1-dars: ALIFBO
Ma’lumki, Qur’oni Karim Alloh taoloning Kalomidir! Uni o‘rganish va o‘rgatishning fazilati haqida hadislar vorid bo‘lgan. Usmon roziyallohu anhudan rivoyat qilinadi. Rasululloh sollallohu alayhi vasallam dedilar: “Sizlarning eng yaxshilaringiz Qur’onni o‘rganib, uni boshqalarga o‘rgatganingizdir” (Imom Buxoriy rivoyati).
Xalqimizning Qur’onni o‘rganishida va boshqalarga o‘rgatishida uzoq yillardan beri har birimizga tanish bo‘lgan "Muallimi soniy" kitobi boshlang‘ich qo‘llanma bo‘lib kelgan va kelmoqda.
Yurtimiz farzandi, Misrdagi Al-Azhar universitetida tahsil olgan, o‘n qiroat bo‘yicha ijoza sohibi Shayx Alijon qori hafizahulloh tomonidan mazkur "Muallimi soniy" kitobi asosida video qo‘llanma tayyorlandi. 27 yillik mehnat va izlanishlar mahsuli bo‘lgan ushbu qo‘llanma orqali biz Qur’oni Karim harflarini talaffuz qilish, so‘zlarni bir-biriga ulash, Qur’oni Karimdan qisqa suralarning tilovati kabi ko‘plab ilmlarni, inshaa Alloh, o‘rganib olamiz.
Shu kunlarda yurtimizda koronavirus tarqalishining oldini olish maqsadida karantin e’lon qilingan bo‘lib, barchamiz uyda, farzandlarimiz yonidamiz. Fursatdan foydalanib, O‘zbekiston Musulmonlari idorasining rasmiy Muslim.uz sayti orqali "Muallimi soniy" video qo‘llanmasining boshidan darslar berib borish yo‘lga qo‘yildi.
Ushbu darslik farzand tarbiyasi, Qur’on ta’limi bilan mashg‘ul bo‘lgan ota-onalar va barcha Qur’onsevar xalqimizga manfaatli bo‘lishini Alloh taolodan so‘rab qolamiz.
"Kim o‘zini tanisa..."
Hayotda ko‘pincha to‘g‘ri yo‘nalish emas, balki tezlashish o‘rgatiladi. Tezroq yurish, tezroq yetib borish, hamma narsani tezroq bajarish... Lekin hech kim to‘xtab: “Bunchalik shoshilishdan maqsad nima?” deb so‘ramaydi. Inson tinimsiz harakatda bo‘lishni erishish, tabiiy hayot tarzi deb o‘ylab, sarflanayotgan umri evaziga aslida nimaga erishayotgani haqida o‘ylamay qo‘yadi.
Ba’zan yo‘lni yo‘qotdik, deb o‘ylaymiz. Holbuki, yo‘qoladigan narsa yo‘l emas, balki to‘g‘ri yo‘nalishdir. Bu yo‘nalish xaritadagi chiziqlar yoki telefondagi yo‘l ko‘rsatkich emas, balki Alloh taolo borlig‘imizga jo qilgan ichki yo‘naltirgich, ya’ni fitratimizdir.
Bu ichki yo‘naltirgich ba’zan to‘g‘ri tomonni ko‘rsatmayotgandek tuyuladi. Dunyo tashvishlari, nafs istaklari ko‘payib ketganida, u sarson bo‘ladi yo qotib qoladi. Shunda biz uni buzildi deb o‘ylaymiz. Lekin fitrat buzilmaydi, shunchaki biz unga ahamiyat bermay qo‘ygan bo‘lamiz. Ba’zilar bu yo‘naltirgichni boshqalarning qo‘liga berib qo‘yadi...
Yo‘nalishini yo‘qotgan odam to‘g‘ri yo‘lga qaytishi kerak. Bu qaytish shunchaki bir manzilga qaytib borishmas, balki ichki dunyomizdagi tarqoqlikni jamlash, fitratimizga qaytishdir. Shunda inson dunyoning “hammasiga erishish” vasvasasidan xalos bo‘ladi. O‘tmishdagi xato va sinovlardan ibrat oladi, ammo ularni o‘ziga og‘ir yuk qilib olmaydi. Boshqalardan va hayotdan juda ko‘p narsa kutishni to‘xtatadi...
Haqiqiy xotirjamlik – hamma narsa mukammal bo‘lishi deganimas. Inson o‘z harakat doirasi chegarasiga yetganida Allohning qazo va qadariga rozi bo‘lsa xotirjamlik topadi. Bu loqaydlik emas.
Musulmon kishi ham xursand bo‘ladi, qayg‘uradi, boshqalar kabi yashaydi. Lekin u o‘tkinchi tuyg‘ular, orzu-havaslar aro sarson bo‘lib qolmaydi. Chunki dunyodagi har bir holat vaqtinchalik sinov ekanini yaxshi anglaydi.
Inson o‘zligiga qaytganida boshqalarning yukini yelkasiga olishga urinmaydi. Yordam beradi, lekin har kim o‘z qismati va qilmishi uchun o‘zi mas’ul ekanini tushunadi. Boshqalarning aybiga qaramay, o‘z xatolarini tuzatish bilan band bo‘ladi. Muhimi, har ishida shoshqaloqlik qilmaydi. Chunki oxiratga va ma’naviy kamolotga eltuvchi yo‘lni shoshib bosib o‘tib bo‘lmasligini biladi.
Aytilganidek: “Kim o‘zini tanisa, Rabbini taniydi”. Bu martabaga erishgan qalb esa hech qachon adashmaydi.
Abdulatif ABDULLOH
