Siz baxt izlab butun olamni kezib chiqasiz. U esa doim yonginangizda, har qanday insonning qo‘li yetadigan masofadadir...
Goratsiy
Odamlar baxtli yashamoq uchun yaratilganlar, binobarin, kimda-kim o‘zini baxtiyor sanar ekan, “Xudoning aytganlarini bajo keltirdim!” demoqlikka haqlidir.
***
Odam o‘zining baxtli ekanini bilmagani uchun ham baxtsizdir.
Fyodor Dostoyevskiy
Kimgadir baxtli ko‘ringan emas, balki o‘zini baxtli sezgan odam baxtlidir.
Publiy Sir
Baxt – boylikda, desangiz, hamma baxtsiz. Chunki aqlliga ko‘p narsa kerak emas, ahmoq esa baribir to‘ymaydi.
Asqad Muxtor
Baxt yillar, oylar, haftalar va hattoki kunlar ichida yashiringan emas, uni har bir lahzada topish mumkin.
Baxt izlab uzoqlarga ketma. Shunday bir ish qilginki, baxt huzuringga kelsin.
Sitseron
***
Ko‘ngli tilag‘an murodig‘a yetsa kishi,
Yo barcha murodlarni tark etsa kishi.
Bu ikkisi muyassar o‘lmasa gar olamda,
Boshni olib bir sorig‘a ketsa kishi!
Zahiriddin Muhammad Bobur
***
Baxtsizlikdan qo‘rqqan kishining yoniga baxt yaqin kelmaydi.
***
Dunyoda baxt va baxtsizlik tushday bir narsadir. Ko‘zni yumib ochguncha hammasi o‘tib ketadi.
Nizomiddin Mir Alisher Navoiy. “Hayratul abror”.
***
Aleksandr Soljenitsin (rus yozuvchisi):
“- Men Amerikaga borsam, juda baxtli bo‘laman, deb o‘ylagan edim. Afsuski, bu yerda ham ruhiy bo‘shliqni his etyapman. Sizlar ortiq moddiyatning asiriga aylangansiz. Ha, bu yerda hurriyat bor. Har kim istaganini qila oladi. Ammo hamma moddiyatga e’tibor beradi, ruhiyat bilan qiziqmaydi. Hammaning ruhi bo‘m-bo‘sh. Xolbuki, insonni inson qilgan jism emas, balki uning pok aslli komil ruhidir. Sizga tavsiyam shuki, ruhingizni o‘stiring, uni go‘zallashtiring! Faqat o‘shandagina mamlakatingizda mavjud bo‘lgan va sizni qiynayotgan salbiy holatlar barham topadi. Dinni mahkam tuting! Din ruhning ozuqasidir. Dinga sodiq insonlar har yerda sizga yordam qo‘lini uzatadilar. Chunki Tangridan qo‘rqish hissi ularni doimo to‘g‘ri yo‘lda tutib turadi.
Insonlarni yomonliklardan qaytaradigan kuch politsiya emas, bu kuch Tangri nazdidan hosil bo‘lgan kuchdir”.
***
Ilmiy kuzatishlardan ma’lum bo‘lishicha, yolg‘iz kishilarga nisbatan oilalilar, dahriylarga nisbatan taqvodorlar o‘zlarini baxtliroq his etadilar.
***
Baxtimizning o‘ndan to‘qqiz ulushi sog‘lig‘imizga bog‘liq.
***
O‘z uyida baxtli bo‘lgan kishilargina baxtlidir.
Baxtli oilalarning hammasi bir-biriga o‘xshaydi, baxtsiz oilalarning har biri esa alohida baxtsizdir.
L.Tolstoy
Manbalar asosida Saidabror Umarov tayyorladi
Shukuh
Mamlakatimizda muborak Qurbon hayitini ko‘tarinki kayfiyatda nishonlash yaxshi an’anaga aylangan. Bayram kunlari yurtimizda mehr-oqibat, insonparvarlik, shukronalik, saxovat va bag‘rikenglik kabi xalqimizga xos ezgu fazilatlar yanada yorqin namoyon bo‘ladi.
Ushbu muborak ayyomda qarindosh-urug‘lar, yaqinlar, yolg‘iz keksalar holidan xabar olinadi, ko‘makka muhtoj insonlarga yordam beriladi, qisqacha aytganda, jamiyatda birdamlik va ahillik muhiti yana ham mustahkamlanadi.
Kezi kelganda, bugun mamlakatimiz yangi taraqqiyot bosqichiga chiqqanini, barcha sohalar qatori diniy-ma’rifiy jabhada ham ko‘plab islohotlar amalga oshirilayotganini, yutuqlarga erishilayotganini alohida qayd etish lozim.
Yangi O‘zbekistondagi bu muvaffaqiyatlar zamirida fuqarolarning vijdon erkinligi huquqlarini ta’minlash borasidagi yangilik va yengilliklarni alohida qayd etish, xususan, ikki muhim hujjatni eslab o‘tish lozim.
