Afg‘oniston hukumati ISHIDning tor-mor etilganini ma’lum qildi
Afg‘oniston Islom Respublikasi hududida ISHID terrorchilik tashkilotining bo‘linmalari butunlay yo‘q qilingan. Bu haqda mamlakat ichki ishlar vaziri vazifasini bajaruvchi Masud Andrabiy ma’lum qildi, deb yozmoqda (https://daryo.uz/k/2019/11/11/afgoniston-hukumati-mamlakat-hududida-ishidning-tor-mor-etilganini-malum-qildi/) «TASS».
«ISHID jangarilari mag‘lubiyatga uchradi va Afg‘onistonda butunlay tor-mor etildi», — deya ta’kidlagan Andrabiy mamlakat janubida joylashgan Nangarxar viloyatidagi politsiya boshqarmasi yangi rahbarini tanishtirayotgan vaqtda so‘zlagan nutqida. Vazirning so‘zlariga ko‘ra, ISHIDning kichik bo‘linmalari Afg‘oniston hukumati kuchlariga taslim bo‘lmoqda, mamlakatning boshqa hududlariga qochishga urinayotgan jangarilari esa maxsus operatsiyalarda davlat harbiy kuchlari tomonidan yo‘q qilinmoqda.
Shuningdek, Masud Andrabiy mahalliy aholi ham muntazam armiya kuchlarini qo‘llab-quvvatlayotgani va xorijning hech bir terrorchilik tashkilotiga Afg‘onistonda o‘z pozitsiyasini mustahkamlashiga aslo yo‘l qo‘ymasligini bildirdi.
O‘zbekiston musulmonlari idorasi Matbuot xizmati
"Xo‘jamulki" mahallasida obodlik va mehr-saxovat
Qumqo‘rg‘on tumanidagi "Xo‘jamulki" mahallasida "Mahallada obodlik va mehr-saxovat oyligi" doirasida keng jamoatchilik va aholi vakillari ishtirokida qizg‘in obodonlashtirish va bunyodkorlik ishlari olib borilmoqda. Bu tashabbus mahalla hayotiga yangicha ruh baxsh etib, hamjihatlik va ezgulik muhitini yanada mustahkamlamoqda.
Azaliy qadriyatlarimizdan biri bo‘lgan hashar an’anasi asosida mahalla ahli bir yoqadan bosh chiqarib, o‘z hududini yanada obod, fayzli va ko‘rkam maskanga aylantirish yo‘lida fidokorona mehnat qilmoqda. Har bir fuqaroning qalbida Vatanga muhabbat, mahallaga ehtirom tuyg‘usi jo‘sh urib, ular bunyodkorlik ishlariga faol hissa qo‘shmoqdalar.
Xususan, mahalla hududidagi muqaddas qadamjolardan biri – "Xo‘jamulki ota" qabristonida keng ko‘lamli tozalash va obodonlashtirish ishlari amalga oshirilmoqda. Hashar ishtirokchilari tomonidan qabriston hududi begona o‘tlar va chiqindilardan puxta tozalanib, qabr ustilari tartibga keltirilmoqda. Shuningdek, ziyoratchilar uchun qulay sharoitlar yaratish borasida zarur ishlar olib borilib, ajdodlar xotirasiga chuqur ehtirom ko‘rsatilmoqda.
Bu kabi ezgu tashabbuslar mahallada obodlik va hamjihatlik muhitini mustahkamlash bilan birga, ajdodlarimiz xotirasiga bo‘lgan hurmatimizni namoyon etadi. Ayni paytda, yosh avlodga milliy qadriyatlarimizni singdirish, ularni Vatanga muhabbat va mehnatsevarlik ruhida tarbiyalashda beqiyos ahamiyatga egadir. Bugungi hashar – kelajak avlod uchun namuna, ertangi kun uchun mustahkam poydevordir.
O‘zbekiston musulmonlari idorasi
Surxondaryo viloyati vakilligi Matbuot xizmati
