Namoz saboqlari: Tayammum (Audio)
Alloh taolo bunday marhamat qiladi: «Bordiyu, betob yo safarda bo‘lsangiz yoki sizlardan birortangiz hojatxonadan chiqqan bo‘lsa yoxud xotinlaringiz bilan yaqinlik qilgan bo‘lsangiz-u, (g‘usl qilishga) suv topa olmasangiz, pokiza yer (tuproq, tosh, qum, chang kabilar) bilan tayammum qilib, yuzlaringiz va qo‘llaringizga surting. Albatta, Alloh afv etuvchi va kechiruvchidir» (Niso surasi, 43-oyat).
Tayammum qilishda tahoratga yoki g‘uslga niyat qilinadi. Har ikkisini qo‘shib niyat qilish ham mumkin.
Tayammum olish tartibi quyidagichadir:
- Yenglarni tirsaklarigacha shimarib, «Poklanib namoz o‘qish uchun tayammum qilishga niyat qildim», deb ko‘ngildan o‘tkaziladi.
- «Bismillahir rohmanir rohiym», deyiladi va qo‘llar, barmoqlari orasi ochiq holda, tuproq yoki tuproq jinsidan bo‘lgan biror narsaga bir marta uriladi.
- Qo‘llarning ichi (kaft) bilan yuzning yuviladigan qismi mas'h qilinadi.
- Qo‘llarni ikkinchi bor tuproq yoki tuproq jinsidan bo‘lgan narsaga urib, chap qo‘lning kafti va barmoqlari bilan o‘ng qo‘l tirsagi bilan qo‘shib, o‘ng qo‘l kafti va barmoqlari bilan chap qo‘l tirsagi bilan qo‘shib mas'h qilinadi.
Tayammumda to‘rtta farz bor:
- Niyat;
- Pok tuproq yo uning jinsidan bo‘lgan narsaga tayammum qilish;
- Ikki qo‘lni pok tuproqqa yo boshqa narsaga urib yuzga surish;
- Qo‘llarni yana tuproqqa urib, tirsaklari bilan qo‘shib qo‘llarga surish.
Tayammumni buzadigan hollar:
- Tahoratga yetarli suv topilishi;
- Badandagi yara yoki (boshqa) uzr tufayli tayammum olgan kishidan uzrning ketishi;
- Tahoratni buzadigan barcha hollar tayammumni ham buzadi.
O‘MI matbuot xizmati
O‘zbekiston turistik kompaniyalari Ar-Riyozdagi xalqaro ko‘rgazmada ishtirok etdi
Saudiya Arabistoni poytaxtida “WTM Spotlight Riyadh 2026” xalqaro turistik ko‘rgazmasi bo‘lib o‘tdi. Unda O‘zbekiston turizm industriyasi vakillari ishtirok etdi, deb xabar bermoqda “Dunyo” AA.
Mamlakatimiz turistik salohiyatini «Asialuxe Travel», «Zamin DMC» va «Bazar Travel» kompaniyalari namoyish etdi. Ular ko‘rgazmaning ishbilarmonlik dasturida faol ishtirok etib, Saudiya Arabistoni hamda boshqa xorijiy davlatlar turizm sohasi vakillari bilan bir qator samarali uchrashuvlar o‘tkazdilar.
“WTM Spotlight Riyadh” Saudiya Arabistoni turizm bozorining xalqaro hamkorlar bilan o‘zaro aloqalari uchun asosiy professional maydonlardan biriga aylandi. Ko‘rgazma turoperatorlik biznesi, qabul qiluvchi kompaniyalar, mehmonxona sektori, aviatsiya tarmog‘i, turistik texnologiyalar va industriyaning boshqa yo‘nalishlari vakillarini birlashtirdi. Tadbirda mintaqaviy va xalqaro tashrif buyuruvchilar, 450 dan ortiq eksponentlar hamda 30 dan ortiq mamlakat vakillari qatnashdi.
Uch kun davomida o‘zbekistonlik kompaniyalar vakillari saudiyalik turoperatorlar, turistik agentliklar va bozorning boshqa ishtirokchilari bilan muzokaralar o‘tkazdilar. Muloqotlarda sheriklik dasturlarini rivojlantirish, Saudiya Arabistonidan O‘zbekistonga sayyohlar oqimini oshirish hamda yangi qo‘shma turistik mahsulotlarni shakllantirish imkoniyatlari muhokama qilindi.
O‘zbekistonni madaniy-ma’rifiy, oilaviy, premium va individual turizm uchun jozibador yo‘nalish sifatida targ‘ib qilishga alohida e’tibor qaratildi. Saudiyalik hamkorlarga Samarqand, Buxoro, Xiva, Toshkent va mamlakatimizning boshqa hududlarining turistik imkoniyatlari, Buyuk ipak yo‘lining tarixiy merosi, zamonaviy mehmonxona infratuzilmasi, milliy taomlar hamda individual va guruhli turistik dasturlarni tashkil etish imkoniyatlari namoyish etildi.
O‘zbekiston turizm tarmog‘i vakillari, shuningdek, saudiyalik hamkorlar bilan sayyohlarni kutib olishni tashkil etish, Ko‘rfaz mamlakatlaridan keluvchi sayohatchilarning afzalliklarini hisobga olgan holda ixtisoslashtirilgan yo‘nalishlarni ishlab chiqish hamda Saudiya Arabistoni bozorida O‘zbekistonning turistik salohiyatini yanada targ‘ib qilish masalalarini muhokama qildilar.
O‘zbek turistik kompaniyalarining “WTM Spotlight Riyadh 2026” ko‘rgazmasidagi ishtiroki podshohlik turistik biznesi vakillari bilan bevosita aloqalarni kengaytirish va hamkorlikning yangi yo‘nalishlarini izlash uchun qo‘shimcha imkoniyat bo‘ldi.
O‘zbekiston musulmonlari idorasi Matbuot xizmati
