28 oktyabr kuni O‘zbekiston musulmonlari idorasi raisi, muftiy Usmonxon Alimov hazratlari “Hazrati Imom” majmuasida joylashgan “Movarounnahr” nashriyoti yonida amalga oshirilayotgan bunyodkorlik ishlarini ko‘zdan kechirdilar.
Mazkur inshootlar qurilishi o‘tgan yil sentyabr oyida boshlangan bo‘lib, bugungi kunda uch qavatli binoning qurilish ishlari nihoyasiga yetgan, hozirda tashqi pardozlash ishlari davom ettirilmoqda.
Muftiy hazratlari inshootning fasadi, xonalari, yo‘laklari va har qavatni ko‘zdan kechirib, ularning qanday bezatilishi va jihozlanishi, kelgusida yaratiladigan sharoitlar bilan qiziqdilar.
Tashrif davomida muftiy hazratlariga ushbu qurilish jarayoni, ko‘zda tutilgan rejalar haqida Diniy idora Xo‘jalik bo‘limi mudiri Jamilov Rustam batafsil ma’lumot berdi.
Loyihaga ko‘ra, ushbu hududda 3 qavatli muhtasham bino qad rostlaydi. Mazkur bino yerto‘lasida O‘zbekiston musulmonlari idorasi bosmaxonasi ish boshlaydi. Muftiy hazratlari mutaxassislar bilan samimiy muloqot o‘tkazgandan so‘ng qurilish bo‘yicha zarur taklif va tavsiyalarni berdilar.
Shu kunning o‘zida muftiy hazratlari “Muslim.tv” studiyasiga ham tashrif buyurib, Alloh taolodan Islom dini ma’rifati tarannumi yo‘lida boshlangan ushbu xayrli ishlarni barakotli bo‘lishini so‘rab duoyu fotiha qildilar.
Shuningdek, muftiy hazratlari “Hazrati Imom” majmuasida joylashgan inshootlar, “Baroqxon”, “Mo‘yi muborak” madrasalari, “Tilla Shayx” masjidini ham ko‘zdan kechirdilar.

O‘zbekiston musulmonlari idorasi Matbuot xizmati