Mazhab desa, ensasi qotadiganlarga!
Xo‘p, mazhabda Abu Hanifa rahimahullohga ergashmas ekansan, “mazhab” so‘zini eshitsang, ensang qotar ekan.
“Qur’on va Sunnatga ergashaman” deb bor ovozing bilan baqirar ekansan.
Qani menga aytchi, sen o‘qiyotgan namozning shaklini qayerdan olgansan? Sunnatdan deb shoshqaloqlik qilma! Aldama! Sen falonchining kitobi yoki audio suhbatini eshitib, o‘shani bajaryapsan. Demak, mazhabni tan olmaganing bilan baribir kimnidir mazhabiga, yo‘liga ergashyapsan-ku! O‘sha odam aytgan ko‘rinishda namoz o‘qiyapsan-ku!
Endi savol: sen audiosini eshitayotgan, videosini ko‘rayotgan yoki kitobini o‘qiyotgan kishi ilmliroqmi yoki Payg‘ambarimiz sollallohu alayhi vasallam maqtagan davrda yashagan, sahobalarni ko‘rgan inson ilmliroqmi?
Buning javobini qalbingni to‘rida berib turibsan. Ammo kibring, qaysarliging o‘sha javobni tilga chiqarishga qo‘ymayapti.
Ko‘zingni kattaroq och! Hayot faqat feysbukdan iborat emas. Atrofingdagi maslakdoshlaringning “birodar”, “rijol” degan gaplari seni aldab qo‘ymasin!
Agar ustoz muhim bo‘lmaganda, Alloh taolo Qur’oni Karimni nozil qilib qo‘yib, bandalarga o‘zlari o‘qib, tushunib olishlarini amr qilgan bo‘lardi. Lekin undoq qilmadi. O‘sha insonlarning ichidan bir insonni tanlab olib, unga bandalariga aytmoqchi bo‘lgan amr va nahylarini yubordi. O‘sha tanlab olingan Payg‘ambar Alloh taoloning bandalariga Alloh taoloning murodini, risolatini yetkazib, ustozlik qildilar.
Payg‘ambarimiz sollallohu alayhi vasallamning nima amal qilganlarini eng yaxshi biluvchilar sahobai kiromlardir. Sahobai kiromlarning amallarini eng yaxshi biluvchilar tobeinlardir.
Imom Abu Hanifa rahimahulloh esa o‘sha tobeinlarning bir vakilidirlar.
Savol:
Kim ilmliroq?
Abu Hanifa rahimahullohmi yoki Ibn Taymiyami?
Abu Hanifa rahimahullohmi yoki Ibn Qayyimmi?
Abu Hanifa rahimahullohmi yoki Alboniymi?
Abu Hanifa rahimahullohmi yoki Ibn Bozmi?
Abu Hanifa rahimahullohmi yoki Usayminmi?
Abu Hanifa rahimahullohmi yoki Favzonmi?
Bu savolning javobi yana qalbing to‘rida deb o‘ylayman! Qaysarlikni bas qilib, e’tirof etilgan ulamolar, mujtahidlar yo‘liga ergash!
Talashib-tortishishni, bir-birini haqorat qilib, yerga urishni bas qil!
Alloh taolo barchamizni ulamolarga nisbatan bepisandlik qilishdan asrasin!
Barchamizni O‘zining hidoyatidan ayirmasin va xotimamizni chiroyli qilsin!
Nozimjon Hoshimjon
Saudiya Arabistonida o‘tkazilayotgan xalqaro Qur’on tanlovida 133 davlat vakillari ishtirok etmoqda
Qirol Abdulaziz nomidagi Qur’oni karimni yod olish, o‘qish va sharhlash bo‘yicha qirq oltinchi xalqaro tanlovning saralash bosqichi 7 avgust kuni Makka shahridagi musobaqalar o‘tkaziladigan joyda 133 davlatdan 334 nafar ishtirokchi (erkak va ayollar) ishtirokida boshlandi.
IQNA "Minbar" gazetasiga tayanib xabar berishicha, Qirol Abdulaziz nomidagi Qur’oni karimni yod olish, o‘qish va sharhlash bo‘yicha qirq oltinchi xalqaro tanlovning saralash bosqichi bir kun avval Makkadagi musobaqalar o‘tkaziladigan joyda boshlangan va final bosqichini Masjidul Haromda o‘tkazish uchun zamin tayyorlagan.
Saudiya Arabistoni Islom ishlari, da’vat va hidoyat vazirligi tomonidan tashkil etilgan ushbu tadbirning saralash bosqichida hakamlar hay’atlari eng yuqori aniqlik va shaffoflik standartlariga rioya qilgan holda, Qur’on tilovati uslublari va qoidalariga ixtisoslashgan taniqli xalqaro hakamlar guruhi nazorati ostida erkak va ayol ishtirokchilarning chiqishlarini tinglab, final bosqichiga kimlar o‘tishini aniqladi.
Tanlovning joriy bosqichi 133 mamlakatdan 334 nafar ishtirokchi (erkak va ayollar) ishtirokida o‘tkazilmoqda, ular besh toifa: "Shatibiya" usuli bo‘yicha yetti xil qiroat asosida Qur’oni Karimni to‘liq yodlash (qiroat va nazariy bilimlarni, shuningdek, tajvid qoidalarini a’lo darajada bajarish va rioya qilishni o‘z ichiga oladi); a’lo darajada ijro etish, tajvidga rioya qilish va so‘zlarni sharhlash bilan Qur’oni Karimni to‘liq yodlash; a’lo darajada ijro etish va tajvidga rioya qilish bilan Qur’oni Karimni to‘liq yodlash; a’lo darajada ijro etish va tajvidga rioya qilish bilan ketma-ket o‘n beshta juzni yodlash; a’lo darajada ijro etish va tajvidga rioya qilish bilan ketma-ket beshta juzni yodlash bo‘yicha bellashmoqda.
Vazirlik ushbu global qur’oniy tadbirning muvaffaqiyatini ta’minlash uchun elektron hakamlik tizimini joriy etish, ishtirokchilarni baholashda adolat va aniqlikni ta’minlash uchun tashkiliy va keng qamrovli platformani yaratish, shuningdek, ularga turli xil xizmatlarni taqdim etish kabi barcha imkoniyatlarini ishga solishda davom etadi.
Qirol Abdulaziz nomidagi xalqaro musobaqa dunyodagi eng yirik Qur’on musobaqalaridan biri hisoblanib, uning umumiy pul mukofotlari miqdori 10 million saudiya rialidan oshadi.
Mazkur musobaqada O‘zbekiston sharafini "Mir Arab" o‘rta maxsus islom ta’lim muassasasi, "Sayyid Muhiddin maxdum" o‘rta maxsus islom ta’lim muassasasi, Imom Buxoriy nomidagi Toshkent islom instituti hamda "Xadichai Kubro" qizlar o‘rta maxsus islom bilim yurti talabalari himoya qilishi haqida avval xabar berilgan edi.
O‘zbekiston musulmonlari idorasi Matbuot xizmati
