YER VA QUYOSH HAJMINING FARQI
Quyosh – Quyosh tizimining markaziy jismi bo‘lib, qizigan plazma shardan iborat. Quyosh Yer sayyorasiga eng yaqin yulduzdir.
Alloh taolo Qur’oni Karimda shunday marhamat qilgan:
وَالشَّمْسِ وَضُحَاهَا
“Quyosh bilan va uning ziyosi bilan qasam” (Shams surasi, 1-oyat).
Alloh taolo Yer sayyorasi haqida shunday marhamat qilgan:
وَالْأَرْضَ بَعْدَ ذَلِكَ دَحَاهَا
“Va undan so‘ng yerni tuxum shaklida qildi” (Naziat surasi, 30-oyat).
Biz ushbu maqolada Quyosh bilan Yer hajmlarini solishtirib ko‘ramiz.
Quyoshning hajmi 1.300.000 Yer hajmiga teng.
Tushuntirib aytadigan bo‘lsak, Quyoshning ichiga Yer sayyorasidan bir million uch yuz mingtasini joylash mumkin. Ushbu rasmda o‘ng tarafda Quyosh, chap tarafda Yer solishtirilgan.
Ha, Quyosh Yerdan shu qadar katta.
Quyosh “Quyosh tizimi”ning 98 foizini tashkil etadi. Qolgan 2 foizi 9 ta sayyora hissasiga to‘g‘ri keladi.
Ammo shunga qaramasdan, Quyosh G2V tipidagi yulduz hisoblanadi. Bunday yulduzlar “Sariq karlik”, ya’ni sariq jajji yulduzlar deyiladi.
Shu “jajji yulduz” biz yashayotgan sayyoradan shu qadar katta ekan. Endi biz o‘z sayyoramiz oldida qanchalik kichik, zarradekmiz. Alloh taolo shunday ulkan maxluqlarni biz insonlarning qulay hayot kechirishimiz uchun bo‘ysundirib qo‘ygan. Biz esa o‘zimizning naqadar ojiz, zaif ekanimizni his qilib, Alloh taoloning ibodatida bardavom bo‘laylik!
Bu suratda esa shar ichiga 1.300.000 dona kichik sharchalar solingan bo‘lib, Quyosh bilan Yerning solishtirma hajmi maket ko‘rinishida berilgan.
Maqolamizni ushbu oyat bilan yakunlaymiz:
هَذَا خَلْقُ اللَّهِ فَأَرُونِي مَاذَا خَلَقَ الَّذِينَ مِن دُونِهِ بَلِ الظَّالِمُونَ فِي ضَلَالٍ مُّبِينٍ
“Bu Allohning yaratganidir. Qani menga ko‘rsating-chi, Undan boshqalar nimani yaratdilar. Yo‘q! Zolimlar ochiq-oydin adashuvdadirlar” (Luqmon surasi, 11-oyat).
Internet ma’lumotlari asosida Nozimjon Hoshimjon tayyorladi
Siz eng boy odamsiz!
Insonning fe’li qiziq: biz ko‘pincha o‘zimizda yo‘q narsalar haqida qayg‘urib, qo‘limizdagi bebaho ne’matlarni odatdagi holdek qabul qilamiz. Vaholanki, biz oddiy deb bilgan qulayliklar, sog‘liq va boshqa imkoniyatlar sayyoramizning millionlab aholisi uchun eng katta orzu hisoblanadi.
Jumladan, bugungi tongni dunyo bo‘yicha 174 mingga yaqin inson qarshi ololmadi. Ayni damda 50 milliondan ortiq odam saraton kasalligi bilan kurashmoqda. 300 million inson ranglar jilosini ko‘rish baxtidan mahrum. 400 millionga yaqin kishi esa eshitish moslamalarisiz dunyo tovushlarini eshita olmaydi. 770 milliondan ortiq katta yoshdagi inson hanuzgacha o‘qish va yozishni bilmaydi. 2,5 milliarddan ziyod aholi global axborot va internet imkoniyatlaridan uzilgan holda yashamoqda. 6,5 milliard inson esa samolyotda umuman uchib ko‘rmagan...
Bu raqamlar shunchaki quruq ko‘rsatkichlar emas. Ular ortida millionlab insonlarning ana shunday ayanchli taqdiri yotibdi.
Agar siz hozir ushbu matnni o‘qiy olayotgan, atrofdagi ranglar va tovushlarni his qilayotgan, eng muhimi, yangi kunni sog‘-omon yashayotgan bo‘lsangiz, demak, siz sayyoradagi eng baxtli insonlardan birisiz. Shunday ekan, turmush tashvishlaridan nolishni to‘xtating. Yon-atrofga boqing: siz yashayotgan bugungi kunga kimlardir yetmadi. Demak, har bir xotirjam olingan nafas, har tinch otgan tong uchun Yaratganga hamdlar aytib, shukronalik kayfiyati bilan yashang. Chunki siz eng boy odamsiz!
Akbarshoh RASULOV
