Dubay Islom banki Qur'oni karimni katta adadda chop ettiradi
Dubay Islom banki Qur'oni karimning dunyo bo'ylab tarqalishi va chop etilishi uchun “Dar al-Bir” uyushmasiga 550 000 dirham ajratganini e'lon qildi.
IQNAning “Al-Bayan” matbuot xizmatiga tayanib xabar berishicha, Dubay Islom banki bu tashabbusni Qur'oni karim hofizlari va qorilarini qo'llab-quvvatlash, bankning xayriya faoliyatini amalga oshirish sifatida baholagan.
“Dar al-Bir” uyushmasi direktori Muhammad Sohail al-Mahiri bu sa'y-harakatni yuqori baholab bunday dedi: “Dubay Islom banki mazkur aktsiyaning strategik hamkori bo'lib, uyushmaning turli xayriya tashabbuslari va xayriya loyihalarini qo'llab-quvvatlaydi”.
Qariyb 44 yildan buyon ushbu bank turli gumanitar sohalarda dunyo musulmonlari orasida xayriya va xizmat ko'rsatish sohalarida masjidlar va Qur'oni karimni yodlatish markazlari qurilishida ulkan ishlarni amalga oshirib kelmoqda.
Al-Mahiri “Dar al-Bir” uyushmasining kelgusi rejalari haqida ma'lumot berib, jumladan bunday izoh berdi: “Bu chora-tadbirlar Islom dini ta'limoti va xayriya ishlarini amalga oshirishning ahamiyatiga asoslanadi. Uyushma faoliyatining asosiy qismi Qur'oni karimni dunyoning turli mamlakatlarida chop etish va tarqatish, masjidlar va Islom markazlarini qo'llab-quvvatlashga qaratilgan”.
O'zbekiston musulmonlari idorasi xodimi
Ilyosxon Ahmedov tayyorladi
“Em Insight”: Toshkentdagi xalqaro mediaforum islom sivilizatsiyasining zamonaviy qiyofasini namoyon etdi
Britaniyaning “Em Insight” jurnalida O‘zbekistonda bo‘lib o‘tgan “Islom sivilizatsiyasi: yangi nigoh, yangi kashfiyotlar” mavzusidagi xalqaro mediaforumga bag‘ishlangan maqola e’lon qilindi, deb xabar bermoqda “Dunyo” AA.
Nashrda yozilishicha, O‘zbekiston Islom sivilizatsiyasi markazi tomonidan tashkil etilgan “Islom sivilizatsiyasi: yangi nigoh, yangi kashfiyotlar” xalqaro mediaforumi xorijlik OAVda katta qiziqish uyg‘otgan.
Raqamli platformalar, sun’iy intellekt va axborot xurujlari avj olgan hozirgi zamonda ommaviy axborot vositalarining mamlakatlar, madaniyatlar va sivilizatsiyalar haqidagi tasavvurlarni shakllantirishdagi o‘rni tobora ortib bormoqda.
Maqolada ta’kidlanishicha, Al-Xorazmiy, Ibn Sino, Beruniy, Imom Buxoriy, Imom Termiziy va Mirzo Ulug‘bek kabi jahon ilm-fani rivojiga beqiyos hissa qo‘shgan buyuk mutafakkirlar yurti bo‘lmish O‘zbekiston bu kabi global muhokamalar uchun eng maqbul maydondir.
Qatarning “The Peninsula” gazetasi mas’ul muharriri Muhammad Osmon forumning raqamli axborot asridagi ahamiyatiga to‘xtalib, Imom Buxoriyning hadislarni to‘plash va ularning haqqoniyligini tekshirishdagi qat’iy yondashuvini tilga oldi.
U ushbu metodologiyani manbalarni chuqur o‘rganish va verifikatsiya qilishning o‘chmas namunasi deb atadi va bu tamoyillar feyk xabarlar hamda sun’iy intellekt mahsulotlari ko‘paygan hozirgi davrda juda ahamiyatli ekanini bildirdi.
O‘zbekiston Milliy axborot agentligi muharriri O‘tkir Alimov forumning Mustaqillikning 35 yilligi ostonasida o‘tkazilayotganiga e’tibor qaratgan. U 50 mamlakatdan 300 ga yaqin OAV vakillarining Toshkentda jamlangani O‘zbekistonning sivilizatsiyalar chorrahasi sifatidagi o‘rni ortib borayotganidan dalolat berishini ta’kidladi.
Maqolada Toshkentdagi xalqaro mediaforum jurnalistika mas’uliyati, tarixiy tadqiqotlar chuqurligi va zamonaviy texnologiyalar imkoniyatlarini birlashtirgan holda Islom sivilizatsiyasini yangi, zamonaviy qiyofada dunyoga tanitishga xizmat qilishi bayon etilgan.
O‘zbekiston musulmonlari idorasi Matbuot xizmati
