Ijtimoiy tarmoq foydalanuvchilari o‘z sahifalariga masjidda, oshxonada o‘tirgan, dam olishga turli joylarga borganlarining rasmlarini joylashadi. Ularning qalblarini biz bilmaymiz. Ammo riyo, maqtanish kabi illatlardan ehtiyot bo‘lishga chaqiramiz.

Sahifamga masjidda o‘tirganimning rasmini qo‘ymaganim, masjidga bormasligimni anglatmaydi!

Bolalarimning Qur’on, namoz o‘qib o‘tirgan rasmlarini sahifamga qo‘ymaganim, mening bolalarim Qur’on tilovat qilmaydi, namoz o‘qimaydi deganim emas!

Ovqatlanib o‘tirganimning rasmini qo‘ymaganim, oshxona va kafelarga bormasligimni, umuman ovqatlanmasligimni anglatmaydi!

Turkiya, Dubay, Bali kabi joylardagi dengiz bo‘ylarida, yaxtalarda turgan rasmimni sahifamga joylamaganim, u yerlarga bormasligimni anglatmaydi!

Oilamiz suratini sahifamga joylamaganim, bu dunyoda bir o‘zim yolg‘iz yashashimni anglatmaydi!

Yeb o‘tirilgan muzqaymoq rasmini sahifamga qo‘ymaganim, oilam yoki do‘stlarim bilan muzqaymoqxo‘rlik qilmasligimni anglatmaydi!

Bolalarimning istirohat bog‘idagi rasmlarini sahifamga qo‘ymaganim, bolalarimni istirohat bog‘lariga olib borib, ularning ko‘ngillarini ko‘tarmasligimni anglatmaydi!

Men faqat riyo va maqtanchoqlik bo‘lib qolishidan, amallarimning savobidan mahrum bo‘lib qolishdan qo‘rqaman!

Dam olish uchun Turkiya, Dubay, Bali, Antaliya, Issiqko‘l kabi joylarga, ovqatlanish uchun turli oshxona va kafelarga, shuningdek, farzandlari bilan istirohat bog‘lariga bora olmaydigan kishilarning dillari o‘ksib, og‘rib qolishidan, qolaversa, oilamga, bolalarimga ko‘z tegishidan, kimlarningdir hasad qilishidan qo‘rqaman.

Azizlar, kun davomida nimalar qilganimiz, qayerlarga borganimiz, kimlar bilan uchrashganimiz, nimalar deganimiz, nimalar yeganimiz aks etgan rasmlarni tarmoqlarga joylayverishni to‘xtataylik!

Amallarimizga riyo aralashishidan saqlanaylik! Zero, amallarga riyoning kirib qolishi chumolining o‘rmalashidan ham maxfiyroqdir.

Yon-atrofimizdagi nochor, befarzand, kamxarj hamda oilasiz kishilarning dillarini og‘ritib qo‘yishdan ehtiyot bo‘laylik!

Axir dinimizda qo‘shnilarga ozor bermaslik, agar taomidan qo‘shnisiga ham chiqarmaydigan bo‘lsa, taomning hidini imkon boricha ularga sezdirmaslik, qozonga kapgirni qattiq urmaslik, agar qo‘shnisining bolalariga ham shirinlikdan ulashmaydigan bo‘lsa, u holda farzandining qo‘liga shirinlik berib ko‘chaga chiqarmaslik kabi ko‘rsatmalar kelgan-ku!

Bizning yozganlarimizni har kuni o‘qiydigan, postlarimizdan kunda xabardor bo‘lib boradigan ijtimoiy tarmoqlardagi do‘stlarimiz ham bizning qo‘shnilarimiz hisoblanadi. Demak, qo‘shnilarga ozor bermaslik borasida ularni ham e’tiborga olishimiz kerak.

Alloh taolo bizning farosatimizni ziyoda aylab, riyo, manmanlik va maqtanchoqlik kabi illatlardan asrasin!

Nozimjon Hoshimjon tayyorladi