“Al-Azhar” universiteti rektori Doktor Muhammad al-Mahrusoviy: “Islomning asl negizi – tinchlikdir”
Misr Arab Respublikasidagi “Al-Azhar” universiteti rektori Doktor Muhammad al-Mahrusoviy terrorizmning dini va vatani yo‘qligini aytib, Islomning tinchlik, mehr-muruvvat va bag‘rikenglik dini ekanini ta’kidladi.
Bu bayonot “Al-Azhar” universiteti rektorining joriy yilning 15-17 sentyabr kunlari Ispaniya poytaxti Madrid shahridagi anjumanlar zalida “Tinchlik sanoqsizdir” shiori ostida o‘tkazilayotgan Umumjahon tinchlik forumidagi nutqida ma’lum qilindi. Doktor Muhammad al-Mahrusoviy agar terrorizm cherkovlar va ibodatxonalarga zarar yetkazgan bo‘lsa, uning masjidlarga ham salbiy ta’sirini o‘tkazishini ma’lum qilib, shunday dedi: “Biz Misr Arab Respublikasining Shimoliy Sinay viloyatining “Bir al-Abed” qishlog‘idagi “Ar-Ravza” masjidida juma namozida sodir bo‘lgan terakt voqeasini eslaylik. Unda 305 kishi halok bo‘lgan edi, chunki bu qishloqning umumiy aholisi 750 kishi edi xolos. Ko‘p sonli erkaklar yo‘q qilindi, ayollar va yosh bolalar qoldi. Barcha dinlarda terrorizm qoralanadi, tinchlik barcha dinlarning, shu jumladan Islom dinining ham asl negizidir. Islomning mehr-muruvvat, tinchlik va to‘g‘rilik dini ekanligi xususida Qur’oni karimning bir qancha oyati karimalarida ta’kidlab o‘tilgan. “As-Salam” ya’ni “Tinchlik” so‘zi Qur’oni karimda 140 marta zikr qilingan”.
“Al-Azhar” universiteti rektori Doktor Muhammad al-Mahrusoviy o‘z nutqida tinchlik turlarini batafsil bayon qilib, jumladan kishining o‘zi bilan, oilasi bilan, jamiyati bilan va butun dunyo bilan tinchligi bo‘lishini ta’kidladi.
Xalqaro aloqalar bo‘limi xodimi
Ilyos Ahmedov tayyorladi.
"Imom Buxoriy" ordeni — yuksak ehtirom ramzi!
Kuni kecha mamlakatimiz mustaqilligining 35 yilligi munosabati bilan muhtaram Prezidentimiz tomonidan yuksak davlat mukofotlariga sazovor bo‘lgan bir guruh vatandoshlarimiz taqdirlandi.
Eng quvonchlisi shuki, tadbirda diniy-ma’rifiy sohada fidokorona xizmat qilib kelayotgan, xalqimizning ma’naviy yuksalishiga beqiyos hissa qo‘shayotgan taniqli ulamolarimiz va faxriylarimizning zahmatli mehnatlari yuksak darajada e’tirof etildi!
Xususan, Diniy idora tizimida uzoq yillardan beri samarali xizmat qilib kelayotgan ustozlardan O‘zbekiston musulmonlari idorasi raisining birinchi o‘rinbosari Homidjon domla Ishmatbekov, O‘zbekiston musulmonlari idorasi Faxriylar kengashi raisi Shayx Abdulaziz Mansur, Samarqand viloyati Payariq tumani "Imom al-Buxoriy" jome masjidi faxriy imomi Mahmudjon domla Ibodullayev, Buxoro viloyati Kogon tumani "Bahouddin Naqshband" jome masjidi imom-xatibi Abdug‘ofur domla Razzoqov "Imom Buxoriy" ordenini Davlatimiz Rahbaridan qabul qilib olishdi.
Ustozlarning ilmiy-ma’rifiy faoliyati, xalq ichida ma’rifat ulashishdagi fidoyiliklari davlatimiz tomonidan yuksak qadrlangani butun diniy-ma’rifiy sohada mehnat qilayotganlar uchun katta faxr va sharafdir.
Ushbu voqea Yangi O‘zbekistonda diniy-ma’rifiy sohaga, milliy qadriyatlarimizni avaylab-asrash hamda rivojlantirishga qaratilayotgan izchil va xayrli siyosatning amaliy ifodasidir.
Xalqimizda qadimdan ma’rifat ahlini ulug‘lash, ularning zahmatli mehnatini qadrlash ezgu an’ana sanaladi. Islom ta’limotida ham ilm egalariga alohida maqom va hurmat bilan qaraladi. Zero, Imom Termiziy bobomiz rivoyat qilgan hadisi sharifda: «Ulamolar payg‘ambarlarning merosxo‘rlaridir», deyilgan.
Ulamolarga ko‘rsatilayotgan bunday e’tiborning nechog‘li xayrli ekani quyidagi hikmatda ham o‘z ifodasini topgan. Ulug‘ zotlardan biri Tovus rahmatullohi alayh otasidan quyidagicha rivoyat qilgan: «To‘rt kishini hurmat qilish sunnatdir: olim, yoshi ulug‘ inson, podshoh va ota» (Imom Abdurazzoq rivoyati).
Mazkur yuksak mukofot milliy va diniy qadriyatlarimizni tiklash, Islom ma’rifatini keng targ‘ib etish, jamiyatda bag‘rikenglik va tinchlik-omonlikni bardavom saqlash yo‘lidagi ko‘p yillik xayrli xizmatlarning munosib e’tirofidir.
Davlatimizning bunday e’tibori diniy soha xodimlariga yanada ulkan mas’uliyat yuklaydi, ma’naviy yuksalish yo‘lidagi xayrli xizmatlar ko‘lamini yanada kengaytirishga xizmat qiladi, insha Alloh.
O‘zbekiston musulmonlari idorasi Matbuot xizmati
- «
- »