Sehrgarlar, folbinlar Alloh va Rasulining dushmanidir. Islom dinida folbinlar qattiq qoralangan.

«Sehr» – ko‘zbo‘yamachilik, bir narsani haqiqatidan boshqa tarafga burish, botil narsani haqiqat qilib ko‘rsatish».

Sehrgar – bu jinlardan bo‘lgan shaytonlarga, ularga yoqadigan kufr va jirkanch amallarni qilish orqali murojaat qiluvchi kimsadir. Bundan murod sehrgarga sehrda ularning yordam berishidir.

Islom ulamolari sehrgar shak-shubhasiz, kofir bo‘ladi, degan hukmni o‘qishgan. Bunga hujjat sifatida quyidagi oyat keltiriladi: «Balki odamlarga sehr o‘rgatadigan shaytonlar kofir edilar» (Baqara surasi, 102-oyat).

G‘aybni bilish da’vosidagi qoralangan ilm «folbinlik» deb ataladi. Folbinlikning «kohinlik», «ilmul-raml», «munajjimlik», «arroflik» kabi boshqa nomlari ham bor.

Folbin, kohinning g‘aybdan bergan xabarini tasdiqlash oyati karima va hadisi sharifga asosan kufrdir.

Abu Hurayra roziyallohu anhudan rivoyat qilinadi: “Rasululloh sollallohu alayhi  vasallam dedilar: “Kim tugun tugib, unga dam ursa, sehr qilgan bo‘ladi. Kim sehr qilsa, shirk keltirgan bo‘ladi”, deb aytganlar (Imom Nasoiy rivoyat qilgan).

Ali ibn Abu Tolib roziyallohu anhu: «Folbin — sehrgar, sehrgar esa kofirdir» degan.

Payg‘ambarimiz sollallohu alayhi vasallam: “Kim folbinga borib, uning aytganiga ishonsa, Muhammad sallollohu alayhi vasallamga nozil qilingan narsaga kufr keltirgan bo‘ladi”, deganlar.

Imom Ibn Hibbon Abu Muso roziyallohu anhudan rivoyat qilgan hadisda Payg‘ambarimiz sallollohu alayhi vasallam: “Aroq ichuvchi, sehrga ishonuvchi va qarindoshlik aloqasini uzuvchilar jannatga kirmaydi”, deganlar.

Imom Tabaroniy Anas ibn Molik roziyallohu anhudan rivoyat qilgan hadisda Payg‘ambarimiz Muhammad sallollohu alayhi vasallam: “Kim folbinga borib, uning gapiga ishonsa, Muhammad sallollohu alayhi vasallamga nozil bo‘lgan narsadan ajrabdi. Kim uning huzuriga kelsayu gapiga ishonmasa, qirq kungacha namozi qabul bo‘lmaydi”, deganlar.

Imom Tabaroniy Vosila ibn Asqa’ roziyallohu anhudan rivoyat qilgan hadisda Rasuli Akram sallollohu alayhi vasallam: “Kim folbinning huzuriga kelib, undan biror narsani so‘rasa, qirq kechagacha tavbasi to‘siladi. Agar folbinning gapiga ishonsa, kofir bo‘ladi”, deganlar.

Oisha roziyallohu anho aytdilar: «Odamlar Rasululloh sollallohu alayhi vasallamdan folbinlar haqida so‘rashdi. U zot roziyallohu anho: «Ular haq emaslar», dedilar. Ular: «Yo Rasululloh, ular gohida shunday gaplarni aytadilarki, u haq bo‘lib chiqadi», deyishdi. Rasululloh sollallohu alayhi vasallam: «Bu haq kalimani jin o‘g‘irlab (o‘g‘rincha bilib) oladi-da uni do‘sti (folbin)ning qulog‘iga quyadi. Folbinlar esa unga yuzta yolg‘onni aralashtirib yuboradilar», dedilar» (Muttafaqun alayh).

         Sehrlangan odam Dinimiz ko‘rsatmasiga muvofiq, yaxshilab tahorat olib, ikki rakat nafl namoz o‘qib, keyin Qur’oni Karimning Fotiha surasini, Baqara surasining avvalgi besh oyatini, Oyatul Kursiyni, “Amanar rosulu”ni, Yosin surasini, Hashr surasining oxirgi oyatlarini, Kaafirun, Ixlos, Falaq va Naas suralarini o‘qib, o‘zlariga dam solishlari, dam solish asnosida oldilariga idishda suv qo‘yib olib, dam solib bo‘lgach, o‘sha suvni ichishlari tavsiya qilinadi. Mo‘min kishi dam solib, duo qilar ekan, “Men Allohning oyatlarini o‘qiyapman. Menga shifo beruvchi Uning O‘zidir. Undan boshqa shifo beruvchi yo‘q. Uning shifosi hech bir kasallikni qoldirmaydi” degan e’tiqodda bo‘lishi kerak.

O‘MI matbuot xizmati