Ramazonga maktub
Alloh taologa beadad hamdu sanolar bo‘lsinki, bir necha oyga cho‘zilgan sog‘inch va ishtiyoqdan so‘ng nihoyat oylarning sultoni, ezgulik va xayr mavsumi, toatu ibodat fasli, saxovatu duo, tarovehu Qur’on oyi bo‘lmish muborak mohi Ramazon tarovating, fayzing va barakoting ila bizlarni hushnud etish, arafasida turibsan.
Ramazon, seni biz huddi yolg‘iz farzandi uzoq muddatga safarga ketib, qaytishini intizorlik bilan kutayotgan onadek, volidasini yo‘qotib qo‘yib uni intiqlik bilan qidirayotgan go‘dakdek sog‘inganmiz.
Ayniqsa, bugun butun dunyoni egallab, odamlarni vahimaga solgan “virus” senga bo‘lgan ishtiyoq va muhabbatimizni, intiqligimizni yanada oshirdi.
O‘tgan yillarda senga bera olmagan mehrim, senla topa olmagan qalb halovatim va sen sabab erisha olmagan Alloh taoloning rizosi va marhamatiga, bu gal jiddu jahd va muxabbat ila barchasiga muyassar bo‘lish uchun azmi qaror qildim.
Alloh taolo sen haqingda bizlarga Qur’oni karimning Baqara surasi, 185-oyatida shunday xushxabar berganlar: “Ramazon oyi – odamlar uchun hidoyat (manbai) va to‘g‘ri yo‘l hamda ajrim etuvchi hujjatlardan iborat Qur’on nozil qilingan oydir” (Baqara surasi, 185-oyat).
“Payg‘ambar sollallohu alayhi va sallam sen kelganingda sahobalariga xushxabar berib, aytardilar: “Sizga muborak Ramazon oyi keldi. Alloh sizga uning ro‘zasini tutishni farz qildi. Bu oyda jannat darvozalari ochilur, jahannam qopqalari yopilur, itoatsiz jin-shaytonlar zanjirband qilinur. Bu oyda bir kecha bo‘lib, u ming oydan yaxshiroqdir. Kim o‘sha kechaning yaxshiligidan mahrum bo‘lsa, ko‘p yaxshilikdan mahrum bo‘libdi”
«Rasululloh sollallohu alayhi va sallam yana dedilarki: «U (Ramazon)ning oxirgi kechasida ro‘zadorlarning gunohlari kechiriladi», dedilar. Ular: «Ey Allohning Rasuli, u Qadr kechasimi?», deb so‘rashdi. Rasululloh sollallohu alayhi vasallam: «Yo‘q, lekin ishchi ishini ado etganidan so‘ng ajri – haqi to‘la qilib beriladi»
Nabiy sollallohu alayhi vasallam sening fazilating haqida so‘zlab: «Ramazonda har kecha Allohning do‘zaxdan ozod qilinadigan bandalari bor», deganlar.
Ramazon sen o‘xshashi yo‘q, fazilatda tengsiz muborak oysan. Umrimning butun boshli yillarini sening bir lahzalik tarovehing, bir onlik kunduzing va soniyalik tuningga almashtirishga roziman.
Bilasanmi nima uchun seni yaxshi ko‘raman? Chunki sen Alloh taolo va Rasuliga mahbub, suyukli oysan. Alloh taoloning Kalomi ham aynan sening kunlaringda Nabiy alayhissalomga nozil bo‘lgan. Son-sanoqsiz mo‘minlar sening sharofating ila gunohlari kechirilib jahannamdan ozod bo‘lgan va jannatga kirgan. Sen sabab nochorlarga ko‘mak, ochlarga taom, yetimlarga muruvvat ko‘rsatiladi.Fazilating ila insonlar qalbiga hidoyat nuri, mehr-oqibat va yaxshilik urug‘i sochiladi. Ramazon seni yaxshi ko‘ramiz va seni biz mo‘minlarga tortiq qilgan Alloh taologa behad hamdu sano, seni qadrlagan va sevgan Rasuli Akram sallollohu alayhi vasallamga bexisob salovatu durudlar aytamiz.
