Mavlidi sharif oyi muborak bo‘lsin!
Bismillahir Rohmanir Rohiym.
Muhammad sollallohu alayhi vasallamni butun olamlarga rahmat qilib yuborgan Alloh taboraka va taologa hamdu sanolar bo‘lsin!
Go‘zal axloq, chin insoniylikni ummatlariga ta’lim berib, o‘z shaxsida namoyon etgan Hazrati Payg‘ambarimiz sollallohu alayhi vasallamga durudu salavotlar bo‘lsin!
Qadrli yurtdoshlar, O‘zbekiston musulmonlari idorasi va o‘z nomimdan Sizlarni ulug‘ ayyom – Hazrati Payg‘ambarimiz Muhammad Mustafo sollallohu alayhi vasallam tavallud topgan Rabiul avval – Mavlid oyi munosabati bilan chin qalbdan, samimiy muborakbod etamiz.
Alloh taologa hamdu sanolar bo‘lsinki, bizni ushbu kunlarga yetkazdi. Bu oyda mo‘min-musulmonlar sevikli Nabiyimiz sollallohu alayhi vasallamni yanada ko‘proq tanishga kirishadilar, shu maqsadda mavlid marosimlarini o‘tkazadilar, bu borada yozilgan asarlarni ixlos bilan o‘qishni boshlaydilar. Majlislarda xatmi Qur’onlar qilinib, Mavlid kitoblaridan baytlar o‘qilib, uning ma’nolari xalqqa tushuntiriladi.
So‘nggi yillarda Islom dinini ravnaq toptirish, diniy qadriyatlarni targ‘ib etish borasida mamlakatimizda juda ko‘p ishlar qilinmoqda. Imom Buxoriy va Imom Termiziy nomlaridagi xalqaro ilmiy markazlar, Islom sivilizatsiyasi markazi, Xalqaro islom akademiyasi, Hadis ilmi maktabi kabilarning tashkil etilgani va yangidan-yangi masjid-madrasalar ochilayotgani shu yo‘ldagi ulkan qadamlar bo‘ldi.
Joriy yilda aziz avliyo zot Suzuk ota hamda marhum va mag‘fur Shayx Muhammad Sodiq Muhammad Yusuf nomidagi masjid-majmualar hamda bir qator yangi jomelarning qurib bitkazilib, mo‘min-musulmonlar ixtiyoriga topshirilishi xalqimiz qalbiga katta surur bag‘ishladi.
Bizlar shunday berilgan ne’matlarning qadriga yetib, dinimiz rivojiga ko‘rsatilayotgan sharoitlarni Alloh taboraka va taoloning ulug‘ marhamati deb qabul qilishimiz, buning shukronasini hamisha ado etishimiz lozim.
Bunday ulug‘ savobli ishlarga bosh bo‘lgan muhtaram Prezidentimiz va bu ishlarga samimiy yondoshgan mutasaddilarga mo‘min-musulmon xalqimiz nomidan cheksiz minnatdorlik izhor qilamiz.
Muhtaram mo‘min-musulmonlar, Mavlid oyida Hazrati Payg‘ambarimiz sollallohu alayhi vasallamga ko‘p salavot va salomlar yo‘llash lozim. Nabiy alayhissalomga salavot aytishni Alloh taolo Qur’oni karimda biz ummatlarga buyurib, shunday degan:
“Albatta, Alloh va Uning farishtalari Payg‘ambarga salavot ayturlar. Ey, mo‘minlar! (Sizlar ham) unga salavot va salom aytingiz!” (“Ahzob” surasi 56-oyat).
“Ummatim!” deb yashagan suyukli Payg‘ambar alayhissalomga salavot aytish juda savobli amal hisoblanib, unga targ‘ibotlar bisyordir. Hadisi sharifda shunday deyilgan:
“Kim menga bir marta salavot aytsa, Alloh unga o‘n marta rahmat yo‘llaydi. Uning o‘nta gunohi o‘chiriladi. O‘n daraja martabasi ko‘tariladi” (Imom Ahmad va Imom Nasoiy rivoyatlari).
Yana bir hadisi sharifda shunday marhamat qilingan:
“Kim menga ertalab o‘n marta, kechqurun o‘n marta salavot aytsa, Qiyomat kuni men uni shafoat qilaman” (Imom Tabaroniy rivoyatlari).
Demak, Rasululloh sollallohu alayhi vasallamga bo‘lgan muhabbatimizning isboti sifatida doimo salavot aytib yurishga odatlanishimiz juda ham katta fazilatdir.
Har birimiz Muhammad alayhissalomning siyratlari va hayotlarini yanada kengroq o‘rganib, barcha ish va amalimizda U Zotga ergashish, xulqlariga muvofiq hayot kechirishimiz kerak.
