Avval xabar berganimizdek, bugun Toshkent shahri Olmazor tumanida joylashgan “Islomobod” jome masjidining yangi binosiga ilk g‘isht qo‘yish marosimi bo‘lib o‘tdi. Unda O‘zbekiston musulmonlari idorasi raisi, muftiy Usmonxon Alimov hazratlari ishtirok etib, bir guruh ulamolar, yoshi ulug‘ otaxonlar bilan birgalikda masjid poydevoriga tamal toshini qo‘yib berdilar.

Tadbir davomida muftiy hazratlari ommaviy axborot vositalari, marosim ishtirokchilariga yurtimizda bo‘layotgan xayrli o‘zgarishlar, dinimizda obodlik va pokizalikka bo‘lgan e’tibor haqida so‘zlab, jumladan bunday dedilar: “Alloh taolo yurtimizga bergan tinchlik-hotirjamlik ne’mati tufayli barcha sohalarda bo‘lgani singari diniy sohada ham katta o‘zgarishlar bo‘lmoqda. Alhamdulillah, yurtimizdagi qaysi joyga bormaylik, masjidlarimiz mo‘min-musulmonlarimiz bilan obod. Mamlakatimizga kelgan xorijlik mehmonlar masjid va ziyoratgohlar obodligi, ularda yaratilgan sharoitlarni ko‘rib qoyil qolishmoqda. Bunday imkoniyatlar, albatta, ko‘p joylarda yo‘q. Yaqinda yurtimizda bo‘lib qaytgan Misr Bosh imomi, Al-Azhar majmuasi rahbari shayx Ahmad Muhammad Toyyib hazratlari yurtimizda bo‘layotgan islohotlarga tahsin aytib, Alloh taolo ato etgan bu ne’matlarga ko‘p shukr qilish kerakligini aytdilar.

Mo‘min-musulmonlar dinimizning har bir ko‘rsatmalariga amal qilishi lozim. Shunda ikki dunyo yaxshiligiga ega bo‘ladilar. Dinimiz nazokat, tozalik, poklik ustiga qo‘rilgan. Paygambar sollalloxu alayxi vasallam: «Poklik iymonning yarmidir...», – deganlar (Imom Muslim, Imom Nasaiy, Imom Termiziylar rivoyati).
Demak, mo‘min-musulmonlar kundalik turmush tarzida ozodalikka katta e’tibor berishi, jumladan, masjidlarni obod va pok holatda saqlashi lozim ekan. Shuningdek, uyimiz, mahallamizni ozoda tutsak, dinimizga muvofiq ish tutgan bo‘lamiz”.
Tadbir davomida masjid qurilishiga homiylik qilayotgan, o‘z hissasini qo‘shayotganlarga minnatdorchilik bildirdilar, yig‘ilganlar bilan yurtimiz tinchligi, xalqimiz farovonligini, el-yurtimizni turli ofat va kasalliklardan asrashini so‘rab xayrli duolar qildilar.

Masjid loyihasi milliy obidalarimizdan andoza olgan holda to‘g‘ri to‘rtburchak shaklida qurilmoqda, – deydi “Mamur Project” korxonasi rahbari Is'hoqjon Ahmedov. – Masjid ikki qavat va yerto‘ladan iborat bo‘lib, bir vaqtning o‘zida ko‘p odamni sig‘diradi. Boshqa masjidlardan farqli ravishda balandligi 54 metrli to‘rt minorali va 4 gumbazli bo‘ladi. Uning yonida katta avtoturargoh qad rostlaydi. Qurilish uchun ketadigan barcha mahsulotlar o‘zimida ishlab chiqarilgan, chetdan olib kelishga xojat yo‘q.

Ushbu masjidni mo‘min-musulmonlarga har tomonlama qulay qilib qurish maqsadida Yurtimizdagi ko‘plab masjidlar holatini o‘rgandik, – deydi “Islomobod” masjidi qurishi boshlig‘i Muhammadjon Umarov. – Jumladan, masjidga namozxonlar sig‘imini ko‘paytirish, kirish eshiklarida tirbandlikning oldini olish, tahoratxonalarda navbat kutish muammolarni bartaraf etish uchun masjidni keng, eshiklari ko‘p, xonaqoh va yerto‘lalarni balandroq qilib qurmoqdamiz. Shuningdek, xavfsizlik jihatlariga alohida e’tibor berdik.

Bu yilgi masjid tomini yopib olishni rejalashtirganmiz. Masjid 8 ming nafar namozxonga mo‘ljallanmoqda. Namozxonlar xonaqoh, yerto‘la va balkonda ibodatlarini ado etishlari mumkin. Ayollar uchun alohida namozxona va tahoratxona bo‘ladi. Qurilishni 2021 yil oxiriga qadar bitirishni rejalashtirganmiz, deydi “Ehson” firmasi vakili Abdusalom Abdiqodirov.
Alloh taolo ushbu masjid qurilishini xayrli va barakali qilsin, unga hissa qo‘shayotganlarga ajru savobini ko‘paytirib bersin, yurtimiz yana ko‘plab masjidlar qurilishini nasib aylasin.

Bahriddin XUSHBOQOV,
O‘MI Matbuot xizmati