O‘zbekiston musulmonlari idorasi raisi, muftiy Usmonxon Alimov hazratlari va Din ishlari bo‘yicha qo‘mita raisi Abdug‘ofur Ahmedov Buxoro viloyatiga safarlari mobaynida hududdagi yordamga muhtoj va jismoniy imkoniyati cheklangan kishilarni iliq so‘zlari ila ularning siniq ko‘ngillariga xursandchilik kiritdilar.
Mana shunday e’tiborga muhtoj, qalbi o‘ksik fuqarolarga “Vaqf” xayriya jamoat fondi tomonidan oziq-ovqat mahsulotlari, nogironlik aravachalari va pul mablag‘lari tarqatildi. E’tibordan masrur qalblar ko‘rsatilgan yordam va g‘amxo‘rlikdan mamnun bo‘lib, ko‘zlarida yosh ila minnatdorlik izhor qildilar.
Shuningdek, muftiy hazratlari boshchiligida uyma-uy yurib, yetim-yesirlar, kam ta’minlangan oilalar, e’tiborga molik insonlar holidan xabar olinib, ularga tuhfalar ulashildi va moddiy yordamlar ko‘rsatildi.
Mana shunday xayriya ishlari orqali shunday insonlarning siniq ko‘ngillarini ko‘tarib, dillariga mamnunlik ulashish har bir vijdonli inson uchun huzurbaxsh amallardan hisoblanadi.

O‘zbekiston musulmonlari idorasi Matbuot xizmati