Agar mo‘min bo‘lsangiz.....
Abu Hurayra roziyallohu anhudan rivoyat qilinadi:
Nabiy sollallohu alayhi vasallam: “Kim Allohga va oxirat kuniga iymon keltirgan bo‘lsa, mehmonini ikrom qilsin! Kim Allohga va oxirat kuniga iymon keltirgan bo‘lsa, qarindoshlari bilan aloqani tiklasin! Kim Allohga va oxirat kuniga iymon keltirgan bo‘lsa, yaxshi gap aytsin yoki jim tursin!” dedilar. (Muttafaqun alayh)
Sharx: Kim, Alloh taolo osmonlaru yerni yo‘qdan bor qilgan; osmonlaru yerdagi biror zarra ham Unga maxfiy bo‘lmagan, barchasini adadlari bilan bilib turuvchi; Undan oldin biror narsa bo‘lmagan, barcha narsalar yo‘q bo‘lib ketganda ham doimo bor bo‘lib turuvchi; biror narsadan ojiz qolmaydigan, barcha narsaga qodir; bandalariga hatto ular sanab ham chiqa olmaydigan darajada ko‘plab ne’matlarni ato qilib turuvchi; bandalarning hamdu sano aytib ulug‘lashlariga va qullik qilishlariga haqli bo‘lgan Zotdir, deb aniq ishonsa va bulardan tashqari Alloh taoloni Qur’on va sunatda bayon qilinganidek tanib olsa hamda Alloh taolo maxluqotlarni O‘zi xohlagan vaqtda ular istasinlar – istamasinlar, o‘limga bo‘ysundiradigan; O‘zigagina ma’lum bo‘lgan bir kunda bandalarni qayta tiriltirib, yaxshi amallariga mukofot va yomon amallariga jazo beradigan Zotdir, deb aniq ishonsa ushbu to‘rt nasihatga amal qilsin!
- Xonadoniga yoki huzuriga kelgan mehmonni hurmatini joyiga qo‘ysin. Mehmonni islom dini talab qilgandek, uning haqqini ado qilishlik ila ikrom qilsin!
- Musulmon uchun shari’at belgilab bergan qarindosh – urug‘lar bilan aloqani uzishdan saqlansin va ular bilan doimiy bordi keldi qilib, ularning moddiy va ma’naviy haqlarini ado qilishlik bilan siylai rahmni bog‘lasin!
- Allohning roziligiga sabab bo‘luvchi, ikki dunyosi obod bo‘lishgigiga, din va jamiyat rivoji uchun foyda keltiradigan, mo‘minlarni og‘irini yengil qiladigan, ularning qalbiga xursandchilik kiritadigan so‘zlarni gapirsin!
- Agar yaxshi gaplarni gapirish qo‘lidan kelmasa, loaqal yomon, xunuk, fahsh va behayo, insonlarni tafriqasiga va o‘zaro adovatiga, fitnaga sabab bo‘ladigan gaplarni gapirmasin!
Xulosa: Bu talab faqat mo‘minlar uchundir. Ushbu ishlar haqida Alloh taolo faqat mo‘minlardan hisob so‘raydi. Va bu amallarni qilgan mo‘minlarga ulkan ajrlar va mukofotlar beradi. Agar, mo‘min bo‘lsangiz ushbularga amal qiling! Mobodo, mo‘minlikni da’vo qilmasangiz, bu amallarni sizga aloqasi yo‘q.
Olmazor tumanidagi “Mevazor” masjidi imom noibi: Islomov Yorbek
Diniy ta’limda yangi bosqich: Toshkentda nufuzli anjuman bo‘lib o‘tmoqda
Toshkent shahridagi Islom sivilizatsiyasi markazining Katta majlislar zalida O‘zbekiston musulmonlari idorasi tasarrufidagi oliy va o‘rta maxsus diniy ta’lim muassasalari professor-o‘qituvchilarining «Zamonaviy diniy ta’lim: pedagogika, ilm-ma’rifat va innovatsiya» mavzusidagi I ilmiy-amaliy anjumani boshlandi.
O‘zbekiston musulmonlari idorasi tarixida ilk bor o‘tkazilayotgan ushbu nufuzli tadbirda Prezident maslahatchisi Muzaffar Komilov, Din ishlari bo‘yicha qo‘mita raisi Sodiqjon Toshboyev, muftiy Shayx Nuriddin Xoliqnazar hazratlari, Islom sivilizatsiyasi markazi direktori Firdavs Abduxoliqov, shuningdek, diniy ta’lim muassasalari rahbarlari, bosh imom-xatiblar va OAV vakillari ishtirok etmoqda. Anjumanga jami 700 nafarga yaqin pedagog va soha vakillari jalb etilgan bo‘lib, ularning 300 nafari bevosita zalda, 400 nafari esa hududlardan videoselektor orqali qatnashmoqda.
So‘zga chiqqan notiqlar so‘nggi yillarda Prezidentimiz tashabbuslari bilan diniy-ma’rifiy sohani takomillashtirish va zamonaviy kadrlar tayyorlash borasida amalga oshirilayotgan tizimli islohotlarga to‘xtalib o‘tmoqda. Ta’kidlanganidek, Mir Arab oliy madrasasi, Hadis ilmi maktabi, Imom Termiziy islom instituti va madrasasi hamda 4 ta xalqaro ilmiy-tadqiqot markazining tashkil etilishi ilm ahliga keng imkoniyatlar eshigini ochdi. Toshkent islom institutida magistratura ochildi, tizimdagi 510 nafar pedagogning 50 nafardan ortig‘i PhD va DSc ilmiy darajalariga ega bo‘ldi.
Shuningdek, yurtimizdagi diniy ta’lim muassasalariga Misrning Al-Azhar majmuasi ustozlari jalb etildi. 90 ta fan dasturi va yangi avlod darsliklari yaratildi. Mir Arab, Xadichai Kubro, Hidoya va Ko‘kaldosh madrasalari zamonaviy binolarga ega bo‘lib, Iordaniya, Misr va Birlashgan Arab Amirliklarining yetakchi oliy ta’lim muassasalari bilan hamkorliklar rivojlanmoqda.
Ushbu nufuzli anjumandan ko‘zlangan maqsad ham professor-o‘qituvchilar uchun ilmiy-amaliy muloqot maydonini yaratish, pedagoglarning kasbiy salohiyatini yuksaltirish, ta’lim jarayoniga raqamli va innovatsion usullarni keng joriy etishdir.
O‘zbekiston musulmonlari idorasi Matbuot xizmati
