Ushbu hayvon kamyob jonzotlardandir. Bu qo‘shtuyoqlilardan bo‘lib, kiyiklarning eng kichik turidir. Bu tur Janubi Sharqiy Osiyo va Afrika qit’asining markazida yashaydi. Osiyoda yashaydiganining vazni 8 kilogram, Afrikada yashaydiganining vazni 16 kilogram keladi. Uzunligi 85 santimetrni tashkil etadi. Oyoqlari kalta, erkagining qoziqtishlari bor bo‘lib, undan kurash paytida foydalanadi. Bu turdagi kiyiklarning ba’zisi suvda suza oladi. Ammo bularda boshqa kiyiklardagidek shoxlar yo‘q. Quloqlari sichqonning qulog‘iga o‘xshaydi. Dumi kalta, ko‘zlari katta bo‘ladi. Urg‘ochisining homiladorlik davri 5 oy bo‘lib, bitta bola tug‘adi. Bolasi taxminan 5 oyda voyaga yetadi. “Sichqonsimon kiyik” tunda ovqat izlaydi. Ular asosan daraxt barglari, gullar, mevalar va ko‘katlar bilan oziqlanadi. Xatar paytida tuyoqlarini yerga tez-tez urib, turdoshlarini xavfdan ogohlantiradi. Bu jonzot taxminan 14 yil yashaydi. Tabiatda juda oz qolgani uchun bugungi kunda qo‘riqxonalarda parvarish qilinadi.

Alloh taolo butun borliqni, shu jumladan barcha tirik jonzotlarni ham O‘zi yaratgan. U Zot Qur’oni Karimda shunday marhamat qilgan:

وَاللَّهُ خَلَقَ كُلَّ دَابَّةٍ مِن مَّاء فَمِنْهُم مَّن يَمْشِي عَلَى بَطْنِهِ وَمِنْهُم مَّن يَمْشِي عَلَى رِجْلَيْنِ وَمِنْهُم مَّن يَمْشِي عَلَى أَرْبَعٍ يَخْلُقُ اللَّهُ مَا يَشَاءُ إِنَّ اللَّهَ عَلَى كُلِّ شَيْءٍ قَدِيرٌ

“Alloh hamma jonivorni suvdan yaratdi. Bas, ulardan ba’zilari qorni bilan yuradir, ba’zilari ikki oyoq bilan yuradir va ba’zilari to‘rt (oyoq) bilan. Alloh O‘zi xohlagan narsani yaratur. Albatta, Alloh har bir narsaga qodirdir” (Nur surasi, 45-oyat).

Internet ma’lumotlari asosida Nozimjon Hoshimjon tayyorladi