Namoz saboqlari: Namozdan so‘ng o‘qiladigan boshqa duolar (Audio)
Laa ilaha illallohu vahdahu laa shariyka lah, lahul-mulku va lahul hamd va huva ’ala kulli shay’in qodiyr. Allohumma laa mania’ lima a’toyta va la mu’tiya lima mana’ta va laa yanfa’u zal-jaddi minkal-jadd.
Ma’nosi: Allohdan boshqa iloh yo‘q. Uning tengi va sherigi yo‘q. Mulk Unikidir. Hamd Ungadir. U har narsaga qodirdir. Yo Alloh! Sening berganingga monelik qiluvchi hech narsa yo‘q. Bermaganingni beradigan hech kimsa yo‘qdir. Ulug‘ bo‘lgan foyda bermaydi. Ulug‘lik Sendandir (Imom Muslim. «Masajid», 137).
* * *
«Alhamdulillahi robbil a’lamiyn. Val-aqibatu lil-muttaqiyn, va la udvana illa ’alaz-zolimiyn. Vassolatu vas-salamu ’ala rasulina Muhammadin va ’ala alihi va as'habihi ajmaiyn.
Allohumma robbana, ya robbana taqobbal minna solatana va qiyamana va ruku’ana va tahlilana va tazarru’ana va tammim taqsirona va la tazrib biha vujuhana ya Mavlana.
Allohumma atina sihhatan va ’afiyatan va sa’adatan va rifqon va avladan solihin va ’ilman nafi’an va rizqon vasi’an va ’amalan maqbulan, ya arhamar-rohimiyn. Robbanag‘firli valivalidayya valil-mu’miniyna yavma yaqumul-hisab».
Ma’nosi: Hamdu sano olamlarning Rabbi Allohgadir (Unga hamd bo‘lsin). Go‘zal oqibat taqvodorlargadir. Dushmanlik esa zolimlargadir. Janobi Payg‘ambarimiz Muhammad Mustafoga, ul zotning yaqinlari va sahobalariga salot va salom bo‘lsin.
Yo Alloh! Ey Rabbimiz! Namozimizni, qiyomimizni, rukularimizni, sajdalarimizni, o‘tirishlarimizni, tazarru va niyozlarimizni qabul ayla. Nuqson-kamchiliklarimizni mukammal qil. Ey Mavlomiz! Kamchiliklarimizni yuzimizga urma.
Yo Alloh! Bizga sog‘liq va ofiyat, baxt va shirin hayot va go‘zallik ber, xayrli farzandlar nasib et. Yo Rabbim! Bizga foydali ilm, mo‘l rizq va maqbul amallar nasib ayla. Ey marhamatlilarning eng marhamatlisi bo‘lgan Allohim.
Ey Rabbim! Meni, ota-onamni va barcha mo‘minlarni kechir, bizni jahannam azobidan asra.
Shuning bilan "Namoz saboqlari" rukni orqali berib borilayotgan audio darslarimiz yakuniga yetdi. Barchangizga ezgu tilaklar bilan minnatdorlik bildiramiz.
O‘MI matbuot xizmati
O‘zbekiston olimlari Bobur va Boburiylarning Pokistondagi merosini tadqiq etmoqda
O‘zbekiston elchixonasi tomonidan Bobur nomli xalqaro jamoat fondi bilan hamkorlikda o‘zbekistonlik tarixshunos va boburshunos olimlardan iborat delegatsiyaning Pokistonga tashrifi amalga oshirildi, deb xabar bermoqda “Dunyo” AA muxbiri.
Tashrif Bobur va Boburiylar davriga oid tarixiy-madaniy merosni o‘rganish, Pokiston hududida saqlanayotgan mazkur davrga oid tarixiy manbalar, qo‘lyozmalar, eksponatlar va artefaktlar bilan tanishish, shuningdek, ikki mamlakatning ilmiy-tadqiqot va madaniy muassasalari o‘rtasida hamkorlikni rivojlantirish maqsadida tashkil eildi.
Delegatsiya a’zolari dastlab Lahor shahrida Boburiylar davriga oid tarixiy obidalar va manzilgohlarga tashrif buyurib, o‘rganishlar olib bordi. Xususan, Lahor muzeyi, Islom galereyasi hamda qator ilmiy-tadqiqot muassasalarida bo‘lib, mazkur muassasalarda qator ilmiy uchrashuvlar o‘tkazdi va boburiylar davriga oid tarixiy manbalar bilan tanishdi.
Lahor shahridagi Panjob universiteti rahbariyati bilan ilmiy va akademik hamkorlik masalalari muhokama qilindi. Safar davomida mazkur universitet huzuridagi Boburiylar merosi markazi bilan hamkorlikda Boburiylar sulolasining 500 yilligiga bag‘ishlangan ilmiy-amaliy anjuman o‘tkazildi.
Ishtirokchilar Bobur va Boburiylar tarixi, ularning Markaziy va Janubiy Osiyo tamaddunidagi o‘rni, mazkur davrning siyosiy, madaniy va ilmiy merosini o‘rganish masalalarini muhokama qildilar.
