O`zbekiston musulmonlari idorasi

Imom-xatiblar va xalqimiz tomonidan 400 ga yaqin jonliq so‘yildi, yuzlab xatmi Qur’on qilindi, millionlab salovoti sharif aytildi

20.03.2020 2366 3 min.

Avval xabar berganimizdek, O‘zbekiston musulmonlari idorasi tashabbusi bilan karonavirus yuqumli xastaligini tez orada insoniyat boshidan aritish maqsadida dinimiz ko‘rsatmalariga muvofiq, bir qator xayrli ishlar amalga oshirildi.
Bugungi fazilatli juma ayyomida O‘zbekiston musulmonlari idorasining Qoraqalpog‘iston Respublikasi, viloyatlar va Toshkent shahridagi vakilliklari jami 21 bosh qora mol, tuman-shaharlar markaziy masjid imom-xatiblari tashabbusi bilan homiylar jalb qilingan holda, 386 bosh qo‘y so‘yilib, go‘shtlari kam ta’minlangan oilalar, yordamga muhtoj kishilar, duosi mustajob insonlar va mehribonlik uylariga xayriya qilindi.
Diniy soha xodimlari 6 543 ta najot so‘rash namozini ado etdilar. 1 466 301 ta “Solatun nojiya”, 1 277 537 ta “Solatun noriya”, 234 055 ta “Hasbunallohu va ni’mal vakil” kabi ulug‘ salovoti sharif va duo, 207 390 marta “Fotiha” va “Ixlos” suralari o‘qildi.
Ushbu xatmi Qur’onlar, salavotlar va xayriya ishlarining yakuniy duolari O‘zbekiston musulmonlari idorasi raisi, muftiy Usmonxon Alimov hazratlari boshchiliklarida Toshkent shahridagi "Suzuk ota" majmuasida yurtimizdagi eng tabarruk ulamolar tomonidan amalga oshirildi.
Shu o‘rinda alohida ta’kidlash lozimki, ushbu xayrli ishlarga hissa qo‘shish maqsadida xalqimiz tomonidan katta tashabbus ko‘rsatildi. Jumladan, ijtimoiy tarmoqlar orqali xabar topgan yurtdoshlarimiz o‘z uylarida, oila a’zolari bilan xatmi Qur’on va “Solatun nojiya”, “Solatun noriya” kabi ulug‘ duolarni o‘qishga kirishdilar.
Qiyinchilik, musibat davrida jipslasholishimiz, bir tanu bir jonga aylana olishimizni ko‘rsatdi. Bugun erta tongdan boshlab Diniy idoraga aholimizdan qo‘ng‘iroqlar tinmadi. Ularda ixlosi baland azizlarimiz: “Biz shuncha xatmona qildik, buncha salovoti shariflar o‘qidik, bizni ham yozib qo‘ying”, deya xabar berdilar.
Bugun soat 12-00 gadar Diniy idoraga kelib tushgan ma’lumotlarga ko‘ra, yurtdoshlarimiz tomonidan 17 ta qo‘y so‘yilib, haqdorlarga ehson qilishgan. 213 marotaba xatmi Qur’on qilishgan, 271 690 kishi najot so‘rash namozini ado etishgan. 656 864 ta “Solatun nojiya”, 612 053 ta “Solatun noriya”, 199 343 ta “Hasbunallohu va ni’mal vakil” kabi ulug‘ salovoti sharif va duolarni, 350 466 marta “Fotiha” va “Ixlos” suralarini o‘qishgan. Bundan tashqari, qanchadan-qancha yurtdoshlarimiz aytishga botinmagan yoki xufyona tarzda ibodat va tasbehu duolarda bo‘lishgan.
Xalqimiz orasida Alloh taoloning valiy bandalari, duolari mustajob chin do‘stlari bor. Ularning birgina duolari balolarni aritishi, yengillik va kushoyishlar keltirishi mumkin. Ana shunday azizlarimiz ham duolarda bo‘ldilar, inshoalloh.
Sinovli damlarda butun xalqimiz chin niyat va ixlos bilan qilgan xayriya, ehson va qurbonliklar, ko‘plab xatmi Qur’on, duoi salovotlar sharofatidan yurtimiz, qolaversa, butun dunyoda karonavirus yuqumli kasalligi tez orada chekinsin, bermorlarga komil shifo bersin, masjidlarimiz ham yaqin vaqtlar ichida ochilib, mo‘min-musulmon xalqimiz bilan obod bo‘lsin!