Minor masjidi
“Minor” masjidi o‘zining betakror me’moriy uslubi, mahobati bilan alohida ajralib turadi. O‘ziga hos ko‘rinishi va ko‘kka bo‘y cho‘zgan minoralari bilan allaqachon odamlar tiliga tushgan ushbu masjidning qurilish ishlari 2013-yil yoz oylarida boshlangan edi. 2014-yilning 1-oktyabrida Qurbon hayiti bayramida ochilgan. Anxor bo‘yida bunyod etilgan inshoot nafaqat yurtimizda balki dunyoda ham keng e’tirof etilgan. Masalan Fransiyaning Parij shahrida dunyodagi masjidlar arxitekturasi bo'yicha yirik loyiha – Abdullatif al-Favzan mukofoti hakamlari tomonidan ham masjidning o‘ziga hos uslubi, betakror bezaklari aloxida e’tirof etilgan. Masjid binosi an'anaviy sharq va o'zbek uslubida qurilgan bo'lib, ikki minorasi va keng gumbazga ega. Masjidning ichi esa naqshlar bilan bezatilgan. Keng va ulkan oynalar bino ichini yanada yorqin bo‘lishini ta’minlaydi. Uning poygumbazida ham oynalar mavjud. Gumbaz ichidagi ulkan naqshinkor bezaklar xar qanday tashrif buyuruvchining e’tiborini tortmay qo‘ymaydi. Masjid 2400 dan ortiq namozxonlar uchun mo'ljallangan. “Minor” masjidi Toshkentda va butun O'zbekiston bo'ylab eng yirik musulmon diniy markazlaridan biriga aylandi. Masjidga ko‘plab sayyohlar tashrif buyuradi. Bugungi kunda Minor masjidi azim poytaxtimizning ko‘rkiga ko‘rk qo‘shib turibdi.
Shahzod Shomansurov tayyorladi
Nufuzli anjuman Ozarbayjonning Ag‘dam shahrida yakunlandi
Ozarbayjonda bo‘lib o‘tgan Sayyid Yahyo Bokuviyning boy ma’naviy merosiga bag‘ishlangan xalqaro ilmiy-amaliy konferensiyaning yopilish marosimi ramziy ma’noga ega bo‘lgan tarixiy Ag‘dam shahrida o‘tkazildi. Unda turkiy davlatlar, arab-musulmon mamlakatlari diniy peshvolari, ulamolar va soha mutaxassislari ishtirok etdi.
Tadbirda so‘zga chiqqan O‘zbekiston musulmonlari idorasi raisi, muftiy Shayx Nuriddin Xoliqnazar hazratlari bugungi murakkab davrda tinchlik va hurlik eng bebaho ne’mat ekanini alohida ta’kidlab, ummat birligi, hamjihatlik va diniy-ma’rifiy aloqalarni mustahkamlash zaruratiga to‘xtaldilar. Shuningdek, davlat Rahbarlari o‘rtasidagi samimiy birodarlik va oliy darajadagi o‘zaro tashriflar xalqlarimiz tarixida yangi sahifa ochganini e’tirof etdilar.
Yig‘ilishda Kavkaz musulmonlari idorasi raisi, Shayxulislom Ollohshukur Poshshozoda ham so‘zga chiqib, yaqinda bo‘lib o‘tgan Ozarbayjon yetakchisining O‘zbekistonga tarixiy tashrifi va imzolangan "Abadiy do‘stlik shartnomasi" qardoshlik munosabatlarimizni yangi bosqichga olib chiqqanini ta’kidladi.
Anjuman yakunida Shayxulislom Ollohshukur Poshshozoda janoblarining taklifiga binoan O‘zbekiston musulmonlari idorasi raisi, muftiy Shayx Nuriddin Xoliqnazar hazratlari yig‘ilganlar va butun islom ummati haqqiga xayrli duolar qildilar. Muftiy hazratlari o‘z duolarida el-yurtlarimiz tinchligi, mamlakatlarimiz farovonligi hamda anjumanda ko‘tarilgan muhim masalalar musulmonlar va butun ummat manfaati uchun xizmat qilishini Haq taolodan so‘radilar.
O‘zbekiston musulmonlari idorasi Matbuot xizmati
