Quyida keltiriladigan fikrlar, hikmatlar saytlardan va ijtimoiy tarmoqlardagi turli sahifalardan olib tarjima qilingan.

Alloh taolo barchamizni yomon xotimadan asrasin!

Ixlos bilan sadaqa beruvchilardan qilsin!

Qiyomat kuni shafoat qiladigan do‘stlarimizni ko‘paytirib bersin!

*****

BUYUK MUSAVVIR ZOT POK VA QUDRATLIDIR! 

Chumolilar ijtimoiy tarzda yashaydigan, bir-biriga mehribon, qabiladoshlari uchun kerak bo‘lsa o‘zini qurbon qiladigan, hamjihat bo‘lib hayot kechiradigan mehnatkash hasharotdir.

*****

Agar sadaqa beruvchi o‘zining berayotgan sadaqasi faqirning qo‘liga yetib borishidan oldin Allohning qo‘liga tushishini bilganida edi, beruvchi his etadigan lazzat oluvchi tuyadigan lazzatdan ko‘ra kattaroq, ko‘proq bo‘lardi.

Ibn Qayyim rahimahulloh

*****

— Oilada chinakam baxt bo‘lishi uchun kimning aytgani bo‘lishi kerak? Erning aytganimi yoki xotinning aytganimi?

— Allohning aytgani bo‘lishi kerak! Allohning hukmi ustuvor bo‘lishi kerak! Er-xotin Shariat belgilab bergan o‘z vazifalarini sidqidildan bajarishsa, oilada chinakam baxt bo‘ladi.

*****

Ayolingizga — uning dindorligi uchun uylangan bo‘lsangiz, har safar namoz o‘qiyotganini ko‘rganingizda, muhabbatingiz ziyoda bo‘laveradi.

*****

Tanamiz

Inson tanasida 900 dona qalam ishlab chiqarishga yetadigan uglerod, 50 litrli qozonni to‘ldirishga yetadigan suv, 7 dona sovun ishlab chiqarishga yetadigan yog‘, o‘rtacha kattalikdagi itning tanasidagi barcha burgalarni o‘ldirishga yetadigan oltingugurt bor.

Internet materiallaridan to‘plab,

tarjima qiluvchi Nozimjon Iminjonov