Bugun, 22 dekabr kuni O‘zbekiston Respublikasi Oliy Majlisi va xalq deputatlari Kengashlariga saylovlar bo‘lib o‘tdi.
O‘zbekiston musulmonlari idorasi raisi, muftiy Usmonxon Alimov hazratlari ham oila a’zolari bilan birgalikda Toshkent shahri Mirzo Ulug‘bek tumanidagi 162-saylov uchastkasiga tashrif buyurib, ovoz berish jarayonida qatnashdilar.
Ta’kidlash joizki, bu yilgi saylovlar har qachongidan ko‘ra faollik bilan yanada fayzli o‘tdi. Muftiy hazratlari ham oila a’zolarimiz bilan Mirzo Ulug‘bek tumanidagi 162-saylov uchastkasiga birga kelib, o‘zlariga ma’qul topgan nomzodlarga ovoz berdilar. Shundan so‘ng, muftiy hazratlari ushbu uchastka mas’ullari bilan suhbat qurib, mamlakatimizga tinchlik, xalqimizga farovonlik va saylov jarayonlari muvaffaqiyatli o‘tishini tilab, ezgu duolar qildilar.
O‘z navbatida aytish kerakki, bu yilgi saylovlarni muvaffaqiyatli o‘tishiga ulamolar, imom-domlalar va mudarrislar ham munosib hissa qo‘shdilar. Bugungi ovoz berish jarayonlarida diniy soha xodimlari, ayniqsa, imom-xatiblar ham faol ishtirok etib, barchaga namuna bo‘lganlarini alohida qayd etish kerak.
Darhaqiqat, saylovlar oldidan deputatlikka nomzodlar dilidagi shijoat, tayyorgarlik jarayonidagi jo‘shqinlik saylovchilarni ham faollikka undadi. Saylovoldi dasturlaridagi milliylikka alohida e’tibor qaratish, yoshlar ta’lim-tarbiyasini mustahkamlash va ijtimoiy sohani yanada rivojlantirish bilan bog‘liq rejalar katta ahamiyatga egadir.
Ma’lumki, oxirgi yillardagi diniy-ma’rifiy sohadagi ulkan o‘zgarishlar va xayrli islohotlar natijasida yangi masjid-madrasalarning ochilishi, mo‘min-musulmonlarga keng imkoniyatlar berilishi Yaratgan Parvardigorning yurtimizga bergan ulug‘ ne’matlari bo‘ldi.
Bugungi saylovlarda mo‘min-musulmonlarimizda kelajakka bo‘lgan ishonch va mamlakat taqdiriga daxldorlik hissi yanada kuchaygani yaqqol namoyon bo‘ldi.
Alloh taolo mamlakatimiz tinchligini barqaror va xalqimiz faravonligini yanada ziyoda aylasin.

O‘zbekiston musulmonlari idorasi Matbuot xizmati