Allohga beadad hamdu sanolar bo‘lsinkim, diniy adabiyotlarimiz ko‘payib, xalqimizning diniy bilimlarga bo‘lgan ehtiyoji qondirilmoqda.
Joriy yilning 29 oktyabr kuni «Jo‘ybori Kalon» ayol-qizlar o‘rta maxsus islom bilim yurtida «Hilol-nashr» tomonidan taqdim qilingan kitoblarning taqdimoti bo‘lib o‘tdi.
Odatdagidek, taqdimot marosimi Qur’oni Karim tilovati va xayrli duolar bilan boshlandi. Bilim yurti ma’naviyat va ma’rifat ishlari bo‘yicha mudir o‘rinbosari Rohat Muhammadshoyeva “Hilol-nashr” faoliyati va undagi nashr qilingan aksar kitoblarning yozilish tarixi, ularning yozilishiga turtki bo‘lgan omillar haqida gapirib berish uchun so‘zni bilim yurti mudiri Azizxo‘ja Inoyatovga berdi.
Bilim yurti mudiri Azizxo‘ja Inoyatov fazilatli shayximiz Muhammad Sodiq Muhammad Yusuf rohimahullohning bugunga qadar nashr etilayotgan kitoblari haqida to‘xtalib, kitoblarning o‘ziga xos xususiyatlari, tarkibi haqida batafsil ma’lumot berdi, har bir o‘zbek xonadonida shu kabi kitoblar bo‘lishi lozimligini ta’kidladi.
Bilim yurti ARM rahbari Go‘zal Najmiddinova tomonidan talabalarga kitoblarni o‘qish uchun tartibli usullari va yo‘nalishlarini eslatib o‘tdi.
Taqdimot davomida ushbu nashrlar ustida ko‘p kishilik ijodiy jamoa ishlagani, jumladan musavvirlar, dizaynerlar, texnik mutaxassislar, sahifalovchilar kitobga o‘zgacha mehr bergani holda nashrga tayyorlashgani, bosmaxona jamoasi ushbu kitoblarning yuqori sifatda bosilishida alohida jonbozlik ko‘rsatishgani alohida e’tirof qilindi.
Bilim yurti talabalari Hazratning «Tafsiri Hilol», «Xislatli hikmatlar», «Islom tarixi», «Zikr ahlidan so‘rang» kabi bir qator kitoblariga ko‘z yugurtirar ekan, kutubxonalari qanday ulkan xazina bilan boyiganidan mamnun bo‘ldilar.
Ustoz Azizxo‘ja Inoyatov bugungi tadbirda taqdim etilayotgan kitoblarning mualliflarini, nashriyot xodimlari va ularning chop etilishida o‘z hissasini qo‘shgan barcha xodimlarni va avvalo, hazratimiz shayx Muhammad Sodiq Muhammad Yusuf rahimahulloh hamda u kishining xayrli ishlarini davom ettirayotgan o‘g‘illari Ismoil Muhammad Sodiq haqlarida duoi xayrlar va samimiy tashakkurini izhor qildi.
Rohat Muhammadshoyeva
Bilim yurti mudarrisasi
Savol: Chatgpt (sun’iy intellekt) orqali diniy savollarimizga javob olsak bo‘ladimi, shu javoblarga amal qilsak bo‘ladimi?
Javob: Bismillahir Rohmanir Rohiym. Yo‘q, bu joiz emas. To‘g‘ri, Chatgpt platformasi ayrim sohalarda insonlarga foyda bermoqda. Ammo diniy savollarga to‘g‘ri javob berishga ojizlik qiladi. Chunki u ham inson omili tomonidan ishlab chiqilgan bir mahsulot. Qolaversa, ba’zan savollarga taxminiy javoblar, hatto bu masala falon kitobda bor deb, arabiy iboralar ham berishi mumkin. Lekin u keltirgan iboralar na u aytgan kitobda va na boshqa fiqhiy manbalarda uchramaydi. Shu bois shar’iy masalalarga ahli ilm, mutaxassislarga murojaat qilish orqali yechim topish darkor. Alloh taolo oyati karimada bunday marhamat qilgan:
فَاسْأَلُوا أَهْلَ الذِّكْرِ إِنْ كُنْتُمْ لَا تَعْلَمُونَ
“Agar bilmaydigan bo‘lsangiz, zikr ahlidan so‘rangiz!” (Anbiyo surasi, 7-oyat).
Musulmon odam biror narsani bilmay qolsa, uni biladigan kishidan, o‘sha sohaning «zikr ahli»dan o‘rganishi lozim bo‘ladi. Shunday ekan, e’tiqod va dinu-diyonatga tegishli narsalarni ham shu sohaning bilimdonlaridan so‘rash talab etiladi. Buyuk tobeiy Ibn Sirin rahimahulloh bunday deganlar:
إن هذا العلم دين فانظروا عمن تأخذون دينكم. رواه مسلم
“Albatta, bu ilm dindir. Bas, diningizni kimdan olayotganingizga qaranglar” (Imom Muslim rivoyati).
Mazkur iboraning sharhida Mulla Ali Qori rahimahulloh bunday deganlar:
“Bu ilm” so‘zidan murod Rasululloh sollallohu alayhi vasallam ummatga olib kelgan Qur’oni karim va hadisi sharifdan iborat bo‘lgan ta’limotdir. Uni ishonchli va adolatli zotlardan olmoqdamisiz yoki yo‘q, shunga nazar solinglar, ya’ni qayerdan, kimdan ilm olayotgangizni aniq bilinglar”. (“Mirqotul mafotih” kitobi). Vallohu a’lam.
O‘zbekiston musulmonlari idorasi
Fatvo markazi.