“Ramazonni qanday o‘tkazyapsiz?”
Allohga behisob shukrlar bo‘lsinki, yurtimizga o‘z tarovati va barokati ila yana mohi ramazon tashrif buyurdi. Bu oy savobli ishlarimizni ko‘paytirib, nafsimizni taftish qilib, xulqimizni Qur’onga muvofiq sayqallash damlaridir. Zotan, bu sanoqli kunlar g‘animatdir.
Bu haqda Alloh taolo O‘z Kalomi Qur’oni karimning Baqara surasi, 185 oyatida shunday marhamat qiladi:
“(U sanoqli kunlar) Ramazon oyidirki, bu oyda odamlar uchun hidoyat bo‘lib va hidoyat va furqon (haq bilan botilni, halol bilan haromni ajratuvchi) ning ochiq oyatlari bo‘lib, Qur’on nozil kilingan”.
Biz esa ushbu oyni vatandoshlarimiz qanday o‘tkazayotganligi va nechog‘lik foyda olayotganligi bilan yaqindan tanishish maqsadida yangi rukn boshladik. Mazkur ruknda siz ham ishtirok etishingiz mumkin.
Ramazonni qanday o‘tkazayotganinggizni bizga yozib yuboring. Biz uni MUSLIM.UZ sayti orqali dunyoga havola etamiz.
Quyida ilk hikoyamizni sizlarga taqdim etamiz.
Bozorxon bobo Alimov. Surxondaryo viloyati, Muzrabot tumanidan.
“Bu yilgi Ramazon oyi avvalgi yildagilarga nisbatan biroz o‘zgacha holda tashrif buyurdi. Avvalo, kun davomida uyda ekanligim ko‘proq kitob mutolaa qilishga hamda oilam bilan vaqt o‘tkazishga fursatdir.
Saharlikdan so‘ng farzandlarimga hurmatli muftiy hazratlari Shayx Usmonxon Temurxon o‘g‘lining “Tafsiri Irfon” kitoblarini o‘qib beryapman. Alloh rozi bo‘lsin Qur’oni karimni nihoyatda ajoyib tafsir qilibdilar.
Kun davomida nevaralarimga qo‘ldan kelgancha Qur’ondan kichik suralarni o‘rgataman, Shayx Muhammad Sodiq Muhammad Yusuf hazratlarining audio ma’ruzalarni birgalikda eshitamiz. Shu bilan iftorlik vaqti bo‘lib qoladi. Yana bir quvonchli jihati, oila a’zolarim bilan birgalikda taroveh namozini ado etayotganimizdir. Bugungi sinovli kunlarning hikmatlaridan biridir ehtimol.
Barcha vatandoshlarimizga mohi Ramazon muborak! Yurtimiz tinch, osuda va farovon bo‘lsin. Sinovli kunlarni Alloh taoloning o‘zi tez fursatda Yer yuzidan ko‘tarsin”.
Suhbatni Saidabror Umarov yozib oldi
«Asrlarni birlashtiruvchi meros»: mediaforumda Qur’on, qo‘lyozmalar va sun’iy intellektga oid loyihalar taqdim etiladi
«Islom sivilizatsiyasi: yangi nigoh — yangi kashfiyotlar» Xalqaro mediaforumining uchinchi yalpi sessiyasi 26 avgust kuni «Asrlarni birlashtiruvchi meros. Islom sivilizatsiyasining ma’naviy mazmun-mohiyati» mavzusida bo‘lib o‘tmoqda. Sessiyada Qur’on merosi, qadimiy qo‘lyozmalar, xattotlik, hujjatli kino hamda tarixiy manbalarni o‘rganishda sun’iy intellektdan foydalanish masalalari o‘rin olgan, xabar bermoqda iccu.uz.
Asosiy loyihalardan biri — «114 Qur’on: islom olami xattotligining 114 durdonasi» bo‘ladi. Uni Mueller & Schindler nashriyot uyi vitse-prezidenti Aleksandr Vilgelm taqdim etdi. Shuningdek, sessiyada «Katta Langar Qur’oni: haqiqat va afsonalar» xalqaro loyihasi taqdimoti bo‘lib o‘tdi. Uni Islom sivilizatsiyasi markazi ilmiy kotibi Rustam Jabborov taqdim qildi.
Sankt-Peterburg hujjatli filmlar studiyasi bosh direktori Aleksey Telnov «Yagona tarixiy meros sahifalari» loyihasi doirasida yaratilgan «Masjid» filmining treylerini namoyish etdi. Islomshunos va madaniyat arbobi Ketlin Gyobel ishtirokchilarni «Allohning 99 ismi: Uning go‘zal ismlari orqali Yaratganni anglash» noshirlik loyihasi bilan tanishtirdi.
Alohida blok yangi texnologiyalarga bag‘ishlanadi. Sberbank Istiqbolli texnologiyalarni rivojlantirish boshqarmasi ijrochi direktori Vladimir Kox hamda Islom sivilizatsiyasi markazi professori, bosh ilmiy xodimi Zohidullo Munavvarov «Sun’iy intellekt — qadimiy qo‘lyozmalarni o‘qishning raqamli kaliti» loyihasini taqdim etadi. Dasturdan, shuningdek, «Payg‘ambarning fazilatlari» kitobi va «O‘zbekiston tarix xaritasida: imperiyalar, sivilizatsiyalar, davrlar» loyihasi ham o‘rin olgan.
Xalqaro munozara «Jaholatdan ma’rifat sari: stereotiplar va islomofobiyani bartaraf etishda medianing o‘rni» mavzusida o‘tkaziladi. Unda Islom hamkorlik tashkiloti, shuningdek, Jazoir, Ummon, Pokiston, Saudiya Arabistoni, Iroq, Mali va O‘zbekistonning davlat va xalqaro ommaviy axborot vositalari vakillari ishtirok etadi.
Bundan tashqari, O‘zbekiston Jurnalistlar uyushmasi raisi Shuhrat Orif «Jurnalistikada tarix va sun’iy intellekt: merosni onlayn makonda qanday saqlash mumkin?» loyihasini, Islom sivilizatsiyasi markazi media bo‘limi rahbari O‘ktam Usmanov esa «O‘zbekistonni dunyoga mashhur qilgan olimlar» kitobini taqdim etadi. Sessiya «Dunyo Qur’oni: xattotlik an’analaridan — kelajak merosi sari» taqdimoti bilan yakunlanadi. Islom sivilizatsiyasi markazi huzuridagi Xattotlik maktabi direktori Habibullo Solih turli mamlakatlar va islom xattotlik maktablari an’analarini birlashtiruvchi noyob Qur’onni yaratish bo‘yicha xattotlar o‘rtasidagi Jahon tanlovini e’lon qiladi.
Forumning asosiy maydoni O‘zbekistondagi Islom sivilizatsiyasi markazi bo‘ladi. Unda deyarli 50 mamlakatdan media va ekspertlar hamjamiyatining 300 nafar vakili — mediakompaniyalar, axborot agentliklari va telekanallar rahbarlari, jurnalistlar, prodyuserlar, olimlar hamda kreativ industriya mutaxassislari ishtirok etadi.
O‘zbekiston musulmonlari idorasi Matbuot xizmati