Umid va niyat qilamizki sening fazilating sabab Alloh taolo balo-yu ofatlar, xastaliklar-u musibatlar, xususan ayni kunlardagi viruslarni insoniyat boshidan daf etib salomatlik va xotirjamlikni nasib etsin!
Sog‘inch va muhabbat bilan Saidabror Umarov
Anjuman diniy sohada zamoniy kadrlar tayyorlash yo‘lidagi muhim qadam bo‘ldi
Joriy yilning 19-20 avgust kunlari bo‘lib o‘tgan nufuzli anjuman diniy ta’lim tizimini sifat jihatidan yangi bosqichga olib chiqish, ilmiy-tadqiqot ishlari ko‘lamini kengaytirish va sohaga ilg‘or pedagogik yondashuvlarni tatbiq etish va zamon talabiga mos kadrlar tayyorlashda yo‘lidagi salmoqli amaliy qadam bo‘ldi.
Tadbirlar davomida sohaga oid ilmiy ma’ruzalar bilan bir qatorda Oliy Majlis Qonunchilik palatasi, Raqamli ta’lim va sun’iy intellektni rivojlantirish markazi hamda ilmiy-tadqiqot sohasining yetakchi mutaxassislari tomonidan ma’naviy-ma’rifiy taraqqiyot, diniy ta’limda raqamli transformatsiya, sun’iy intellekt va ilmmetriya masalalariga bag‘ishlangan mahorat darslari ham o‘tkazildi. Mashg‘ulotlar tizimda zamonaviy yondashuvlarni ommalashtirish, dars jarayonlarida yangicha uslublarni qo‘llash hamda soha vakillarining kasbiy mahoratini oshirishga xizmat qiladi.
Shuningdek, anjuman doirasida oliy va o‘rta maxsus diniy ta’lim muassasalari professor-o‘qituvchilarining muhtaram Prezidentimizga yo‘llagan Murojaatnomasi o‘qib eshittirildi.
Unda so‘nggi yillarda diniy-ma’rifiy sohani tubdan rivojlantirish, milliy va diniy qadriyatlarimizni tiklash hamda ulug‘ ajdodlarimizning boy ma’naviy merosini o‘rganish va diniy ta’limni rivojlantirish borasida olib borilayotgan tarixiy islohotlar alohida e’tirof etildi. Jumladan, Mir Arab oliy madrasasi, Hadis ilmi maktabi, Imom Termiziy islom instituti kabi diniy ta’lim maskanlari, Imom Buxoriy, Imom Termiziy, Imom Moturidiy va Bahouddin Naqshband kabi xalqaro ilmiy-tadqiqot markazlari tashkil etilishi yurtimizda ma’rifat ahli uchun keng imkoniyatlar ochgani ta’kidlandi.
O‘z navbatida, pedagoglar ushbu yuksak e’tibor va shart-sharoitlar uchun Davlatimiz Rahbariga minnatdorlik bildirib, bunga javoban yoshlarni Vatanga muhabbat va umuminsoniy qadriyatlarga hurmat ruhida tarbiyalash, Islom dinining asl insonparvarlik g‘oyalarini o‘zlashtirgan va sohada yetuk kadrlarni tayyorlashini ta’kidladilar.
Bo‘lib o‘tgan anjuman diniy ta’lim tizimini yangi bosqichga olib chiqish, innovatsion va raqamli texnologiyalarni o‘quv jarayoniga tatbiq etish hamda sohada yuqori malakali, zamon bilan hamnafas mutaxassislarni tayyorlashda muhim poydevor bo‘lib xizmat qiladi.
O‘zbekiston musulmonlari idorasi Matbuot xizmati