Joriy yilning 24-noyabr kuni O‘zbekiston musulmonlari idorasi raisi, muftiy Usmonxon Alimov, O‘zbekiston Respublikasining Vazirlar mahkamasi huzuridagi Din ishlari bo‘yicha qo‘mita raisi Abdug‘ofur Ahmedovlar Andijon viloyatiga tashrif buyurib, viloyatda faoliyat ko‘rsatayotgan barcha imom – xatiblar ishtirokida yig‘ilish o‘tkazdi. Yig‘ilishda viloyat bosh imom-xatibi lavozimiga Andijon viloyatidagi "Sayyid Muhyiddin maxdum" o‘rta maxsus islom bilim yurti mudiri Mirzamaqsud domla Alimov Xatambekovichni Andijon viloyat bosh imom-xatibi lavozimiga tayinlangani e’lon qilindi.
Mirzamaqsud domla Alimov Xatambekovich 1973 yil Andijon viloyati Jalaquduq tumanida, ziyoli oilada tavallud topgan. 1996 yilda “Imom Buhoriy” Toshkent islom instituti tamomlagan.
Ish faoliyati davomida Mirzamaqsud domla Alimov Xatambekovich Jalaquduq tumanidagi “So‘fi qishloq” jome’ masjidi imom-xatibi, tuman bosh imom-xatibi, Andijon viloyat bosh imom-xatibi o‘rinbosari hamda "Sayyid Muhyiddin maxdum" o‘rta maxsus islom bilim yurti mudiri vazifalarida mehnat qilgan.
Mirzamaqsud domla Alimovga ushbu sharafli vazifada, xalqimizning diniy-ma’rifiy ehtiyojini ta’minlash yo‘lida Alloh taolodan kuch-quvvat so‘raymiz.
O‘MIning Andijon viloyati vakilligi matbuot xizmati
Namozga kirishda qo‘llar quloq barobarigacha ko‘tarilib, qo‘lning bosh barmog‘i quloqning yumshog‘iga yetkaziladi va "takbiri tahrima" aytib, namozga kiriladi. Qo‘llar ko‘tarilganda kaftning ichki tomoni qiblaga qaratilib, barmoqlar biroz ochilgan holatda bo‘ladi.
Namozga kirishda qo‘llar quloq barobarigacha ko‘tarilishi haqida bir qancha hadislar kelgan:
Voil ibn Hujr roziyalloxu anhu: "Men Nabiy sollallohu alayhi va sallamni namozga kirishda takbir aytib, qo‘llarini ko‘tarib, quloqlari barobariga ko‘targanlarini ko‘rdim", dedilar (Imom Muslim rivoyati).
Anas ibn Molik roziyalloxu anhu rivoyat qilgan hadisda: "Rasululloh sollallohu alayhi va sallam namozga kirishda takbir aytib, so‘ngra ikki qo‘llarini ko‘tarib, bosh barmoqlarini quloqlariga barobar qilar edilar" (Imom Hokim va Imom Doraqutniy rivoyatlari).
Ulamolarimiz: “Hadislarda kelgan "qo‘lni quloq barobariga ko‘tarish”dan maqsad uni quloqqa tekkizishdir, chunki quloqning yumshog‘iga qo‘l tegishi qo‘lning quloq barobariga ko‘tarilganining aniq belgisidir”, deganlar. Bu haqda “Raddul Muhtor”, “Lubob fiy sharhil kitob”, “Fatavoi Qozixon”, “Sharhul Viqoya”, “Majma’ul anhur” shu kabi bir qancha mo‘tabar fiqhiy kitoblarimizda bayon qilingan.
Uychi tuman "Xizirobod" jome masjidi
imom-xatibi Sherzod Rahimov
Manba: t.me/softalimotlar