Pokistonlik ulamo: o‘zbek xalqi uchun duodaman
Yaqinda ziyorat turizmini hamkorlikda rivojlantirish masalasida yurtimizda bo‘lib qaytgan Pokistondagi Naqshbandiya tariqati izdoshlari yetakchisi Muhammad Nakib ur-Rahmon O‘zbekiston xalqiga murojaat yo‘lladi. Bu haqda “Dunyo” AA xabar berdi.
Muhammad Naqib hazratlari o‘z so‘zida mamlakatimizning boy madaniy-tarixiy va ma’rifiy qadriyatlarini, ziyorat turizmi salohiyatini yuqori baholash bilan birga, O‘zbekiston koronavirus pandemiyasi bilan bog‘liq vaqtinchalik qiyinchiliklarni muvaffaqiyatli yengib o‘tishiga ishonch bildirdi.
Pokistonlik ulamo murojaatida jumladan bunday dedi: “O‘zbekistonda Islom dini merosining ulug‘vorligi va bugun mamlakatda amalga oshirilayotgan keng qamrovli islohotlar, jumladan, ziyorat turizmi salohiyati va yaratilayotgan qulayliklar meni hayrat va hayajonga soldi. O‘zbekiston rahbariyati va xalqini og‘ir damlarda qo‘llab-quvvtlash uchun duodaman”.
O‘zbekiston musulmonlari idorasi Matbuot xizmati
Aholi bilan ochiq muloqot: murojaatlar yechim topmoqda
O‘zbekiston musulmonlari idorasi tomonidan aholi bilan yo‘lga qo‘yilgan ochiq va samimiy muloqot tizimi fuqarolarning murojaatlarini atroflicha o‘rganish hamda ularga tezkor yechim topishda muhim omil bo‘lmoqda.
12 avgust kuni Diniy idora raisi o‘rinbosari Zayniddin domla Eshonqulov navbatdagi fuqarolar qabulini o‘tkazib, yurtdoshlarimizning arz, taklif va murojaatlarini tingladilar. Yuzma-yuz suhbat jarayonida masjidlar holati va faoliyati, imom-xatiblar ishi, Haj va Umra ziyoratlarini tashkil etish, oilaviy munosabatlarni tartibga solish hamda moddiy yordam ko‘rsatishga oid ko‘plab masalalar chuqur tahlil qilinib, ularning aksariyati joyida ijobiy hal etildi.
Eslatib o‘tamiz, bu kabi qabullar va fuqarolar bilan muloqot tadbirlari Diniy idoraning hududiy vakilliklari hamda yurtimizdagi barcha jome masjidlarda har haftaning chorshanba kuni imom-xatiblar tomonidan o‘tkazib kelinmoqda.
O‘zbekiston musulmonlari idorasi
Matbuot xizmati
