Umra mavsumi boshlandi
Bugun, 14 noyabr kuni o‘zbekistonlik ziyoratchilarning dastlabki guruhi ezgu niyatlar ila ehtiromlar og‘ushida umra ibodatini ado etish uchun Saudiya Arabistoniga jo‘nab ketadilar. Shu bilan yurtimizda “Umra – 2019/20” mavsumi yaxshi kayfiyatda boshlanadi.
Ziyoratchilar o‘n kunlik umra safari davomida Madina shahrida 3 kun, Makka shahrida 7 kun bo‘ladilar. Ular mazkur shaharlarda barcha zarur sharoitlarga ega mehmonxonalarda istiqomat qiladilar hamda ularga tajribali ishchi guruhi, ellikboshilar va malakali shifokorlar xizmat ko‘rsatadi.
Tayyorgarlik doirasida barcha ziyoratchilar mavsumiy kasalliklarga qarshi emlanib, davlatimiz ramzi tushirilgan kamzul va sumkalar bilan ta’minlandi. Safar oldidan ularga umra safarining mohiyati, uni ado etishga doir masalalar guruh rahbarlari tomonidan tushuntirildi.
Saudiya Arabistonida viza berish tizimida yangi tizimning joriy etilishi ba’zi kechikishlarga sabab bo‘ldi. Shunga qaramasdan, olib borilgan sa’y-harakatlar natijasida, 2019 yilning 14 noyabr kunidan boshlab har kuni “Toshkent–Jidda–Toshkent” yo‘nalishida umra safari yo‘lga qo‘yildi. Ushbu mavsum 2020 yilning yoz oylariga qadar davom etadi.
Yurtdoshlarimiz hukumatimiz tomonidan taqdim etilayotgan qulay imkoniyatlardan unumli foydalanib, muborak ibodatlarini mukammal bajarishlarini Haq taolodan so‘raymiz.
Ma’lumot o‘rnida, Davlatimiz Rahbarining tashabbuslari bilan Umra ziyoratlari yil davomida kvotasiz amalga oshirilishi belgilanib, 2019 yilning 1 aprelidan e’tiboran haftasiga 7 ta reysda Umra safariga fuqarolarimizni yuborish boshlangan. Ushbu muddat ichida 28 mingga yaqin yurtdoshlarimiz Umra safarida bo‘lib qaytdilar.
Alloh taolo muborak zaminga yo‘l olayotgan ziyoratchilarimizning ibodatlarini maqbul aylasin!
O‘zbekiston musulmonlari idorasi Matbuot xizmati
To‘rtko‘lda obodonlashtirish va mehr-saxovat tadbirlari bo‘lib o‘tdi
O‘zbekiston musulmonlari idorasi va Din ishlari bo‘yicha qo‘mita hamkorligidagi “Ezgulik va ma’rifat targ‘ibotchilari” tashabbusi doirasida To‘rtko‘l tumanida amaliy tadbir bo‘lib o‘tdi. Jarayonlarni Qoraqalpog‘iston musulmonlari qoziyoti qozisi Bahramatdin Razov boshqarib bordi.
Tumandagi “Mulla Jumaboy” jome masjidida o‘tkazilgan tashkiliy yig‘ilishda qoziyot mas’ullari, bosh imom-xatiblar, hojilar va mahalla raislari jam bo‘ldi.
Davlatimiz rahbari tashabbusi bilan iyul oyining “Obodonlashtirish va mehr-saxovat oyligi” deb e’lon qilinishi munosabati bilan tumanda keng ko‘lamli ishlar amalga oshirildi. Xususan, imom-xatiblar va masjid qavmi boshchiligida ko‘chalar, masjid atroflari tozalandi. Shuningdek, imkoniyati cheklangan va nogironligi bo‘lgan fuqarolarning hovli-joylarida hashar yo‘li bilan obodonlashtirish ishlari olib borildi.
Ishchi guruh a’zolari To‘rtko‘l tumanidagi 10 ta masjid va 20 ta mahallaga biriktirilib, quyidagi xayrli amallar bajarildi:
-
Hojilarni jalb etgan holda mahallalardagi muammoli oilalar holidan xabar olindi;
-
Homiylar ko‘magida 120 ta ehtiyojmand xonadonga moddiy va ma’naviy yordam ko‘rsatildi;
-
Ko‘makka muhtoj oilalarning farzandlariga yangi o‘quv yili uchun maktab formalari tarqatildi;
-
Imom-xatiblarning faoliyati o‘rganilib, masjid boshqaruvi va ma’rifiy ishlarni yanada rivojlantirish bo‘yicha amaliy tavsiyalar berildi.
Tadbir yakunida amalga oshirilgan ishlar tahlil qilinib, hududda diniy-ma’rifiy muhitni sog‘lomlashtirish va aholini ijtimoiy qo‘llab-quvvatlash bo‘yicha kelgusidagi vazifalar belgilab olindi.
Qoraqalpog‘iston musulmonlari qoziyoti
Matbuot xizmati
