Xabaringiz bor, mamlakatimiz bo‘ylab ketma-ket masjidlarning yangidan barpo etilgan binolari foydalanishga topshirib kelinmoqda. Albatta bularning barchasi ixlosi baland xalqimiz, oramizdagi Allohning baytini obod qilishga haris bo‘lgan kishilarning hashari, fidokorona mehnatlari evaziga amalga oshirilmoqda.

Andijon viloyati Asaka tumanidagi “Hazrati Usmon” jome masjidi joriy yilda yangidan qurib bitkazilgan masjidlardan biridir.

“Masjidimizning avvalgi holatida ibodatlarni emin-erkin ado etishning imkoni yo‘q edi. Alhamdulillah, bugunga kelib, masjidda zamon talablari asosida namozxonlarga barcha shart-sharoitlar yaratildi”, deyi imom-xatib Xursandbek Kamolov.

Loyihada milliy va zamonaviy masjidlarning me’moriy uslublari uyg‘unligiga alohida e’tibor qaratilgan. Xususan mehrob qismi Qo‘qon naqsh maktabi va Tabriz naqsh san’ati uyg‘unligidagi betakror ansamblni tashkil etgan.

Asosiy xonaqoh ancha baland qilib qurilgan bo‘lib, yerto‘la qism bilan birga ikki qavatli masjid qiyofasini ko‘rsatadi. Pastki va yuqori qismdagi asosiy xonaqoh 700 dan ortiq namozxonni o‘z bag‘riga sig‘dirsa, ustki qismi yopilgan keng hovlida yana 300-400 kishi barcha mavsumda ibodat qilishlari mumkin.

O‘zbekiston musulmonlari idorasi Masjidlar bo‘limi