OTAM OTASIGA NIMA QILGAN BO‘LSA MЕN HAM SHUNI QILAMAN...
Asma’iy aytadi, A’robiylardan bo‘lgan bir kimsa mana bu voqeani aytib berdi:
Men eng yaxshi odam kim-u, ota-onasiga oq bo‘lganlar kimligini bilish maqsadida o‘z mahallamdan chiqib boshqa mahallalar oralab borar ekanman, bir qari cholning oldidan chiqdim. Uning bo‘ynida quduqdan suv tortadigan chelakning uzun arqoni bor ediki, u yukni hatto tuya ham ko‘tara olmas edi. Bu ayni tush payti bo‘lib, jazirama zaminni qattiq qizdirayotgan edi. U cholning orqasida bir yigit turar, uning qo‘lida arqondan qilingan qamchisi bo‘lib, u bilan cholni urar, hatto cholning orqasi arqonning zarbidan yorilib ketgan edi. Men bu holatni kuzatar ekanman, yigitga: “Allohdan qo‘rqmaysanmi, axir bu qari cholku, uni jarohatlaganing yetmaganidek, qattiq azob ham beryapsan?!”, dedim. U pinagini ham buzmay: “Bundan tashqari u mening otam ham”, dedi. Men: “Alloh seni yaxshilik bilan mukofotlamasin!”, dedim. U: “Jim bo‘l, bu odam, ya’ni otam o‘z otasiga shunday qilgan, otasi esa bobosiga”, dedi. Men aytdim: “Haqiqiy oqpadar shudir!”.
Ibrohim Hozimiyning
OQPADARLIK OQIBATLARI kitobidan
Indoneziya haj va umra asossiatsiyalari delegatsiyasi yurtimizda
Bugun, 25 iyun kuni Indoneziya haj va umra asossiatsiyalarining doktor Muslim Iskandar boshchiligidagi vakillari O‘zbekiston musulmonlari idorasida bo‘lishdi. Mehmonlar bilan diniy idora raisining birinchi o‘rinbosari Homidjon domla Ishmatbekov uchrashuv o‘tkazdi.
Sakkiz nafar delegatsiya a’zolari: Doktor Muslim Iskandar, Asip Bisma Supriatna, Zaid Muslim Iskandar, Mustain Xattob, Muhammad Atsir Abdulaziz, Jannatul Ma’vo, Muhammad Iqbol hamda Hilman Parifiy birma-bir o‘zlarini tanishtirib, “Umra +” loyihasini o‘rganish maqsadida 3400 ta turfirma nomidan vakil bo‘lib kelishganini bildirishdi.
Uchrashuv avvalida Homidjon domla mehmonlarni tashrif bilan qutlab, kelganlari uchun minnatdorlik bildirdi. So‘nggi yillarda yurtimizda diniy-ma’rifiy, turizm va boshqa sohalarda bo‘layotgan yangilanishlar haqida aytib o‘tdi. Xususan, 2017 yilda tamal toshi qo‘yilgan Islom sivilaziyasi markazi, qayta bunyod etilayotgan Imom Buxoriy majmuasi, Hazrati Imom dahasida olib borilayotgan bunyodkorlik ishlariga to‘xtaldi.
O‘z navbatida delegatsiya rahbari Muslim Iskandar ularga bu taklifni bildirgan “Real Dreams” sayyohlik firmasidan minnatdor ekanliklarini aytib, O‘zbekiston haqida juda ham ijobiy taassurotlarda ekanini ta’kidladi. Birgina Toshkent shahridagi o‘rganishlari natijasida O‘zbekistonda ziyorat turizmi sohasi istiqbolli ekani, hali Samarqand, Buxoro, Xiva kabi qadim va navqiron shaharlarni ham borib ko‘rishlarini, lekin hozirdanoq “Umra +” loyihasi juda istiqbolli ekaniga amin bo‘lganini bayon etdi.
Delegatsiya a’zosi, “Kasturi” birlashmasi rahbari Muhammad Atir 2017 yilda ham O‘zbekistonga kelganini, o‘sha payt bilan oradan o‘tgan qisqa vaqtdagi ulkan o‘zgarishlardan hayratda ekanini aytib, bu ishlar yurtning allamolariga, ilmiy-ma’rifiy merosga bo‘lgan e’tiboridan darak ekaniga urg‘u berib o‘tdi.
Shuningdek, delegatsiyaning boshqa a’zolari – Indoneziyaning “Amphuri”, “Hagatama”, “NRA Group Ltd.” “Jannatul Ma’wah”, “Himpuh” kabi minglab turfirmalarni birlashtirgan asossiatsiyalari rahbarlari ham musulmon sayyohlar e’tibori va oqimini O‘zbekistonga bemalol yo‘naltirish mumkinligini, bu xayrli ish ikki davlat uchun ham har tomonlama manfaat keltirishini ta’kidlashdi.
O‘zbekiston musulmonlari idorasi
Matbuot xizmati
