Terrorizm zararlari
Ekstremistik va terrorchi guruhlar insonlarga nisbatan zo‘ravonlik, kuch ishlatish yo‘lini tutadilar. Ular ma’lum bir din doirasida cheklanmaydilar. Bunday guruhlar hech bir qonunni hurmat qilmaydilar, faoliyatlari insonlar va dinlarga qarshi qaratilgan bo‘ladi. “Terrorizm” so‘zi qo‘rqitish, xavfga solish ma’nolarini anglatadi. Manbalarda terrorizmga “Shaxslarga qarshi kuch ishlatish, jamiyat xavfsizligi va tinchligiga raxna soluvchi, notinchlik keltirib chiqaruvchi, g‘arazli siyosiy maqsadli, muayyan diniy toifaga qarshi qaratilgan xatti-harakatlar”, deb ta’rif beriladi. Bunda shaxslar va davlat, ularning mol-mulklariga zarar yetadi.
Terrorizmni yo‘q qilish, undan qutulish uchun davlatlar harbiy, iqtisodiy va informatsion choralar ko‘rishmoqda. Bu choralardan terrorizmning fuqarolarga solayotgan xatarini yo‘qotish maqsad qilinadi.
Terrorizmning jamiyatga zararlari qatorida quyidalarni sanash mumkin:
- Begunoh odamlarning qoni to‘kilishi;
- Mol-mulklarga zarar va talafot yetkazilishi;
- Jamiyatda xavf va qo‘rquv paydo qilinishi;
- Davlat va rahbarlarga qarshi isyon;
- Tartibsizliklar kelib chiqishi;
- Tarqoqlik va bo‘linish.
Ushbu holatlarning oldini olish uchun mutaxassislar terrorizmga qarshi kurashning quyidagi yo‘llarini taklif qilishadi:
- Ta’lim-tarbiya ishlarini to‘g‘ri yo‘lga qo‘yish;
- Bag‘rikenglik, mo‘tadillik g‘oyalarini mustahkamlash;
- Yosh avlodni to‘g‘ri shakllantirish.
- Turli diniy konfessiyalar o‘ratsida o‘zaro muloqot va tushunish omillarini rivojlantirish.
Abdurasul QAYUMOV,
“Muhsinxon To‘ra Eshon” jome masjidi
imom-xatibi
Qohirada oila mustahkamligiga bag‘ishlangan xalqaro anjuman boshlandi
Bugun, 2 sentyabr kuni Misr Arab Respublikasi poytaxti Qohira shahrida Prezident Abdulfattoh as-Sisi homiyligida hamda Butunjahon fatvo idoralari va hay’atlari Bosh kotibiyati tashabbusi bilan nufuzli xalqaro anjuman o‘z ishini boshladi.
"Global o‘zgarishlar sharoitida oilaviy masalalar: oilani himoya qilish, uning kelajagi va milliy-diniy o‘zlikni asrashda fatvo yondashuvlari" mavzusidagi mazkur ilmiy anjumanda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari ishtirok etmoqda.
Ikki kun davom etadigan xalqaro yig‘inda dunyoning ko‘plab mamlakatlaridan tashrif buyurgan yetakchi muftiylar, taniqli ulamolar, xalqaro islomiy tashkilotlar rahbarlari, davlat va jamoat arboblari hamda soha mutaxassislari qatnashmoqda.
Anjuman kun tartibidan zamonamizning quyidagi eng dolzarb masalalari o‘rin olgan:
– Globallashuv, raqamli texnologiyalar va sun’iy intellekt davrida oila instituti duch kelayotgan muammolarning ilmiy tahlili;
– Zamonaviy oilaviy inqirozlarni puxta tadqiq etish va ularga shar’iy hamda amaliy yechimlar topish;
– Virtual muhitning oilaviy munosabatlarga ta’sirini o‘rganish hamda ularni mustahkamlash yo‘llari;
– Milliy-diniy o‘zlikni saqlash va zararli media kontentlarga qarshi kurashda jamoaviy fatvolar ishlab chiqish.
Xalqaro anjuman tafsiloti bilan saytimiz va ijtimoiy tarmoqlardagi sahifalarimiz orqali tanishib borishingiz mumkin.
O‘zbekiston musulmonlari idorasi Matbuot xizmati