Jannat eshiklari ochilmoqda
Yurtimiz uzra farahbaxsh Ramazon oyi o‘zining fayzu futuhi bilan kezmoqda. Munavvar tonglarda, muazzzam shomlarda qilinayotgan xayrli duolar diyorimizning mussaffo osmonidan rahmat, mag‘firat va baraka bo‘lib yog‘ilmoqda.
Qur’oni karimda batafsil bayon qilib bergan: “Ey, imon keltirganlar! Sizlardan oldingi (ummat)larga farz qilingani kabi sizlarga ham ro‘za tutish farz qilindi, shoyad (u sababli) taqvoli bo‘lsangiz” (Baqara surasi, 183-oyat).
Abu Hurayra raziyallohu anhudan rivoyat qilingan hadisi qudsiyda Rasululloh sallallohu alayhi vasallam shunday marhamat qiladilar: “Alloh taolo: “Odam bolasining hamma amali – o‘zi uchun, faqat ro‘za – Men uchundir va uning mukofotini Men O‘zim berurman”, dedi. Ro‘za – saqlovchidir. Qachon qaysi biringiz ro‘zador bo‘lsa, fahshdan gapirmasin va baqir-chaqir qilmasin. Agar birortasi u bilan so‘kishmoqchi bo‘lsa, “Men ro‘zadorman” desin. Muhammadning joni qo‘lida bo‘lgan Zot ila qasamki, albatta, ro‘zadorning og‘zining hidi Allohning nazdida mushkning hididan xushbo‘yroqdir. Ro‘zadorga ikki marta xursandchilik bor: biri – iftor vaqtida og‘zini ochganda va ikkinchisi – qiyomat kunida Robbisiga ro‘baro‘ bo‘lganda” (Imom Buxoriy va Imom Muslim rivoyat qilgan).
Muqaddas dinimizdagi barcha ibodatlarda bandalar Allohning oldida barobar turadi. Jumladan, ramazoni sharif ro‘zasini tutishda ham odamlar bir xil darajada ochlikni boshdan kechiradilar. Ularning oralaridan yo boy, yo mansabdor istisno qilinmaydi. Bu borada hamma barobar, kuchli va zaif, xos va ommaning farqi yo‘q. Imom G‘azzoliyning “Mukoshafatul qulub” asarida keltirilgan bir hadisi sharifda shunday marhamat qiladilar: “Mening ummatimga besh xislat berildi, bu avvalgilarga berilmagandi:
- Allohning nazdida ro‘zadorning og‘zidan mushkdan ham yaxshi hid keladi.
- Iftorgacha malaklar ro‘zador uchun istig‘for qiladilar.
- Bu oyda shaytonlar bog‘lanadi.
- 4.Alloh har kuni jannatni bezantiradi va “Solih bandalarim, qalblaridan yomonlik va javobgarlikni yo‘q qilish uchun shoshilinch harakat qilishyapti!” deb buyuradi.
- U, oyning so‘nggi kechasida ularni afv etadi.
Alloh taolo bu oyda qiladigan barcha ibodatu duolarimizni va tutadigan ro‘zalarimizni qabul aylasin. Bandachilik qilib bilib bilmay qilgan xatolarimizni mag‘firat aylasin.
“Ko‘kaldosh” o‘rta maxsus islom bilim yurti
Oybek Ma’rupov.
Toshkentda O‘zbekiston va Qatar hamkorligidagi nufuzli ilmiy konferensiya bo‘lib o‘tmoqda
Toshkent davlat sharqshunoslik universitetida Qatar Sivilizatsiyalar alyansi qo‘mitasi hamda Qatar universiteti hamkorligida “O‘zbekistonda islom madaniy merosi va uning jahon ilm-fanida tutgan o‘rni” mavzusida nufuzli xalqaro ilmiy-amaliy konferensiya bo‘lib o‘tmoqda.
Forum O‘zbekiston va Qatar o‘rtasidagi ilmiy-ma’rifiy aloqalarni mustahkamlash, diyorimizdan yetishib chiqqan buyuk mutafakkirlarning bebaho merosini chuqur tadqiq etish hamda uni xalqaro miqyosda keng targ‘ib etish maqsadida tashkil etildi. Unda xorijlik taniqli olimlar, yurtimiz diniy soha vakillari, tadqiqotchilar hamda soha mutaxassislari ishtirok etmoqda.
Xalqaro tadbirda O‘zbekiston musulmonlari idorasi raisining birinchi o‘rinbosari Homidjon domla Ishmatbekov, Din ishlari bo‘yicha qo‘mitaning birinchi o‘rinbosari Davronbek Maxsudov, Imom Buxoriy nomidagi Toshkent islom instituti rektori Uyg‘un G‘afurov hamda Imom Buxoriy xalqaro ilmiy-tadqiqot markazi direktori Shovosil Ziyodov qatnashmoqda va o‘z ma’ruzalari bilan ishtirok etmoqda.
Konferensiyada yurtimiz zaminida shakllangan ilmiy maktablarning jahon tamadduni rivojiga qo‘shgan beqiyos hissasi alohida e’tirof etilmoqda. Imom Buxoriy, Imom Moturidiy, Abu Ali ibn Sino singari buyuk allomalarimiz ilmiy merosining bugungi kundagi ahamiyati muhokama qilinmoqda.
Shuningdek, so‘nggi yillarda yurtimizda ma’naviy-ma’rifiy merosni tiklash borasida amalga oshirilayotgan keng ko‘lamli ishlar, jumladan, O‘zbekistondagi Islom sivilizatsiyasi markazi va Imom Buxoriy majmuasida yaratilgan zamonaviy sharoitlar tanishtirilib, xorijlik mutaxassislar o‘zaro hamkorlikka da’vat etilmoqda.
Ma’lumot o‘rnida, mazkur nufuzli xalqaro anjuman ishi 8–9 sentyabr kunlari ham davom etadi.
O‘zbekiston musulmonlari idorasi
Matbuot xizmati
