Samimiy muloqot
2023 yil 7 sentyabr' kuni O'zbekiston musulmonlari idorasi raisi, muftiy Shayx Nuriddin Holiqnazar hazratlari Arman-Apostollik cherkovining Moskva va Novonaxichevan eparxiyasi rahbari Yezras Narsesyanni qabul qildilar.
Muloqotda Din ishlari bo'yicha qo'mita raisi o'rinbosari Dilshod Mamatqulov, O'zbekistondagi Arman Apostol cherkovi ruhoniysi Avanes Grigoryan va bir qator mutasaddilar ishtirok etdi.
Uchrashuvda qadim-qadimdan O'zbekiston zaminida turli millat, elat va din vakillari ahil-inoq yashab kelayotgan diyor ekani, barchaning asosiy maqsadi tinchlik va osoyishtalikni ta'minlash va ertangi taraqqiyoti uchun hissa qo'shish ekaniga urg'u qaratildi.
Samimiy ruhda o'tgan suhbatda mamlakatimizdagi yangilanish va islohotlar keng quloch yozayotgani, Davlatimiz rahbari tomonidan millatlararo totuvlik va konfessiyalararo hamkorlikka berilayotgan alohida e'tibor mamlakatimiz taraqqiyotida yangi davrni boshlanishiga zamin yaratganiga alohida e'tibor qaratildi.
Yurtimizdagi bunday ijobiy o'zgarishlar dunyo hamjamiyatida O'zbekistonga bo'lgan qiziqishni yanada oshirib, uning xalqaro maydondagi nufuzini tobora mustahkamlayotgani mehmonlar tomonidan yuksak e'tirof etildi.
O'zbekiston musulmonlari idorasi Matbuot xizmati
Hududlarda otinoyilar o‘rtasida «Zakovat» bahslari o‘tkazildi
O‘zbekiston musulmonlari idorasi raisi, muftiy Shayx Nuriddin Xoliqnazar hazratlarining tashabbuslari bilan xotin-qizlarning ma’naviy-ma’rifiy saviyasini yuksaltirish va intellektual salohiyatini oshirishga qaratilgan xayrli loyihalar izchil davom etmoqda.
Shu maqsadda O‘zbekiston musulmonlari idorasining Xotin-qizlar masalalari bo‘yicha bo‘limi tashabbusi hamda mas’ullari bevosita ishtirokida joylarda bosh imom-xatiblarning xotin-qizlar masalalari bo‘yicha yordamchilari va mahalla otinoyilari o‘rtasida «Zakovat» intellektual bellashuvlari tashkil etilmoqda.
Xususan, mazkur bilimlar bahsi Toshkent shahri, Xorazm va Surxondaryo viloyatlarida ko‘tarinki ruhda bo‘lib o‘tdi:
-
Toshkent shahrida kechgan bahslarda otinoyilar tarixiy, adabiy, mantiqiy va diniy bilimlarini sinovdan o‘tkazdi. Yakunda «Tasnim» jamoasi 1-o‘rinni egalladi, «Ma’rifat sohibalari» 2-o‘ringa, «Oqilalar» jamoasi esa 3-o‘ringa munosib ko‘rildi.
-
Xorazm viloyatida «Ilm — ziyo, tafakkur — kamolot sari yo‘l!» shiori ostida o‘tgan bellashuvda O‘MI Xotin-qizlar masalalari bo‘yicha bo‘limi boshlig‘i Dilfuza Egamova, diniy soha vakillari hamda hudud otinoyilari qatnashib, bilim va tajriba almashishdi.
-
Surxondaryo viloyatida esa ishtirokchilar ijtimoiy-siyosiy, aqidaviy-fiqhiy va mantiqiy savollarga jamoaviy tarzda javob berib, yuqori tayyorgarlik namoyish etdi hamda respublika bosqichi yo‘llanmalarini qo‘lga kiritdi.
Mazkur intellektual tadbirlar jamiyatda, xususan, oilalar va xotin-qizlar orasida ma’naviy sog‘lom muhitni mustahkamlashda fidoyilik ko‘rsatib kelayotgan otinoyilarning dunyoqarashini yanada kengaytirish va o‘zaro hamjihatligini kuchaytirishga xizmat qiladi.
Bellashuvlar so‘ngida g‘olib va sovrindorlarga tashkilotchilar tomonidan diplom hamda esdalik sovg‘alari topshirildi.
O‘zbekiston musulmonlari idorasi
Matbuot xizmati
