O`zbekiston musulmonlari idorasi

Imom Buxoriy majmuasi va Hadis ilmi oliy maktabiga tashrif

12.12.2019 2545 3 min.

12 dekabr kuni O‘zbekiston musulmonlari idorasi raisi, muftiy Usmonxon Alimov hazratlari va Din ishlari bo‘yicha qo‘mita raisi Abdug‘ofur Ahmedov Samarqand viloyatiga tashriflarining ikkinchi kuni Imom Buxoriy yodgorlik majmuasi ziyorati bilan boshlandi. Taomilga binoan o‘tganlarning ruhi poki haqiga Qur’on tilovat qilindi.
Shundan so‘ng Samarqand viloyatidagi Hadis ilmi oliy maktabiga borildi. Oliy ta’lim muassasasida 2019-2020 o‘quv yilining borishi, talabalar va pedagog-o‘qituvchilarga yaratilgan shart-sharoitlar va talabalarning bilim darajalari sinovdan o‘tkazildi.
Muhtaram Prezidentimiz shu yilning 11 yanvar kuni yangi maktab bilan tanishib, bu yerda talabalarga Imom Buxoriy, Imom Moturidiy, Burhoniddin Marg‘inoniy va boshqa buyuk allomalarimiz asarlarini puxta o‘rgatish borasida alohida to‘xtalgan edilar.
Shu munosabat bilan tashrif chog‘ida muftiy hazratlari va Din ishlari bo‘yicha qo‘mita raisi Abdug‘ofur Ahmedov Oliy maktab kafedralari faoliyati, o‘quv xonalari, kutubxona va ta’lim-tarbiya jarayonlarini olib borishning eng zamonaviy uslublari bilan yaqindan tanishdilar.
Tashrif chog‘ida oliy maktabda ta’lim sifati, o‘quv darsliklari turlari, xorijiy va mahalliy o‘qituvchilarga hamda talabalarga yanada qulayliklar tashkil etish bo‘yicha muhim tavsiyalar berildi.
Hadis ilmi maktabi faoliyatini tashkil qilish mamlakatimiz ma’naviy taraqqiyotining bugungi bosqichida muhim ahamiyat kasb etadi. Tashkil etilgan oliy ta’lim muassasa o‘z oldiga hadis ilmining ilmiy-nazariy asoslarini chuqur o‘rganish, xorijiy tillarni chuqur o‘rgatish, diniy qadriyatlarni asrab-avaylash, hadis ilmi ulamolari asarlarining tarjima va qiyosiy matnlarini tayyorlash, o‘zbek va xorijiy tillarda nashr etish, konferensiyalar tashkil etishdek katta vazifalarni qo‘ygan.
Muftiy hazratlari pedagog-o‘qituvchilar bilan muloqotda Hadis ilmi maktabida o‘qitish uslublarini takomillashtirish va xalqaro ilmiy markazlar bilan hamkorlikni rivojlantirish zarurligini alohida ta’kidladilar.
Ma’lumot o‘rnida, Hadis ilmi maktabida o‘qish muddati besh yil bo‘lib, kunduzgi ta’lim shaklida olib boriladi. Maktabga arab tilini puxta o‘zlashtirgan, hadislarni yod olishga salohiyati bo‘lgan o‘rta maxsus diniy ta’lim muassasalarining 10 nafar iqtidorli bitiruvchilari saralab olindi.
Maktabda hadisshunoslik fanlari bilan bir qatorda Qur’oni karim, fiqh, aqida, tafsir, islom tarixi kabi fanlar hamda xorijiy tillardan chuqur bilim beriladi.
Kelajakda Hadis ilmi maktabi bitiruvchilari diniy fanlar, xususan, hadis ilmi sohasida ta’lim berib, diniy tashkilotlarda imom-xatib, ilmiy xodim vazifalarida ishlashi, shuningdek, ilmiy-tadqiqot markazlarida ilmiy xodim sifatida faoliyat olib borishi ko‘zda tutilgan.
Bituruvchilar ta’limni o‘z ixtisosligiga ko‘ra, O‘zbekiston xalqaro Islom akademiyasi magistraturasida, tayanch doktorantura va doktorantura bosqichlarida davom ettirishlari mumkin.