Birinchisi — “O‘zbekiston Respublikasida fuqarolarning vijdon erkinligini ta’minlash va diniy sohadagi davlat siyosati konsepsiyasini tasdiqlash to‘g‘risida”gi Qonun, ikkinchisi — Prezidentimizning “Fuqarolarning vijdon erkinligi huquqi kafolatlarini yanada mustahkamlash hamda diniy-ma’rifiy sohadagi islohotlarni yangi bosqichga olib chiqish chora-tadbirlari to‘g‘risida”gi Farmoni. Ushbu ikki muhim hujjat tom ma’noda diniy-ma’rifiy soha samaradorligini yangi bosqichga olib chiqishning mustahkam huquqiy asosi bo‘ldi.
Farmonga asosan, ko‘hna Buxoroda Bahouddin Naqshband ilmiy-tadqiqot markazi tashkil etildi. Bu xalqimiz, xususan, diniy-ma’rifiy soha vakillari uchun katta xushxabardir. Ushbu markaz tom ma’noda buyuk ajdodimiz Bahouddin Naqshband va naqshbandiylik tariqati allomalarining yuksak insonparvarlik g‘oyalarini ilmiy asosda o‘rganish, yosh avlodni bag‘rikenglik hamda o‘zaro hurmat ruhida tarbiyalashda muhim o‘rin tutadi. Shuningdek, tasavvuf ta’limoti tarixi va uning bugungi kundagi ahamiyatini ilmiy tadqiq etish, “Yetti pir” allomalari va aziz avliyolarning boy ilmiy-ma’naviy merosini xalqaro maydonda keng targ‘ib qilish kabi asosiy vazifalarni bajaradi. Naqshbandiylik ta’limotining ezgu g‘oyalarini tadqiq etish uchun ilmiy-nazariy va uslubiy masalalarga bag‘ishlangan anjuman, konferensiya, ko‘rgazma, seminar-trening, tanlovlar hamda boshqa madaniy-ma’rifiy tadbirlar tashkil etadi. Tasavvuf ta’limotining ilmiy asoslangan g‘oyalarini targ‘ib qiladi va soxta tariqatchilikning oldini olish bo‘yicha tavsiyalar ishlab chiqadi.
Sirasini aytganda, ushbu markaz ham Imom Buxoriy, Imom Termiziy, Imom Moturidiy xalqaro ilmiy-tadqiqot markazlari hamda O‘zbekistondagi Islom sivilizatsiyasi markazi singari uchinchi Renessansni qaror toptirish yo‘lidagi yana bir mustahkam ilm va aql markazi bo‘ladi, albatta.
Shu o‘rinda, O‘zbekiston Prezidentining Qurbon hayiti munosabati bilan yo‘llagan tabrigida ta’kidlanganidek, buyuk tariximiz va madaniyatimiz durdonalarini, mashhur allomalarimizning boy merosini to‘plash va keng targ‘ib etishga alohida e’tibor qaratilmoqda. Jumladan, ko‘hna Sharq mo‘jizasi — Samarqand shahri 2025 yilda Islom madaniyati poytaxti, deb e’lon qilindi, ulug‘ vatandoshimiz Imom Moturidiyning 1155 yillik tavallud sanasi yurtimiz bo‘ylab keng nishonlanmoqda.
Poytaxtimizda bunyod etilayotgan O‘zbekistondagi Islom sivilizatsiyasi markazi ilmiy-ma’naviy yo‘nalishdagi ulkan va noyob loyiha sifatida el-yurtimiz hamda xalqaro jamoatchilikda katta qiziqish uyg‘otmoqda. Bu muazzam maskan ko‘p ming yillik qadimiy tariximiz, boy va betakror milliy madaniyatimizning yorqin timsoli sifatida yangi O‘zbekiston hayotidagi g‘oyat muhim voqeaga aylanajak, albatta.
Shukrki, maqtansak arziydigan bu kabi xushxabar va yangiliklar bisyor. Ayniqsa, ayni hayit kunlarida bu yurtdoshlarimiz kayfiyatini yanada ko‘tarishi, bayramga o‘zgacha shukuh qo‘shishi muqarrar.
Kezi kelganda aytish joizki, muborak Qurbon hayitining ahamiyati yangi O‘zbekistonda ijtimoiy davlat barpo etish jarayonlari hal qiluvchi bosqichga kirayotgan bugungi sharoitda tobora ortib bormoqda. Bu muborak kunda yaqinlar bilan ko‘rishish, uzoqlashgan do‘stlar bilan yarashish, qarindosh-urug‘larga ziyoratga borish — barchasi mehr-oqibat va insonlar o‘rtasidagi uzviy aloqalarni mustahkamlaydi.
Hayit faqat bayramgina emas, balki ming yillar davomida shakllangan qadriyatlarimiz tarannumi hisoblanadi. Odatda ushbu ayyomda hamma bir-birini bayram bilan samimiy muborakbod etadi, qurbonliklar qilinadi. Qurbonlik go‘shtidan va taomidan ehtiyojmand, kam ta’minlangan insonlar, turli millat va din vakillariga ulashiladi. Bu, o‘z navbatida, saxiylik, shukronalik, jamiyatdagi tenglikni ta’minlashga qaratilgan ulkan ibrat hamda muhtojlar, yetim-yesirlar va e’tiborga muhtoj insonlar haqida qayg‘urishning amaliy ifodasi, qolaversa, o‘zaro mehr-oqibat rishtalarining yanada mustahkamlanishiga sabab bo‘ladi.
Hayit ayyomingiz muborak bo‘lsin!
Homidjon ISHMATBЕKOV,
O‘zbekiston musulmonlari idorasi raisi o‘rinbosari.