Ko‘rinmas dushman
BISMILLAHIR ROHMANIR ROHIYM
Kuch va Qudrat egasi bo‘lgan Alloh taologa hamdu-sanolar hamda olamlarga rahmat o‘laroq yuborilgan, to‘g‘ri so‘z va ishonchli bo‘lgan Payg‘ambarimiz Muhammad mustafo sollallohu alayhi vasallamga, u zotning ahli oilasi, sahobalari va tobi’inlariga ko‘plab solatu salomlarimiz bo‘lsin.
Bugungi kunda o‘zining musulmonligini da’vo qilib, biroq dinini asl mohiyati ilm-ma’rifat ekanligini bilmay, o‘rganmay, dushmanning hiylalariyu nayranglariga ishonib, hatto bilmaganligi va anglamaganligi tufayli ularga bu ishlarda yordamchi bo‘lib yurgan kishilarning soni ko‘payib bormoqda.
Eng yomoni ana shu dinining asl mohiyati ilm-ma’rifat ekanligini bilmagan, o‘rganmagan kishilar umrining aksarini keraksiz, foydasiz ishlar, ko‘proq INTЕRNЕTdagi fitnalar, buzg‘unchiliklar, tuhmatlar, g‘iybatu bo‘htonlar va shularga o‘xshash qabohatlarni o‘qish hamda tomosha qilish bilan insonga beriladigan bebaho va qaytarilmas bo‘lgan VAQT ne’matini samarasiz o‘tkazishlaridir.
Buning oqibatida muqaddas dinimizda qoralangan, u sababli ko‘plab to’atu ibodatlar, yaxshiligu oliyliklar o‘z vaqtidan qolib ketishiga yoki tark qilinishiga sabab bo‘ladigan, uning zarari hamda oqibatlari nafaqat bu qabih sifat egasiga, balki o‘zgalarga ham yuqadigan, doimo o‘rganilishi va o‘rgatilishi shart hamda insoniyatga ko‘rinmas, tuganmas dushman bo‘lgan dangasalik, erinchoqlik va ishyoqmaslik sifatiga ega bo‘lganlarning soni ko‘payib bormoqda. Buning zarari nafaqat musulmonlarga, balki butun insoniyatga bo‘lishi barchamizga aniq va ravshandir.
Ana shu ma’noda yana bir karra dinimizda bu kasallikning zararlari, oqibatlari va unga qarshi turishda hamda sizu biz bu kasallik bilan kasallanib qolmasligimiz uchun dinimiz ko‘rsatmalarini o‘rganishimiz va eslashimiz lozim deb bildim va unga umumiy qilib, “KO‘RINMAS DUSHMAN” deya nom berdim. Bundan buyon ushbu mavzuda davomli shaklda maqolalarimizni berib boramiz.
Bu boradagi barcha izlanishlarimizni hamda o‘rganayotgan ilmimizni manfa’atli va unga amal qilishimizni Alloh taoloning o‘zi oson qilsin.
“Shayx Zayniddin” jome masjidi imom-xatibi,
TII o‘qituvchisi Abdurahmanov Yahyo Ubaydulloh o‘g‘li
Fidokorona xizmat e’tirofsiz qolmaydi
O‘zbekiston musulmonlari idorasi tasarrufidagi "Ko‘kaldosh" o‘rta maxsus islom ta’lim muassasasida ko‘p yillar halol va fidokorona mehnat qilgan xodimamiz Ahmadjonova Nilufar Habibullayevnaning 50 yoshlik yubileyi munosabati bilan ta’lim muassasasi hamda kasaba uyushmasi tomonidan tadbir o‘tkazildi.
Tadbirda ta’lim muassasasi mudiri M. Erkayev, o‘quv ishlari bo‘yicha mudir o‘rinbosari N. Djalolov va manaviy-ma’rifiy ishlar bo‘yicha mudir o‘rinbosari, ta’lim muassasasi kasaba uyushmasi raisi A.G‘aniyev ishtirok etishdi. Muassasa mudiri M. Erkayev muhtarama opamizni shaxsan o‘zi tabriknoma bilan taqdirladi. Esdalik sovg‘alari bilan ham mukofotlandi.
Nilufar opa har kuni tong sahardan ilm dargohiga kelib, uning ozoda, shinam va pokiza bo‘lishiga yillarida sabr, ixlos va sadoqat bilan o‘z hissasini qo‘shib kelmoqda. Bunday kamtarin, ammo qadri baland mehnat barchamiz uchun ibrat namunasidir.
Payg‘ambarimiz sollallohu alayhi vasallam: "Pokizalik iymondandir", deb marhamat qilganlar. Ilm va marifat maskanining ta’minlash — talabalar ustozlarning tinch, toza va barakali ilm olishiga munosib hissa qo‘shadigan ezgu ishdir. Ana beminnat xizmat har qanday e’tirof va ehtiromga loyiqdir.
Bilim yurtimiz o‘z yordamga g‘amxo‘rlik qilishni muhim burch deb biladi. Zero, ilm dargohiga qilingan har bir xizmat — Allohning roziligi yo‘lidagi savobli amaldir. Kim ilm ahliga va ilm maskaniga xizmat qilsa, o‘sha ilmdan taralayotgan ezgulikning ajridan bahramand bo‘lishi umid qilamiz.
Muhtarama opamizga mustahkam sog‘lik-salomatlik, uzoq umr, oila baxti va ishlarida baraka tilaymiz. Alloh taolo halol mehnatlarini ajru mukofotsiz qoldirmasin, qilgan ezgu ishlari va mehnatlarining rohatini ko‘rish uzoq yillar davomida nasib etsin!
"Ko‘kaldosh" o‘rta maxsurs islom ta’lim muassasasi
matbuot xizmati
