Tarixdagi eng qisqa maktub va xutba
Tarixda eng qisqa va balog‘atli maktublar, mav’izalar ko‘p bo‘lgan. Shulardan ikkita ibratlisini keltiramiz.
“Umar ibn Xattob (roziyallohu anhu)dan Amr ibn Oss (roziyallohu anhu)ga:
“Menga yetib kelgan xabarga ko‘ra, hukm majlislarida suyanib o‘tirar ekansan. Ey Ossning o‘g‘li, tavoze’ bilan o‘tir! Aks holda hokimlikdan olaman. Kiyim kiyishga ko‘p e’tibor berma! Allohdan qo‘rqish va (gunohlaring uchun) nadomat libosini kiy! Agar kishi uchun o‘z kiyimlarida sharaf bo‘lganida, u eng go‘zal liboslarini Haramda yechmagan bo‘lardi”.
Ma’lumki, Saudiya Arabistoniga Haj va Umra qilish niyatida boradigan odam Haram hududiga kirishdan oldin belgilangan joyda barcha liboslarini yechib, ehrom kiyib oladi.
*****
Yaqin tarixdagi eng qisqa va ma’noli xutba
Bu voqea Tunisdagi Zaytuna jome’sida bo‘lgan edi. Mamlakat muftiysi Muhammad Tohur ibn Oshur rahimahulloh Jum’a kuni minbarga chiqib, namozxonlarga yuzlanib, “Bozorlardagi ayollar kimniki?” deb so‘radi. Namozxonlar sukutda. Imom yana “Bozorlardagi ayollar kimniki?” deya savolini takrorladi. Bu safar ham namozxonlar jim.
Shunda ulug‘ muftiy: “Modomiki, ayollaringiz ochiq-sochiq, yarim-yalang‘och ekan, o‘qigan namozlaringizda yaxshilik yo‘qdir. Takbir ayting!” dedi.
Internet ma’lumotlari asosida Nozimjon Hoshimjon tayyorladi
Soha rahbarlari mahallalardagi targ‘ibot va obodonlashtirish ishlari bilan tanishdi
Mamlakatimizda mustaqillik bayramining 35 yilligi munosabati bilan “Mahallada obodlik va mehr-saxovat oyligi” hamda “Dolzarb 40 kunlik” tadbirlari doirasida hududlarda keng ko‘lamli targ‘ibot-tashviqot, obodonlashtirish, xayriya va mehr-oqibat ishlari amalga oshirilmoqda.
Mazkur jarayon bilan yaqindan tanishish maqsadida 4 avgust kuni O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov, Din ishlari bo‘yicha qo‘mita raisi Sodiq Toshboyev hamda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari boshchiligidagi mutasaddilar Toshkent shahri Sergeli tumanidagi “No‘g‘ayqo‘rg‘on”, “Qumariq” va “Ittifoq” mahallalarida bo‘lishdi.
Tashrif davomida soha rahbarlari mahallalardagi ijtimoiy-ma’naviy muhitni yanada sog‘lomlashtirish, xayriya va saxovat ishlarini kengaytirish, obodonlashtirish hamda bunyodkorlik ishlarining borishi bilan tanishdi. Shuningdek, mahalliy hokimiyat vakillari, “mahalla yettiligi”, nuroniylar hamda diniy soha xodimlari ishtirokida ushbu yo‘nalishlarda amalga oshirilayotgan ishlar muhokama qilindi.
Mahallalarda o‘tkazilgan sayyor yig‘inlarda “Jaholatga qarshi ma’rifat bilan kurashish”, oilalarda totuvlikni mustahkamlash, yoshlarni ilm-ma’rifatga yo‘naltirish, ehtiyojmand oilalarni qo‘llab-quvvatlash, farzand tarbiyasi hamda aholi muammolarini hal etishda hamjihatlikni kuchaytirish masalalariga alohida e’tibor qaratildi.
Shu bilan birga, xonadonlar atrofi, ko‘chalar, ariqlar va qabristonlarni obod qilish, ularning ozodaligini ta’minlash bo‘yicha olib borilayotgan ishlar yuzasidan ham tegishli tavsiya va ko‘rsatmalar berildi.
Darhaqiqat, Prezidentimiz ta’kidlaganlaridek, amalga oshirilayotgan islohotlar samarasi, eng avvalo, mahallalar hayotida yaqqol namoyon bo‘lishi va aholi kayfiyatida o‘z aksini topishi lozim. Shu ma’noda, joriy yil yakunida mamlakatimiz bo‘ylab “Eng orasta xonadon”, “Eng fayzli hovli”, “Eng obod ko‘cha” va “Eng namunali mahalla” nominatsiyalari bo‘yicha g‘oliblarning aniqlanishi mazkur ezgu tashabbuslarning mantiqiy davomi bo‘ladi.
O‘zbekiston musulmonlari idorasi Matbuot xizmati
