Bugun O‘zbekistondagi Islom sivilizatsiyasi markazida taqdimot marosimi bo‘lib o‘tdi. Butun umrini ilmu fan ravnaqi yo‘lida sarflagan fidoyi olim, filologiya fanlar doktori Inoyatullo Suvonqulovdan meros bo‘lib qolgan kutubxonani olimning farzandi Matluba Inoyatullo qizi O‘zbekistonda Islom sivilizatsiyasi markaziga topshirdi.

Shu munosabat bilan tashkil etilgan taqdimot marosimida Sivilizatsiya markazi rahbarlari va xodimlari, O‘zbekiston musulmonlari idorasi raisining birinchi o‘rinbosari Homidjon Ishmatbekov, O‘zRFA Til va adabiyot instituti xodimlari akademik To‘ra Mirzayev, professor Ibrohim Haqqul va boshqa olimu ijodkorlar ishtirok etdilar.

Taqdimot marosimini Markaz rahbari Shoazim Minovarov kirish so‘zi bilan ochdi. So‘ng Markaz rahbari o‘rinbosari Shayx Abdulaziz Mansur, professor Ibrohim Haqqul, akademik To‘ra Mirzayevlar so‘zga chiqib, fidoyi olimning bebaho kitoblar jamlangan kutubxonasining ushbu Markazga topshirilgani juda ham savobli ish bo‘lgani, bu kitoblardan qanchadan-qancha ilm ahllari foydalanishlarini gapirib o‘tdilar.

O‘MI Matbuot xizmati