Ramazonning birinchi kuni juma kuniga to‘g‘ri keladi, ro‘zaning o‘n beshinchi kunida osmondan qattiq ovoz keladi, ovozni eshitganlar darhol eshik derazalarni mahkam yopib, sajdaga yiqilinglar va sajdada “Subhanal Quddus, Robbuna Quddus”, deb aytinglar, shunda najot topasizlar. Yana ikkita ovoz keladi. Ularning birinchisi Jabroil alayhissalomning ovozi va ikkinchisi shaytonlarning ovozi. Ushbu paytda uydan chiqmay o‘tiringlar va hokazolar....
Bundan ilgari esa Ramazonning kelishi haqidagi xo‘shxabarni kishilarga yetkazgan kishiga do‘zax xarom qilinadi degan xabar tarqagan edi.
Bu kabi xabarlarni eshitib, ularni tezlik bilan tarqalayotgani, kishilarning bu kabi yolg‘on xabarlarga ishonishlarini ko‘rib achinasan kishi. Aslida bularning barchasi ilmsizlik va ahmoqlikdan boshqa narsa emas. Chunki, ilmdan, hadisi shariflardan, Rosululloh sollallohu alayhi vasallamning hadis aytishdagi uslublaridan ozgina xabari bor kishi bu kabi hadislarning g‘irt to‘qima, mantiqqa to‘g‘ri kelmaydigan gap so‘zlardan iborat ekanligini yaxshi biladi.
Azizlar! Ko‘zingizni oching. Asossiz va to‘qima gaplarga ishonmang. Boshqalarga tarqatmang. Rosululloh solallohu alayhi vasallam nomlaridan to‘qilgan soxta hadislarni avj olishiga sherik bo‘lmang. Islom dushmanlari tarafidan o‘ylab topilgan bu kabi xabarlarni ovoza qilish bilan ularning gunohiga sherik bo‘lmang. Bir xabarga ishonishdan oldin, uni o‘zgalarga yuborishdan ilgari shu sohaning mutaxasislaridan maslahat oling. Chunki bu Alloh taoloning qat’iy buyrug‘idir. “Agar bilmasangiz, zikr ahllaridan so‘rang” (Anbiyo surasi, 7-oyat). “Ey iymon keltirganlar! agar fosiq xabar keltirsa uni aniqlab ko‘ringlar..." (Xujurot surasi, 6-oyat).
Qolaversa, Islom dinida yolg‘on so‘zlash gunohi og‘ir bo‘lgan amallardan hisoblanadi. Agar bu yolg‘on Rosululloh solallohu alayhi vasallamning nomlaridan to‘qilgan bo‘lsa, azobi yanada og‘ir bo‘ladi. Anas roziyallohu anhudan rivoyat qilinadi: «Mening sizlarga ko‘p hadis aytishimni man qiladigan narsa Nabiy sollallohu alayhi vasallamning: «Kim menga qasddan yolg‘on to‘qisa, do‘zaxdagi o‘rindig‘ini olaversin», deganlaridir», dedi». (To‘rtovlari rivoyat qilganlar). Imom Muslimning rivoyatida: «Albatta, menga yolg‘on to‘qish boshqa birovga yolg‘on to‘qishdek emas. Kim menga qasddan yolg‘on to‘qisa, do‘zaxdagi o‘rindig‘ini olaversin», deyilgan.
Boshimizga tushgan bu musibatdan, atrofda bo‘layotgan voqea hodisalardan o‘z maqsadlari yo‘lida foydalanib, musulmonlar qalbiga qo‘rquv, sarosima va vahima solayotgan nobakorlarning nayrangiga uchib qolmang.
Undan ko‘ra Qur’oni karimda kelgan duolarni, sahih hadislarda kelgan ko‘rsatmalar, duo va istig‘forlarni ko‘paytirishlik bilan Robbimizdan najot va yengillik so‘raylik.Zero unutmaylikki, Ramazon oyi kirishi bilan Allohning rahmat, mag‘firat eshiklari ochiladi. Shunday ulug‘ kunlarda dinimiz aqiydasiga zid narsalarni tarqatish gunohi kabiradir. Alloh barchamizni ikki dunyo saodatiga erishtirsin.
O‘zbekiston Musulmonlari idorasining
Toshkent shahar vakilligi matbuot xizmati
Indoneziya haj va umra asossiatsiyalari delegatsiyasi yurtimizda
Bugun, 25 iyun kuni Indoneziya haj va umra asossiatsiyalarining doktor Muslim Iskandar boshchiligidagi vakillari O‘zbekiston musulmonlari idorasida bo‘lishdi. Mehmonlar bilan diniy idora raisining birinchi o‘rinbosari Homidjon domla Ishmatbekov uchrashuv o‘tkazdi.
Sakkiz nafar delegatsiya a’zolari: Doktor Muslim Iskandar, Asip Bisma Supriatna, Zaid Muslim Iskandar, Mustain Xattob, Muhammad Atsir Abdulaziz, Jannatul Ma’vo, Muhammad Iqbol hamda Hilman Parifiy birma-bir o‘zlarini tanishtirib, “Umra +” loyihasini o‘rganish maqsadida 3400 ta turfirma nomidan vakil bo‘lib kelishganini bildirishdi.
Uchrashuv avvalida Homidjon domla mehmonlarni tashrif bilan qutlab, kelganlari uchun minnatdorlik bildirdi. So‘nggi yillarda yurtimizda diniy-ma’rifiy, turizm va boshqa sohalarda bo‘layotgan yangilanishlar haqida aytib o‘tdi. Xususan, 2017 yilda tamal toshi qo‘yilgan Islom sivilaziyasi markazi, qayta bunyod etilayotgan Imom Buxoriy majmuasi, Hazrati Imom dahasida olib borilayotgan bunyodkorlik ishlariga to‘xtaldi.
O‘z navbatida delegatsiya rahbari Muslim Iskandar ularga bu taklifni bildirgan “Real Dreams” sayyohlik firmasidan minnatdor ekanliklarini aytib, O‘zbekiston haqida juda ham ijobiy taassurotlarda ekanini ta’kidladi. Birgina Toshkent shahridagi o‘rganishlari natijasida O‘zbekistonda ziyorat turizmi sohasi istiqbolli ekani, hali Samarqand, Buxoro, Xiva kabi qadim va navqiron shaharlarni ham borib ko‘rishlarini, lekin hozirdanoq “Umra +” loyihasi juda istiqbolli ekaniga amin bo‘lganini bayon etdi.
Delegatsiya a’zosi, “Kasturi” birlashmasi rahbari Muhammad Atir 2017 yilda ham O‘zbekistonga kelganini, o‘sha payt bilan oradan o‘tgan qisqa vaqtdagi ulkan o‘zgarishlardan hayratda ekanini aytib, bu ishlar yurtning allamolariga, ilmiy-ma’rifiy merosga bo‘lgan e’tiboridan darak ekaniga urg‘u berib o‘tdi.
Shuningdek, delegatsiyaning boshqa a’zolari – Indoneziyaning “Amphuri”, “Hagatama”, “NRA Group Ltd.” “Jannatul Ma’wah”, “Himpuh” kabi minglab turfirmalarni birlashtirgan asossiatsiyalari rahbarlari ham musulmon sayyohlar e’tibori va oqimini O‘zbekistonga bemalol yo‘naltirish mumkinligini, bu xayrli ish ikki davlat uchun ham har tomonlama manfaat keltirishini ta’kidlashdi.
O‘zbekiston musulmonlari idorasi
Matbuot xizmati
