Mazhabsizlikning oqibati
Mazhabsizlik – xar-bir odam hohlaganiga, o‘ziga xukm olishni taqozo qiladi. Bu esa tarixda ham, bugungi kunda ham oqibati ayanchli holatlarga, begunoh odamlarning qoni to‘kilishiga sabab bo‘layotganini ko‘rish mumkin. Buning asosida ummatni kufrda ayblab, musulmonlarning qonini to‘kishni halol deb bilib terror uyushtirish, obod joylarni vayron qilish, fitna qo‘zg‘ash, rasmiy diniy ulamolarga ta’na toshlarini otish kabi noxush xatarlarga olib bormoqda, shundan bittasini ko‘rib chiqamiz.
— Musulmonlarni kufrda ayblash
Ahli sunna val-jamoa ulamolari nazdida biron-bir musulmonni kofirga chiqarish mumkin emasligi haqida aqiyda kitoblarida yozilgan. Takfir (kufrda ayblash) masalasi eng og‘ir oqibatlarga olib keladigan masalalardan biridir. Shuning uchun Movarounnahrdan yetishib chiqqan ulug‘ allomalar bunday buzg‘unchi g‘oyani diyorimizga kirib kelishiga ming yillar davomida yo‘l qo‘ymaganlar.
Mazhabimizga ko‘ra mo‘min odam gunohi kabira (katta) qilishi bilan kofir bo‘lib qolmaydi. Hanafiy mazhabi bo‘yicha: Iymon — til bilan iqror bo‘lib, qalb bilan tasdiqlash bo‘lib, shunday qilgan kishini mo‘min deb aytishga kifoya qiladi. Ibn Umar roziyallohu anhudan rivoyat qilinadi, Rosululloh sollallohu alayhi vasallam shunday dedilar: “Agar bir kishi birodarini “Ey kofir!” desa batahqiq bu so‘zi ikkisidan biriga qaytadi. Agar aytganidek bo‘lmasa uning o‘zi kofir bo‘ladi”. Imom Buxoriy rahimahulloh rivoyati.
“Ahmadali hoji” jome masjidi imom-xatibi S.Yunusov
O‘zbekiston Islom sivilizatsiyasi markazi noyob Qur’oni karim nusxasini yaratish bo‘yicha jahon xattotlar tanlovini e’lon qildi
26 avgust kuni O‘zbekistondagi Islom sivilizatsiyasi markazida “Islom sivilizatsiyasi: yangi nigoh, yangi kashfiyotlar” xalqaro mediaforumning “Asrlarni birlashtiruvchi meros. Islom sivilizatsiyasining ma’naviy mazmun-mohiyati” mavzusidagi uchinchi yalpi sessiyasi bo‘lib o‘tdi, deb xabar qilmoqda “Dunyo” AA.
Sessiya doirasida Qur’oni karim merosi, qadimiy qo‘lyozmalar, islom xattotligi, hujjatli kino hamda tarixiy manbalarni o‘rganishda sun’iy intellektdan foydalanishga bag‘ishlangan xalqaro loyihalar taqdim etildi.
Xususan, “114 Qur’on: islom olami xattotligining 114 durdonasi”, “Katta Langar Qur’oni: haqiqat va afsonalar”, “Allohning 99 ismi: Uning go‘zal ismlari orqali Yaratganni anglash”, “Sun’iy intellekt – qadimiy qo‘lyozmalarni o‘qishning raqamli kaliti” loyihalari hamda “Yagona tarixiy meros sahifalari” loyihasi doirasida yaratilgan “Masjid” hujjatli filmi namoyish etildi.
Xalqaro muhokamalarda Islom hamkorlik tashkiloti, shuningdek, Jazoir, O‘mon, Pokiston, Saudiya Arabistoni, Iroq, Mali va O‘zbekistonning yetakchi ommaviy axborot vositalari vakillari ishtirok etib, islomofobiya va mavjud stereotiplarni bartaraf etishda medianing o‘rni haqida fikr almashdi.
Sessiya yakunida turli mamlakatlar va xattotlik maktablarining an’analarini birlashtiruvchi noyob Qur’oni karim nusxasini yaratish bo‘yicha Xattotlar umumjahon tanlovi e’lon qilindi.
Eslatib o‘tamiz, mazkur xalqaro mediaforumning asosiy tadbirlari O‘zbekiston Islom sivilizatsiyasi markazida o‘tkazilib, unda qariyb 50 mamlakatdan media va ekspert hamjamiyatining 300 nafarga yaqin vakili — media kompaniyalar, axborot agentliklari va telekanallar rahbarlari, jurnalistlar, prodyuserlar, olimlar hamda kreativ industriya mutaxassislari ishtirok etmoqda.
O‘zbekiston musulmonlari idorasi Matbuot xizmati