O‘zbekiston olimlari Islomobod shahrida Pokiston Milliy tilni rivojlantirish departamenti rahbariyati Quaid-i-A’zam universiteti, Alloma Iqbol universiteti, Pokiston Milliy kutubxonasi hamda qator ilmiy-tadqiqot muassasalariga tashrif buyurib, qo‘lyozmalar, boburiylar davriga oid eksponatlar va boshqa tarixiy manbalar bilan tanishdi.
O‘zbekiston vakillari Islom hamkorlik tashkilotining Ilmiy va texnologik hamkorlik bo‘yicha doimiy qo‘mitasi bosh koordinatori Muhammad Iqbol Choudhari tomonidan qabul qilindi.
Unda Bobur va Boburiylar merosini chuqur o‘rganish, uni asrash va musulmon dunyosi ilmiy doiralari hamda keng jamoatchilik o‘rtasida targ‘ib qilish bo‘yicha hamkorlikni yo‘lga qo‘yish masalalari ko‘rib chiqildi.
Kelgusida mazkur tashkilot bilan hamkorlikda Boburiylar merosiga bag‘ishlangan yirik xalqaro ilmiy-amaliy konferensiya o‘tkazish bo‘yicha kelishuvga erishildi.
Tashrifning asosiy tadbiri Islomobod shahrida «Zahiriddin Muhammad Bobur: mushtarak sivilizatsiyaviy meros va O‘zbekiston-Pokiston munosabatlari ko‘prigi» mavzusida tashkil etilgan bo‘ldi.
Konferensiyada Pokiston Milliy meros va madaniyat vazirining o‘rinbosari Farah Naz Akbar, O‘zbekiston elchisi Alisher To‘xtayev, Pokistondagi «Bobur forumi» rahbari Ramzan Mug‘al hamda tarixchi va boburshunos olimlar hamda yosh tadqiqotchilar ishtirok etdi.
Diplomatik vakolatxona rahbari o‘z nutqida ikki mamlakat o‘rtasidagi tarixiy, madaniy, ma’naviy va sivilizatsiyaviy aloqalar uzoq tarix va chuqur ildizlarga ega ekanini qayd etdi.
– Ushbu mushtarak tarixda Zahiriddin Muhammad Bobur Janubiy Osiyoda ulkan davlatchilikka asos solgani xalqlarimizni birlashtiruvchi muhim tarixiy omil bo‘ldi, – dedi O‘zbekiston elchisi. – Ta’kidlash joizki, bugungi kunda O‘zbekiston-Pokiston munosabatlari barcha sohalarda izchil rivojlanib bormoqda. Ikki davlat rahbarlari o‘rtasidagi muntazam va yaqin do‘stona muloqot natijasida ikki tomonlama munosabatlarimiz strategik sheriklik darajasiga ko‘tarildi. Aloqalarning bunday darajasida umumiy tarixiy va madaniy merosni o‘rganishning naqadar muhimligi, bu borada yaqindan hamkorlik qilish ikki xalq o‘rtasidagi do‘stlik va o‘zaro anglashuvni yanada mustahkamlashga xizmat qiladi.
Bobur nomli xalqaro jamoat fondi raisi o‘rinbosari Rustam Mamasoliyev o‘z chiqishida Bobur va uning ilmiy-adabiy merosi butun mintaqa tarixida alohida o‘rin tutishini urg‘uladi.
– O‘zbekistonda Bobur va boburiylar merosini o‘rganish, asrash va targ‘ib qilish borasida juda katta ishlar amalga oshirilyapti, – dedi u. – Boburiylar merosini chuqur o‘rganishda pokistonlik olimlar va ilmiy muassasalar bilan qo‘shma tadqiqotlar, ilmiy anjumanlar, nashriyot loyihalari va akademik almashinuvlarni kengaytirish juda muhim.
Pokiston Milliy meros va madaniyat vazirining o‘rinbosari Farah Naz Akbar, o‘z navbatida, boburiylarning Pokiston tarixidagi muhim o‘rniga to‘xtaldi.
– Boburiylarning Pokistondagi tarixiy-madaniy merosini asrash va kelajak avlodlarga yetkazishga hukumat darajasida e’tibor qaratilyapti, – dedi Farah Naz Akbar. – Biz O‘zbekiston bilan tarixiy aloqalarimizni yanada mustahkamlash, ilmiy hamkorlik va madaniy almashinuvlarni qo‘llab-quvvatlashga, buyuk ajdodlarimiz qoldirgan merosni birgalikda o‘rganish va targ‘ib qilishga tayyormiz.
Bobur nomli xalqaro jamoat fondi delegatsiyasi tashrifi davomida Panjob viloyatida joylashgan Boburiylar davriga oid qator tarixiy qadamjolarda o‘rganishlar olib borishi rejalashtirilgan.
O‘zbekiston musulmonlari idorasi Matbuot xizmati
