Quyida keltiriladigan fikrlar, hikmatlar saytlardan va ijtimoiy tarmoqlardagi turli sahifalardan olib tarjima qilingan.

Ey Robbim! Qalblarimizni nifoqdan, amallarimizni riyodan, tillarimizni yolg‘ondan, ko‘zlarimizni xiyonatdan poklagin!

Zero, Sen ko‘zlarning xiyonatini va qalblar yashirgan narsani bilasan.

*****

«Agar insonlarning qalblarini ko‘rishga imkoningiz bo‘lganda, har bir qalbda og‘riqli qissa borligini ko‘rgan bo‘lardingiz. Shunday ekan, bir-birimizga nisbatan rahmli bo‘laylik! Shoyadki, Alloh taolo bizga ham rahm qilsa!»

*****

Kim havoyi nafsni ulfat qilib olsa, qulaydi.

Kim taqvoni ulfat qilib olsa, yuksaladi.

*****

Qiyinchilik haqida gapiradilar va og‘riqlar to‘g‘risida yozadilar. Hatto botiniy aqllari mahzunlik uchun dastur ishlab chiqadi.

Ofiyat ne’matini anglamoqchi bo‘lsang, shifoxonaga bor.

Hurriyat ne’matini anglamoqchi bo‘lsang, qamoqxonaga bor.

Hayot ne’matini anglamoqchi bo‘lsang, qabristonga bor.

Mazkur joylardagi kishilarga nisbatan sening mahzunligingning vazni qancha?!

Ey Robbim! Ne’matlaring uchun O‘zingga hamd bo‘lsin!

*****

«Falonchining shogirdiman» deyishning o‘zi bilan shogird bo‘lib qolinmaydi. Avvalo, ustozning go‘zal xulqi, odobi, ilmi o‘zlashtiriladi va qoldirgan ilmiy merosiga, ko‘rsatmalariga amal qilishda bardavom bo‘linadi. Qolaversa, o‘sha olim ham uni shogirdim, deb bilishi kerak. «Falonchining shogirdiman» degan gapni brend kabi qilib olmaslik lozim. O‘sha olim bilan ko‘p birga bo‘lgan, hatto bir uyda ko‘p yil birga istiqomat qilgan insonlar bor, lekin o‘zlarini hadeb shogirdiman, shogirdiman deb ko‘z-ko‘z qilverishmaydi.

*****

«Ixtiro qildi» emas, «Kashf qildi» deyiladi! Inson hech qachon biror narsani yaratolmaydi, ya’ni yo‘qdan bor qilolmaydi, hosil qilolmaydi! Balki, bor narsani kashf qilishi, ya’ni bor narsadan hosil qilishi mumkin.

Internet materiallaridan to‘plab,

tarjima qiluvchi Nozimjon Iminjonov