Aziz vatandoshlar, bu oyda Rasululloh sollallohu alayhi vasallamga ko‘proq salavotlar aytib, u zotning siyratlarini mukammal o‘rganishlikka Alloh taoloning O‘zi nasib aylasin.
Barchangizga Mavlidi sharif oyi muborak bo‘lsin!
Usmonxon ALIMOV,
O‘zbekiston musulmonlari idorasi raisi, muftiy
Imom-xatiblar: «Islom sivilizatsiyasi markazi Uchinchi Renessans g‘oyasining amaliy ifodasi»
O‘zbekistonda Uchinchi Renessans g‘oyasini hayotga tatbiq etish, milliy va diniy merosni chuqur o‘rganish hamda ma’naviy-ma’rifiy bilimlarni kengaytirishga qaratilgan tashabbuslar doirasida Farg‘ona, Qashqadaryo va boshqa hududlardan kelgan imom-xatiblar O‘zbekistondagi Islom sivilizatsiyasi markazida bo‘ldilar. Ular Markazdagi muzey ekspozitsiyalari, noyob qo‘lyozmalar, Renessans davrlariga bag‘ishlangan bo‘limlar va zamonaviy interaktiv yechimlar bilan tanishib, ushbu maskanni ilm, ta’lim va ma’naviyatni uyg‘unlashtirgan muhim milliy platforma sifatida baholadilar, xabar bermoqda iccu.uz.
Farg‘ona viloyati Buvayda tumani «Katta mahalla» masjidi imom-xatibi Rahmatulloh G‘oyibnazarov Prezident Shavkat Mirziyoyev tashabbusi bilan barpo etilgan mazkur Markazni yosh avlod uchun muhim ma’rifat maskani sifatida baholadi.
«Bu yerda Birinchi va Ikkinchi Renessans davrlari, buyuk allomalarimiz qoldirgan ilmiy meros va mamlakatimiz taraqqiyoti haqidagi ekspozitsiyalarni ko‘rib katta taassurot oldik. Bu yerga kelgan har bir inson o‘z tarixini chuqurroq anglaydi, yoshlar esa ilmga va vatanparvarlikka yanada ko‘proq intiladi. Bu yerda olgan bilim va taassurotlarimizni xalqimizga yetkazishni o‘zimizga vazifa deb bilamiz», — dedi u.
Farg‘ona viloyati Qo‘shtepa tumani bosh imom-xatibi, «Muborak» jome masjidi imom-xatibi Otabek Xolmurodov Markaz kutubxonasida ilmiy izlanishlar uchun yaratilgan sharoitlarga e’tibor qaratdi.
Uning ta’kidlashicha, elektron kitoblar fondi, Brayl alifbosidagi adabiyotlar, maxsus tadqiqot xonalari va noyob manbalarning bir joyda jamlangani Markazni nafaqat muzey, balki keng qamrovli ilmiy resurs markaziga aylantirgan.
«Bu kutubxona ilmiy izlanish bilan shug‘ullanuvchilar uchun haqiqiy bilim maskani ekan. Bu yerda yaratilgan sharoitlar ilm ahlini yanada ko‘proq izlanishga undaydi. Biz bu imkoniyatlar haqida yoshlarimizga albatta targ‘ibot olib boramiz», — dedi u.
Farg‘ona viloyati Bag‘dod tumani bosh imom-xatibi Ahmadxon Nizomov esa Markazning ilmiy konsepsiyasiga alohida to‘xtaldi.
Uning fikricha, har bir ekspozitsiya ortida keng ko‘lamli tadqiqotlar va ilmiy izlanishlar mujassam bo‘lib, bu yerdagi interaktiv muhit tashrif buyuruvchilarni faqat tomoshabin emas, balki izlanuvchiga aylantiradi.
«Bu yerga bir marta kelib barchasini to‘liq anglash qiyin. Har bir ekspozitsiya ortida katta ilmiy mehnat mujassam. Ayniqsa, allomalarimiz merosi, tadqiqot markazlari va interaktiv imkoniyatlar insonni yanada chuqur izlanishga chorlaydi. Bu maskan kelajak avlod uchun ulkan ma’naviy boylik va Yangi O‘zbekistonning ilm-fan taraqqiyotiga xizmat qiladigan muhim poydevordir», — dedi u.
Tashrif yakunida ishtirokchilar Markazda jamlangan boy ilmiy va madaniy meros, raqamli ekspozitsiyalar hamda ta’lim imkoniyatlarini keng jamoatchilik, ayniqsa yoshlar o‘rtasida targ‘ib qilish Uchinchi Renessans g‘oyalarini hayotga tatbiq etish, milliy o‘zlikni anglash va ilmiy merosga qiziqishni yanada kuchaytirishga xizmat qilishini qayd etdilar.
O‘zbekiston musulmonlari idorasi Matbuot xizmati
