Olmani tishlagan qiz
Qizaloqning qo‘llarida ikkita olma bor edi. Onasi undan “Qizim, olmaning bittasini menga ber” deb so‘radi. Qiz onasiga tikilib turdi-da, keyin qo‘lidagi olmalarni birin-ketin tishladi. Onasi qizining bu ishidan biroz xafa bo‘lib, “Mehr bilan boqqan qizim shunday qildiya” degan narsa xayolidan o‘tdi. O‘z qizidan bunday muomalani kutmagandi. Qizidan uzoqlashib, boshqa xonaga chiqmoqchi bo‘lganida, qizi uning ortidan chaqirdi va “Onajon, mana bunisi shirinroq ekan” dedi-da, olmalarning birini onasiga uzatdi.
Qizaloq onasiga shirin olma berish uchun ularni tishlab ko‘rgandi. Onasi esa bu holni biroz noto‘g‘ri tushundi va qizidan xafa bo‘la boshladi. Qizining gapidan keyin ona undan bekorga xafa bo‘lganini angladi.
Har qancha ilmli, tajribali va dunyoqarashi keng inson bo‘lmang, boshqalar haqida hukm chiqarishga shoshilmang. Odamlarga o‘z maqsadlarini bayon qilib berishlari uchun imkon bering.
Internet ma’lumotlari asosida Nozimjon Hoshimjon tayyorladi
Anjuman qatnashchilari Islom sivilizatsiyasi markaziga sayohat qilishdi
Xabar berganimizdek, 19-20 avgust kunlari Islom sivilizatsiyasi markazida O‘zbekiston musulmonlari idorasi tasarrufidagi oliy va o‘rta maxsus diniy ta’lim muassasalari professor-o‘qituvchilarining «Zamonaviy diniy ta’lim: pedagogika, ilm-ma’rifat va innovatsiya» nomli I ilmiy-amaliy anjumani bo‘lib o‘tmoqda.
Bugun, 19 avgust kuni ishtirokchilar kutib olinib, ularning Islom sivilizatsiyasi markaziga sayohati tashkil etildi. Tashrif davomida mehmonlar markazning boy ekspozitsiyalari, Qur’oni karim zali, nodir qo‘lyozmalar hamda buyuk ajdodlarimizning ilmiy merosiga bag‘ishlangan bo‘limlar bilan yaqindan tanishdi. Ayniqsa, zamonaviy multimedia loyihalari va tarixiy eksponatlar ularda chuqur taassurot qoldirdi.
Ustozlar Markazda amalga oshirilayotgan keng ko‘lamli ishlar islom ma’rifatini targ‘ib qilish hamda yosh avlodni milliy-diniy qadriyatlarga hurmat ruhida tarbiyalashda muhim ahamiyat kasb etishini e’tirof etishdi.
Shuningdek, ishtirokchilar O‘zbekiston musulmonlari idorasida ham bo‘lishdi. Hazrati Imom majmuasidagi tarixiy qadamjo va obidalarni ziyorat qilishdi.
Oqshomda Islom sivilizatsiyasi markazi binosida ma’rifiy dastur – mapping namoyish qilindi.
Mazkur tadbirlar islom sivilizatsiyasi merosini targ‘ib etish, diniy ta’lim tizimini yanada takomillashtirib, yangi bosqichga olib chiqishda salmoqli hissa bo‘lib qo‘shiladi.
O‘zbekiston musulmonlari idorasi Matbuot xizmati
